Ruta 3 - Buki Tabu Lowaenei 1919

‘UPWA 3.

¹ Ta Naomi lawana ‘i eonena, Natugu, gea‘abo nai ‘ebeeiawai‘ata ia da ‘ebesa manuio, be ‘enega ‘u da mia bobo‘ana?

² Ta gete ‘ida bu‘una Boasa nigea nai ‘i miami, tauna ‘ina gomagweineao ma‘emwao wa miamiana? U ‘ita, boiboi gete sea‐‘ebesapi ‘ena baali ‘i louweuwenunu.

³ ‘Enega ‘u da esiwe, ta ‘u da oroa, ta ‘u da ‘oama, ta sea‐‘ebesapi ‘ena ‘u da mwa‘uta: ta gea‘abo ‘u emanini ‘itaeio tai nina ‘enaia, ga ni‘atu ‘i da ‘e‘ai ta ‘i da numa bemi.

⁴ Ta gete ‘i da apwesa, ‘ena i ‘eno‘eno, sena nina ‘ena i ‘eno‘eno ‘u da ‘ita‘i‘isi, ta ‘u da rugu, ta ‘aena ‘ana bwasa ‘u da gisuwena, ta ‘u da ‘eno; ta ‘emuia ‘i da ona to‘ase ‘u da guinua.

⁵ Ta ‘i eonena, Iage iauna ‘u gwaegwae ia da guinua.

⁶ Ta sea‐‘ebesapi ‘ena ‘i mwa‘uta, ta iage iauiauna lawana ‘i eonena nadigega ‘i guinua.

⁷ Ta ni‘atu Boasa i ‘e‘ai ta ‘i numa, ta ‘atena ‘i guausoara, ga baali masiwana debanaia i ‘eno‘eno: ta ma‘anuaena ‘i mai, ta ‘aena ‘adi bwasa ‘i gisuwena, ta i ‘eno.

⁸ Ta niuniuwanaia gete ‘i apwesa, tai nina i ‘atesa‘ara, ta i ‘eno‘enosakosakowasi: ta, wa ‘ita, waine ‘e bweuna ‘aenaia i ‘eno‘eno.

⁹ Ta ‘i gwae, Iaita ‘oio? Ta waine ‘i ona limana, ‘Abo‘agu Ruta ‘imu ‘ari‘ei: ‘enega ‘imu ‘ari‘ei ‘u da bwasena ‘imu bwasega; ‘oio ‘igu bu‘una ‘ai‘aila ta ‘enega.

¹⁰ Ta ‘i gwae, Natugu, Ieoba ‘i da obobomeio: muria ‘imu nua‘ole‘ole ‘u e‘ita sinabwa wawasae nugana ‘enaia, tubuau nigea ‘u muriedi ta ‘enega, nai gomagomabesodi nai esaesadi.

¹¹ Ta gete, natugu, gea‘abo ‘u matauta; iage iauna ‘u gwaegwae ‘emuia ia da guinua: ‘igu susu maibo‘ana si sinapuna ‘aene ‘oio waine nua‐‘esasena.

¹² Ta ‘ai‘aila ‘abo‘agu ‘imu bu‘una: ta wate ‘e bweu ‘imu bu‘una wawasae ‘i miami.

¹³ Boiboi gete ‘u da miami, ta gonagonaia gete ‘i da apwesa, ‘abo bu‘una ‘ana bubuna ‘i da guinua ‘emuia, bobo‘ana; bu‘una ‘ana bubuna ‘emuia ‘i da guinua: ta ‘abo bu‘una ‘ana bubuna nigea ‘i guiguinue ‘emuia, ga ‘abo‘agu bu‘una ‘ana bubuna ‘emuia ia da guinue, nadigega Ieoba ‘i miami: ‘u da ‘eno be gonagonaia.

¹⁴ Ta ‘aenaia i ‘eno ga gonagonaia: ta ‘i tooro ‘ena maguguioininaia. ‘I gwae ta ‘enega, Gea‘abo ‘e bweu ‘i mwaramwaratoni waine nina ‘i mai sea‐‘ebesapi ‘enaia.

¹⁵ Ta ‘i gwae, Taraapwara ‘emuia ‘i miamiana ‘u da me‘e, ta ‘u giiai; ta ‘i giiaina: ta baali makeigana ‘e sikisi ‘i siwena, ta i ‘ebwaena: ta ‘asaia ‘i apwesa.

¹⁶ Ta ni‘atu lawana ‘ena ‘i mai, ga ‘i gwae, Natugu, mwa‘adega ‘oio? Ta iage iauna tai nina ‘ena ‘i guinua ‘ena ‘i simana.

¹⁷ Ta ‘i gwae, Baali makeigana ‘e sikisi getedi i ‘ebwaegu; ‘i gwae ta ‘enega, Gea‘abo lawaio‐ ‘ena ‘u tautauia ma‘animenimemumo.

¹⁸ Ga ‘i ona, ‘U da mia baula, natugu, ga iage nina ‘ina apwesa ‘u da ‘itena: tai nina gea‘abo ‘i da miami, ga iage nina ‘i da losaroni batua.