Ruta 2 - Buki Tabu Lowaenei 1919

‘UPWA 2.

¹ Ta Naomi mwanena ‘ina buuna ‘e bweuna, tai waiwai ta esaesa, Elimeleka ‘ina susu ‘enega; ta ‘ana esana Boasa.

² Ta Ruta kena Moaba Naomi ‘ena ‘i ona, ‘U da tagwaregu be baguraia ia da tauia, ta tauna matanaia nua‘ole‘ole ia da loba murinaia atuna gamwagamwanega ia da lo‘ela‘elaga. Ta ‘i eonena, Natugu, ‘U da tauia.

³ Ta ‘i tauia, ta ‘i mai ta to sesoi muridia baguraia ‘i lo‘ela‘elagana: ta Boasa ‘ina bagura ‘ana esena ‘i lobena, tauna Elimeleka ‘ina susu ‘enega.

⁴ Ta, wa ‘ita, Boasa ‘i mai Beteleemega, ta to sesoi ‘edia ‘i gwae, Ieoba ma‘emi wa da miami. Ta ‘ena si ona limana, Ieoba ‘i da ona obobomeio.

⁵ Ga Boasa ‘ina to‐guinua tauna to‐sesoi ‘adi to‘ita‘i‘ita ‘ena ‘i ona, Iaita gete ‘ina gomagweine?

⁶ Ta to‐guinua to‐sesoi ‘adi to‘ita‘i‘ita ‘i ona limana ta ‘i gwae, Tauna gomagweine Moaba tauna Naomi ma‘ieana si ‘ilama ‘asa Moaba ‘enega:

⁷ Ta waine nina ‘i gwae, Ia sideio, ‘u da tagwaregu be ia da lo‘ela‘elaga, ta to sesoi muridia bwagila gamwagamwanidia ia da egogone: ta ‘enega ‘i mai, ta gonegonega ga tuta gete ‘i guinua ‘ataia ta tuta gidarina tuga anuaia ‘i miami.

⁸ Ga Boasa Ruta ‘ena ‘i gwae, Natugu, nigea nai ‘u nonona? Gea‘abo mari bagura ‘ena ‘u da tauia sabi lo‘ela‘elagana, nai gete ‘enega ‘u da taona, ta ‘igu gomagweineao serabedia ‘u da miami.

⁹ Bagura si sesoni ‘ena ‘u da dune‐dune, ta ‘u da murimuriedi: nigea nai tubuau ia emataruedi ‘aene gea‘abo si da giiaiio? ta ‘ena tonaaio ‘i iaiapasa, ‘ebego ‘edia ‘u da tauia, ta boasi ni‘atu tubuau si gonina ‘enega ‘u da numa.

¹⁰ Ga waine ‘i be‘u sana mwa‘uta, ta bare‘uia i kopukopu, ta ‘i eonena, To‘ase manuna u ‘atenua‘ole‘oleiegu, ta ‘enega manugu ‘u eona, ‘abo‘agu to‘u‘umara ta ‘enega?

¹¹ Ta Boasa ‘i ona limana ta ‘ena ‘i gwae, ‘Imu bubuna iauna lawaio ‘ena tuta ‘enega mwaneio ‘i mwawasa ga batua, ni‘atu ‘eguia si e‘ita ‘ai‘ailina: ta ‘aene tamaio be sinaio ni‘atu ‘u pilisinedi, ta ‘imu ‘asa ‘imu ‘ebetubua, ta tomota lowa nigea ‘u mwaramwaratonidi ‘edia ‘u mai.

¹² Ieoba ‘imu guinua ‘i da e‘isa, ta tamapu ‘ai‘aila Ieoba, Iseraela ‘ina Eaubada, ‘i da ‘ebwaemu, tauna papena ‘edia ‘u mai sabi mia iauiaukwaia.

¹³ Ga waine ‘i gwae, ‘Igu ‘inapwana, matamuia nua‘ole‘ole ia da loba; ‘u gieguausoarigu ta ‘enega, ta ‘imu gomagweine ‘ena ‘u ona nua‘ole‘ole, ta ‘abo‘agu nigea ‘imu gomagweine ‘e bweuna ‘atua.

¹⁴ Ta ‘e‘ai ‘ana tuta ga Boasa ‘i eonena, ‘U da mai gete ‘ena, ta masura ‘enega ‘u da ‘e‘ai, ta ‘imu tomwana boasi maiuiu ‘ena ‘u da sa‘u. Ta to sesoi deidia ‘i miatoa: ta baali mesomesona si ‘ebwaena, ta i ‘e‘ai, ta sawesawenaia, ta aina ‘i sa‘una.

¹⁵ Ta ni‘atu ‘i tooro sabi lo‘ela‘elagana, ga Boasa ‘ina tubuau ‘i eonedi, ‘i gwae, Bwagila gamwagamwanidia ‘i da lo‘ela‘elagana ta gea‘abo wa ba‘eba‘e.

¹⁶ Ta wate aina bwagilega wa da lisi manuna, ta wa da pilisinena, ta ‘i da lo‘ela‘elagani, ta gea‘abo wa ba‘eba‘e.

¹⁷ Ga ‘i lo‘ela‘elagana baguraia ga asuinuanua; ta iage ‘i lo‘ela‘elaganina ‘i sabutuna, ta ‘ana ‘etopwapwa baali epa ‘e bweuna.

¹⁸ Ta i ‘ewena, ta ‘asaia ‘i tauia: ta iage ‘i lo‘ela‘elaganina lawana i ‘itena: ta ‘i me‘ena ta ni‘atu sawesawenaia ga tupwana i ‘ebwaena.

¹⁹ Ta lawana ‘i eonena, Mwa‘o ‘u lo‘ela‘elaga etamona? ta mwa‘o ‘u guinua? tauna manuio ‘i eona si da onaobobomena. Ta tauna ma‘ieana si guiguinua lawana ‘ena ‘i simanena, ta ‘i gwae, Tai ma‘ieagu ‘a guiguinua etamona ‘ana esana Boasa.

²⁰ Ta Naomi lawana ‘ena ‘i ona, Ieoba ‘i da ona‐obobomena, tauna ‘ina nua‘ole‘ole to bobo‘adi ta to‐mwawasa ‘edia nigea ‘i da losa‘u. Ta Naomi ‘i eonena, Tai nina ‘ida susu serabedaia, ‘ida bu‘una ‘e bweuna.

²¹ Ta Ruta kena Moaba ‘i gwae, Tamo, ‘i eonegu, ‘Igu tubuau serabedia ‘u da miami, ga ‘igu sesoi si da loegumwarina.

²² Ta Naomi Ruta lawana ‘ena ‘i ona, Natugu, ‘i bobo‘ana, ‘ina gomagweineao ma‘edi ‘u da tauia, ta gea‘abo wate mari bagura ‘ena si da lobemu.

²³ Ta ‘enega Boasa ‘ina gomagweineao serabedia ‘i miami be ‘i lo‘ela‘elaga ga sesoi baali ta sesoi witi ‘adi ‘ebelosaroni; ta lawana ma‘ieana si miami.