Salamo 10 - Buki Tabu Lowaenei 1919

SALAMO 10.

¹ ‘Ieoba ie, Toase manuna ‘u tooro ‘edasora? To‘ase manuna ‘U sa‘u kwaiemu tuta ‘elo‘uia ‘enega?

² To to‘umalina ‘ina gagasa ‘enega gomabeso ‘i didigena ga ‘i pa‘ina. Wasegigi si nuedi ‘ediega si da esilae.

³ To to‘umalina ‘atena ‘ina nuanua ‘enega ‘i ona gagasa, Ta to iato‘ai Ieoba ‘i e‘idi‘idiena, tamo, ‘i sinarina.

⁴ To to‘umalina, matana ‘ina gagasa ‘ena ‘i gwae, Nigea sawesawenaia. ‘Ina nuanua iauiaudi getedi, Nigea ‘e bweu Eaubada ‘i miami.

⁵ ‘Ina ‘eda pa‘aridi tuta iauiauna; ‘Imu loina si mia to ‘etana sana nigea ‘i da ‘itedi: ‘Ana tarauwara iauiauna manudi, ‘edia ‘i mu‘enunu.

⁶ ‘Atenaia ‘i gwae, Gea‘abo ia da loniu: Epata tomota iauiauna ‘edia gea‘abo ia da miamia to‘umalina.

⁷ ‘Awana ‘i maa eliega be, kabo be, didiga be: Meiana ‘agaraunaia wasegigi ta bubuna bokobokona si miami.

⁸ ‘Asa ‘idi esena ‘ebe‘enokwaia ‘edia ‘i miatoa; Esena kwaia ‘edia tauna nigea ‘i toumalina ‘i ununa: Matana taudi nigea ‘adi to‐lemamo ‘i dunedunekwaiedi.

⁹ Esena kwaia ‘ena i ‘enokwaia na‘ieana laione ‘ina gaula ‘enaia: I ‘enokwaia sabi giiaina gomabeso; Gomabeso ‘i giiaina, ‘ena ‘ina gomana ‘ena ‘i lisina.

¹⁰ I miaagaagara, ‘i kopukopu, Ta taudi nigea ‘idi to‐lemamo si be‘u ‘ina to ewaiwaiao ‘ediega.

¹¹ ‘Atenaia ‘i gwae, Eaubada ni‘atu ‘i nuapupura: Maninina ‘i e‘etokwaiena; gea‘abo ‘i da ‘ita‘ita.

¹² Ieoba ie, ‘U da tooro; Eaubada ie, nimaio ‘u da gilagasi: Gomabeso gea‘abo ‘u da nuanuapupuredi.

¹³ To‘ase manuna to‐to‘umalina Eaubada ‘i sinarina, Ta ‘atenaia ‘i ona, Nigea sawesawemuia?

¹⁴ Ni‘atu u ‘itena; wasegigi ta nuanuato‘umali u ‘itena ta ‘enega, sabi ‘ewena nimaio ‘enaia: Tauna nigea ‘ana to‐lemamo ‘i tagwarena tauna ‘emuia; ‘Oio pesieda nigea tamadimo ‘idi to‐lema.

¹⁵ To to‘umalina nimana ‘u da gilasa; Ta tai to‘umalina manuna, ‘ina bubuna to‘umalina ‘u da ‘ebesa ga nigea ‘e bweu u ‘ita‘ita.

¹⁶ Ieoba ‘i King ataia ta ataia: ‘Ebeloina si saoora ‘ina ‘asa ‘enega.

¹⁷ Ieoba, taudi ‘idi bubuna nuana ‘idi nuanua ‘u nonona: ‘Atedi ‘u da giepa‘ari, ta tenaio ‘u da enonotenasiena:

¹⁸ Be taudi nigea tamadimo ta taudi si miami to‘umalina ‘u da loinedi, Be ‘enega tai tauna to mia bare‘uia gea‘abo wate ‘i da lodidiga.