Nugana 47 - Buki Tabu Lowaenei 1919

‘UPWA 47.

¹ Ga Iosepa ‘i rugu ta Parao ‘ena ‘i simana, ta ‘i gwae, Tamagu ta tasiguao, ‘idi sipi iau be, ‘idi bulomakau iau be, ‘idi iage iauiauna be, ni‘atu si apwesama ‘asa Kananiega; ta, u ‘ita, ‘asa Gosena ‘ena si miami.

² Ta tasinao ‘ediega tai ‘e nima i ‘au‘ewedi, ta Parao ‘ena i ‘ebwaea‘edi.

³ Ta Parao ‘i ona tasinao ‘edia, To‘ase ‘imi guinua? Ta si ona Parao ‘enaia, ‘Imi toguinuao to‘ita‘i‘isi sipi, ‘abo‘ama ta tamamao ruarua.

⁴ Ta si ona Parao ‘enaia, Sabi mia ‘asa gete ‘ena ‘a mai; ‘imu toguinuao ‘idi sipiao nigea ‘adi pwaturamo ta ‘enega; botana ‘i to sinabwa sana ‘asa Kanania ‘enaia ta ‘enega: ‘enega gete tuga, ‘a sideio, ‘imu toguinuao ‘u da tagwaredi be ‘asa Gosena ‘ena si da miami.

⁵ Ta Parao ‘i ona Iosepa ‘enaia, ‘i gwae, Tamaio ta tasimuao ni‘atu si mai ‘emuia:

⁶ ‘asa Aigupito matamuia; ‘asa ‘ana bobo‘ana wawasae ‘ena ‘u da loina be tamaio ta tasimuao ‘ena si da miami; ‘asa Gosena ‘ena si da miami: ta ‘abo tai waiwaidi ‘u mwaratoni ‘edia, ga ‘u da aseiedi be si da ‘etoloinao ‘igu bulomakau ‘edia.

⁷ Ta Iosepa tamana Iakobo ‘i me‘ena, ta Parao matanaia ‘i sa‘una: ta Iakobo ‘i onaoboboma Parao ‘enaia.

⁸ Ta Parao ‘i ona Iakobo ‘enaia, Iawasio ‘ana iakwarao ‘adi asiata eisa?

⁹ Ta Iakobo ‘i ona Parao ‘enaia, ‘Igu mia dadana ‘ana iakwarao ‘adi asiata iakwara e wan anaredi ta tati: iawasigu ‘ana iakwarao ‘adi ‘asiatao pu‘epu‘edi ta to‘umalidi, ta tamaguao iawasidi ‘adi iakwarao ‘adi ‘asiatao ‘idi mia dadana ‘adi asiata ‘edia, nigea ‘edia si apweapwesa.

¹⁰ Ta Iakobo ‘i onaoboboma Parao ‘enaia, ta Parao matanega ‘i apwesa.

¹¹ Ta Iosepa tamana ta tasinao ‘i sa‘udi, ta ‘e bweu esena i ‘ebwaedi ‘asa Aigupito ‘enaia, ‘asa ‘ana bobo‘ana wawasae ‘enaia, Ramese ‘ina ‘asa ‘enaia, na‘ieana Parao ‘i ona.

¹² Ta Iosepa tamana be, tasinao be, tamana ‘ina susu maibo‘ana be, ‘i e‘enidi palauega nadigega ‘idi gogama gidaridi ‘adi iau.

¹³ Ta palaua nigea ‘asa maibo‘ana ‘enaia; botana tosinabwasana ta ‘enega, ta ‘enega ‘asa Aigupito ta ‘asa Kanania si mwawamwawasa botana nina leleana.

¹⁴ Ta Iosepa mani iauiauna si lobena ‘asa Aigupito ‘enaia, ta ‘asa Kanania ‘enaia, ‘i egogonena witi si gimwagimwaneiena manuna: ta Iosepa mani ‘i me‘ena Parao ‘ina anua ‘enaia.

¹⁵ Ta ni‘atu mani ‘asa Aigupito ‘ena, ta ‘asa Kanania ‘ena si loegumwaridi, ga me Aigupito iauiaudi si mai Iosepa ‘ena, ta si gwae, Palaua ‘u da ‘ebwaema: to‘ase manuna ‘a da mwawasa matamuia? ‘ima mani ‘i gumwara ta ‘enega.

¹⁶ Ta Iosepa ‘i ona, ‘Imi bulomakau wa da ‘ebwaegu, ta ia da ‘ebwaemi bulomakau manudi, ‘abo ‘imi mani ‘i gumwara.

¹⁷ Ta ‘idi bulomakau si me‘edi Iosepa ‘enaia: ta Iosepa palaua i ‘ebwaedi ose ‘adi sa‘ugelasa manuna, sipi iau be, bulomakau iau be, aseao be: ta palauega ‘i e‘enidi ‘idi lagolagowao ‘adi sa‘ugelasa iakwara gote manuna.

¹⁸ Ta ni‘atu iakwara gote ‘i gumwara, ga ‘ena si mai iakwara ‘e ruena, ta ‘ena si ona, ‘Igu ‘inapwana ‘enega gea‘abo ‘a da sa‘usa‘u kwaia, ‘ima mani ni‘atu iauiauna ‘i gumwara; ta ‘ima lagolagowa iau ni‘atu ‘igu inapwana ‘ina iage; nigea wate ‘e bweu iage ‘i tupwatupwa ‘igu ‘inapwana matanaia, bwaramamo, ta ‘ima bwa‘a:

¹⁹ to‘ase manuna ‘a da mwawasa matamuia, ‘abo‘ama ta ‘ima bwa‘a ruarua? ‘abo‘ama ta ‘ima bwa‘a ‘u da gimwanema palaua manuna, ta ‘abo‘ama ta ‘ima bwa‘a ‘a da ‘e toguinuao Parao ‘enaia: ta ewana ‘u da ‘ebwaema, be ‘enega ‘a da bobo‘ana, ta gea‘abo ‘a da mwawamwawasa, ta ‘asa gea‘abo ‘i da waborebore.

²⁰ Ga Iosepa Aigupito ‘ina bwa‘a maibo‘ana ‘i gimwanena Parao manuna; me Aigupito tai ‘e bweuna ‘e bweuna ‘ina tanoa ‘i gimwanena ta ‘enega, botana ‘i tosinabwasana ‘edia ta ‘enega: ta bwa‘a Parao ‘ina bwa‘a.

²¹ Ta tomota manudi, ‘i tauiedi ‘asa ‘edia Aigupito ‘ana raba ‘ana ‘ebepilisa‘u ‘e bweuna ‘enega, ga ‘ina ‘ebepilisa‘u mariesenaia wate.

²² Totaria ‘idi bwa‘anamo nigea ‘i lagwalagwa: to taria nidi ma‘idi tomwana Parao ‘enega, ta ‘idi tomwana tauna Parao i ‘ebwa‘ebwaedi ta si e‘a; ta ‘enega nigea ‘idi bwa‘a si da gimwagimwaneiei.

²³ Ga Iosepa ‘i ona tomota ‘edia, Wa ‘ita, batua omi ta ‘imi bwa‘a ia lagwemi Parao manuna: u ‘ita, gete ‘imi ewana, ta bwa‘a wa da dauni.

²⁴ Ta sesoi ‘enega gete ‘i da apwesa, ‘upwa ‘e nimana wa da ‘ebwaea Parao ‘enaia, ta ‘upwa ‘e ata si da ‘imi iage, tanoa ‘ana ewana manuna, ta ‘ami masura manuna, ta ‘imi anua ‘ina tomianao manudi, ta masura ‘imi gogama gidaridi manuna.

²⁵ Ta si gwae, Iawasima u ‘etoseedi: ‘igu ‘inapwana matanaia nua‘ole‘ole ‘a lobena, ta ‘a da ‘e Parao ‘ina toguinuao.

²⁶ Ta Iosepa loina ‘i bubuna Aigupito ‘ina bwa‘a manuna ga batua, ‘aene Parao ‘upwa ‘e nimana ‘i da ‘ewai; totaria dimo ‘idi bwa‘a tebweudi nigea Parao ‘ina bwa‘a.

²⁷ Ta Iseraela ‘asa Aigupito ‘ena si miami, ‘asa Gosena ‘enaia; ta ‘idi esena ‘ena si lobena, ta si uaua, ta si sinabwa wawasae.

²⁸ Ta Iakobo ‘asa Aigupito ‘ena ‘i miami ga iakwara ‘e sebenitini: ga Iakobo ‘ana asiatao, iawasina ‘ana iakwarao, ‘e wan anaredi ta poti ta sebeni.

²⁹ Ta tuta ‘i abe be Iseraela ‘i mwamwawasa: ta natuna Iosepa ‘i bwauiena, ta ‘i ona ‘enaia, ‘Abo nua‘ole‘ole ia lobena matamuia, ia sideio nimaio ‘u da sa‘u bwadagagu ‘agaraunaia, ta ‘u da bubuna nu‘ole‘ole ta ‘aiaila ‘eguia; ia sideio, gea‘abo ‘u sa‘usa‘ugu Aigupito ‘enaia:

³⁰ ta ‘ena ia ‘eno‘eno matubuguao, Aigupitoega ‘u da ‘a‘arigu, ta ‘adi ‘ari‘ari ‘ena ‘u da sa‘ugu. Ta ‘i gwae, Ia da guinua nadigega ‘u onaona.

³¹ Ta ‘i ona, ‘Eguia ‘u da ona‘upa‘upa: ta ‘i ona‘upa‘upa ‘enaia. Ta Iseraela ‘i bwagobwago ‘ebe‘eno debana ‘enaia.