Ruta 4 - Buki Tabu Lowaenei 1919

‘UPWA 4.

¹ Ta Boasa ‘eberugu ‘ena ‘i tu‘e, ta ‘ena ‘i miatoa; ta, wa ‘ita, bu‘una nina manuna Boasa ‘i gwaegwae ‘i tautauia; tauna ‘ena ‘i gwae, Ie, gosiagu! ‘u da lagama, gete ‘ena ‘u da miatoa. Ta ‘i lagama, ta ‘i miatoa.

² Ta tai sanau ‘asa ‘ana ‘inapwanao i ‘au‘ewedi, ta ‘i ona, Gete ‘ena wa da miatoa. Ta si miatoa.

³ Ta bu‘una nina ‘ena ‘i ona, Naomi, tauna ‘asa Moaba ‘enega i ‘ila limanama, tanoa ‘i gimwaniena, tauna tasida Elimeleka ‘ina tanoa:

⁴ ta ia nuena ‘aene ‘emuia ia da simana be ia da gwae, ‘U da lagwena taudi gete ‘ena si miatoa matadia, ta ‘igu susu ‘ana ‘inapwanao matadia. ‘Abo ‘u lagwena, ‘u da lagwena: ta ‘abo nigea ‘u lagwena, ga ‘u da eonegu, be ia da mwaratoni: nigea wate ‘e bweu ‘i da lagwena tauio tuga; ta ‘abo‘agu murimuia. Ta ‘i ona, Ia da lagwena.

⁵ Ga Boasa ‘i gwae, Asiata nina tanoa ‘u lagwena Naomi nimanega, wate ‘u da lagwena Ruta kena Moaba ‘enega, to mwawasa mwanena, be ‘enega to mwawasa ‘ana esana ‘u da gietooro ‘ina ‘egu‘eguia ‘enaia.

⁶ Ta bu‘una nina ‘i gwae, Nigea kapekapeana ia da lagwena manugu taugu, nai taugu ‘igu ‘egu‘eguia ia da gieto‘umaliena: ‘oio ‘igu ‘ebelagwa ‘u da ‘au‘ewa ‘emuia; nigea kapekapeana ia da lagwena ta ‘enega.

⁷ Gete ‘ana bubuna tuta lowa Iseraela ‘enaia lagwa manuna ta sa‘ugelasa manuna, be ‘enega iage iauiauna si da pa‘ara; tai ‘ana ‘aeiapaiapa ‘i gimonina, ta gosiana ‘ena i ‘ebwa‘ena: ta gete ona‘upa‘upa ‘ana bubuna Iseraela ‘enaia.

⁸ ‘Enega bu‘una nina Boasa ‘ena ‘i gwae, ‘U da lagwena manuio tauio. Ta ‘ana ‘aeiapaiapa ‘i gimonina.

⁹ Ta Boasa ‘inapwanao ‘edia ‘i gwae, ta tomota iauiauna ‘edia, ‘Omi to‐‘itao batua, ‘abo‘agu ni‘atu Elimeleka ‘ina iage maibo‘ana ia lagwena, ta Kiliona be Malona ‘idi iage maibo‘ana, Naomi nimanega.

¹⁰ Wate Ruta kena Moaba, Malona mwanena, ni‘atu ia lagwena be ‘i mwanegu, be ‘enega to mwawasa ‘ana esana ia da gietooro ‘ina ‘egu‘eguia ‘enaia, be ‘enega to mwawasa ‘ana esana gea‘abo si da ‘upwa‘upwaiaule tasinao ‘ediega, ta ‘ina ‘asa ‘ana ‘eberuguiega: ‘omi to‐‘itao batua.

¹¹ Ta tomota iauiaudi ‘eberugu ‘ena si miami, ta ‘inapwanao, si ‘ona, ‘Abo‘ama to‐‘itao. Waine nina ‘imu anua ‘ena ‘i mai Ieoba ‘i da bubuna be ‘i da nadigega Rakela ta nadigega Lea, siterua Iseraela ‘ina anua si ‘abina: ta ‘Eparata ‘ena ‘u da bubu ‘ai‘aila, ta Beteleema ‘ena ‘areio si da nono:

¹² ta ‘imu anua ‘i da nadigega Peresa ‘ina anua, tauna Tamara ‘i enatunena Iuda ‘enaia, waine megoamana gete ‘enega Ieoba tubumuao ‘i da ‘ebwaemu ‘ediega.

¹³ Ga Boasa Ruta i ‘au‘ewena, ta tauna mwanena; ta ‘ena ‘i rugu, ta Ieoba ‘i tagwara ga i ‘euwana, ta natuna me‘olotona ‘i enatunena.

¹⁴ Ta iine Naomi si eonena, Ieoba ta da ‘awabobo‘anena, Tauna nigea ‘i pilisinemu be nigea ‘imu bu‘unamo, ta ‘ana esana ‘arena si da nonona Iseraela ‘enaia.

¹⁵ Ta tauna iawasio ‘i da sa‘u, ta tuta u ‘e waine sinabwa ‘enega ‘i da lemeio: lawaio, tauna ‘i obobomemu, tauna wate ‘emuia ‘i bobo‘ana ta ‘abo natumuao me‘olotodi ‘e sebeni nigea si bobo‘ana ‘emuia, tauna ni‘atu ‘i enatunena ta ‘enega.

¹⁶ Ta Naomi goama i ‘au‘ewena, ta lumalumana ‘ena ‘i sa‘una, ta i ‘amwamwena.

¹⁷ Ta iine nidi gosenao si eesena, si gwae, Naomi ‘ena natuna me‘olotona ‘i tubua; ta si eesena Obeda: tauna Iese tamana, tauna Dabida tamana.

¹⁸ Ta gete Peresa ‘ina susu: Peresa Esirona ‘i enatunena;

¹⁹ ta Esirona Rama ‘i enatunena, ta Rama Aminadaba ‘i enatunena;

²⁰ ta Aminadaba Naasona ‘i enatunena, ta Naasona Salimona ‘i enatunena;

²¹ ta Salimona Boasa ‘i enatunena, ta Boasa Obeda ‘i enatunena;

²² ta Obeda Iese ‘i enatunena, ta Iese Dabida ‘i enatunena.