Ruta 1 - Buki Tabu Lowaenei 1919

‘UPWA 1.

¹ Ta tuta nidi toloinao si loina ga gete ‘i apwesa, ‘asa ‘i botana. Ta tai ‘e bweuna goma Beteleema‐Iuda ‘i tauia be ‘asa Moaba ‘ena ‘i da miami, tauna be, mwanena be, natunao me‘olotodi ‘e rua be.

² Ta tai nina ‘ana esana Elimeleka, ta mwanena ‘ana esana Naomi, ta natunao ‘e rua ‘adi esana Malona ta Kiliona, goma Eparata me Beteleema‐Iuda. Ta ‘asa Moaba ‘ena si mai, ta ‘ena si mia ‘ataia.

³ Ta Elimeleka Naomi mwanena ‘i mwawasa; ta me wainena ‘i miami, ta natunao nidi ‘e rua.

⁴ Ta mwanediao si ‘au‘ewedi iine Moaba ‘ediega; ‘ebweuna ‘ana esana Opa, ta ‘e ruena ‘ana esana Ruta: ta nada si miami ga iakwara ‘e teni.

⁵ Ta Malona ta Kiliona si mwawasa ruarua; ta waine nina natunao ‘e rua ta mwanena si pilisinena.

⁶ Ga ‘i tooro lawanao ma‘enao, ‘aene ‘asa Moabega ‘i da ‘ila: ‘asa Moaba ‘ena ‘i nonona ta ‘enega ‘aene Ieoba ‘ina tomota i ‘atenua‘ole‘oleiedi, masura i ‘ebwa‘edi.

⁷ Ta esena nina ‘ena ‘i miami ‘enega ‘i tauiawa, ta lawanao ‘e rua ma‘enao; ta ‘edega si tautauia ‘aene ‘asa Iuda ‘ena si da ‘ila.

⁸ Ta Naomi lawanao ‘e rua ‘edia ‘i gwae, Wa da tauia, ‘e bweuna ‘e bweuna ‘u da ‘ila sinana ‘ina anuaia: Ieoba ‘i da ‘atenua‘ole‘oleiemi, na‘ieana ‘imi guinua to mwawasa ‘edia, ta ‘eguia.

⁹ Ieoba ‘i da tagwara be wa da eiawai‘ata, ‘e bweuna ‘e bweuna mwanena ‘ina anuaia. Ga ‘i ‘awamuidi; ta ‘enadi sinabwanega si dedoi.

¹⁰ Ta ‘ena si ona, Gea‘abo, ta ma‘ieaio ta da ‘ila ‘imu susu ‘edia.

¹¹ Ta Naomi ‘i gwae, Wa da ‘ila limana, natuguao: to‘ase manuna ma‘eguao ta da tauia? ‘aene natuguao me‘olotodi wate gamwagu ‘enaia, be ‘enega si da mwanemiao?

¹² Wa da ‘ila limana, natuguao, wa da tauia; ‘abo‘agu ‘agu tuta ni‘atu ‘i dudura ta nigea wate mwanegu ia da ‘au‘ewa. ‘Abo ia da ona, Ma‘igu nuaiaina, ‘abo boiboi gete mwanegu ia da ‘au‘ewa, ta wate natuguao me‘olotodi ia da enatunedi;

¹³ ‘Enega wa da iamwaiamwana be si da sinabwa? ‘enega wa da miami ta gea‘abo mwanemiao wa da ‘au‘au‘ewadi? gea‘abo, natuguao; ‘ategu ‘i dedoi wawasae manumi, Ieoba nimana ‘i apwesa ‘eguia ta ‘enega.

¹⁴ Ta ‘enadi sinabwanega si dedoi limana: ta Opa lawana i ‘awamuina; ta Ruta ‘i giiaina.

¹⁵ Ta ‘i gwae, U ‘ita, tasio i ‘ila‘ila ‘ina susu ‘edia, ta ‘ina eaubada ‘enaia: ‘oio tasio murinega ‘u da ‘ila.

¹⁶ Ta Ruta ‘i gwae, Gea‘abo ‘u da eonegu ‘aene ia da pilisineio, ta ‘aene ia da ‘ila ta gea‘abo ia murimurieio: ‘ena ‘u da tauia, ia da tauia ta ‘enega; ta ‘ena ‘u da ‘eno ‘ena ia da ‘eno: ‘imu susu ‘igu susu, ta ‘imu Eaubada ‘igu Eaubada:

¹⁷ ‘ena ‘u da mwawasa, ia da mwawasa, ta ‘ena si da sa‘ugu: Ieoba nadigega ‘eguia ‘i da guinua, ta wate sinabwana, ‘abo ‘e bweu iage i ‘upweda oio ta ‘abo‘agu, mwawasa, namo esia.

¹⁸ Ta ni‘atu i ‘itena ‘aene nua‘ai‘ailina ‘aene ma‘ieana si da tauia, ga ‘i losa‘u ta nigea ‘ena ‘i onaona.

¹⁹ Ta ‘enega siterua si tauia ga Beteleema ‘ena si apwesa. Ta gete ‘i apwesa, ni‘atu Beteleema ‘ena si mai, ga ‘asa maibo‘ana ‘i loniu manudi, ta iine si gwae, Gete Naomi nai?

²⁰ Ta ‘i eonedi, Gea‘abo wa eesegu Naomi, (Dibidibi), wa da eesegu Mara, (Darere): Toewaiwaisana ‘i guinua darere ‘eguia ta ‘enega.

²¹ Ia apwesa maa, ta Ieoba ‘i me‘e limegu ‘asaia kakaegu: to‘ase manuna wa eesegu Naomi, Ieoba i ‘awato‘umaliegu ta ‘enega, ta Toewaiwaisana ‘i giedeededonigu?

²² Ta ‘enega Naomi i ‘ilama, ta Ruta kena Moaba, lawana, ma‘ieana, tauna ‘asa Moaba ‘enega i ‘ilama: ta Beteleema ‘ena si apwesa sesoi baali ‘ana nugana.