Nugana 42 - Buki Tabu Lowaenei 1919

‘UPWA 42.

¹ Ta Iakobo i ‘itena ‘aene witi Aigupito ‘ena ‘i miami, ta Iakobo ‘i ona natunao me‘olotodi ‘edia, To‘ase manuna wa edunedune ‘e bweuna ‘e bweuna ‘enaia?

² Ta ‘i ona, Wa ‘ita, ni‘atu ia nonona ‘aene witi Aigupito ‘ena ‘i miami: ‘ena wa da mwa‘uta, ta gote ‘enega wa da gimwani manuda; be ‘enega ta da bobo‘ana, ta gea‘abo ta da mwawamwawasa.

³ Ta Iosepa tasinao ‘e sanau si mwa‘uta sabi gimwani masura Aigupito ‘enega.

⁴ Ta Beniamina, Iosepa tasina, Iakobo nigea i ‘etunena tasinao ma‘edi; ‘i gwae ta ‘enega, ‘Abona nai to‘umalina ‘i ununa.

⁵ Ta Iseraela natunao si mai sabi gimwani taudi si mai ma‘ediao: botana ‘asa Kanania ‘ena ‘i miami ta ‘enega.

⁶ Ta Iosepa ‘asa ‘ana to‐loina; tauna ‘i gimwagimwane ‘asa ‘ina tomota iauiauna ‘edia: ta Iosepa tasinao si mai, ta ‘ena si bwagobwago sanamwa‘uta bare‘uia.

⁷ Ta Iosepa tasinao i ‘itedi, ta ‘i mwaratonidi, ta ‘i eto‘u‘umara ‘edia, ta ‘edia ‘i ona gamwagamwasoara; ta ‘i eonedi, Mwa‘adega wa mai? Ta si ona, ‘Asa Kananiega sabi gimwani masura.

⁸ Ta Iosepa tasinao ‘i mwaratonidi, ta taudi nigea si mwaramwaratonina.

⁹ Ta Iosepa madawara nidi manudi ‘i madawara ‘i nua‘i‘isidi, ta ‘edia ‘i ona, ‘Omi to‐iausa; ‘asa ‘ina kakae sabi ‘itena wa mai.

¹⁰ Ta ‘ena si ona, Nigea, ‘igu ‘inapwana, sabi gimwani masura ‘imu toguinuao si mai.

¹¹ ‘Abo‘ama iauiauma tai ‘e bweuna natunao; ‘abo‘ama tai bubuna ‘ai‘aila, ‘imu toguinuao nigea to‐iausa.

¹² Ta ‘i ona ‘edia, Nigea, ta ‘asa ‘ina kakae sabi ‘itena wa mai.

¹³ Ta si ona, ‘Abo‘ama ‘imu to‐guinuao matasimao ‘e twelu, tai ‘e bweuna ‘asa Kanania ‘enaia natunao; ta, u ‘ita, me goamana batua tamama ma‘ieana, ta ‘e bweuna nigea.

¹⁴ Ta Iosepa ‘i ona ‘edia, Tauna iage nina ‘emia ia ona, ia gwae, ‘Omi to‐iausa:

¹⁵ gete ‘enega ia da toomi: Parao iawasina ‘enega gea‘abo gete ‘enega wa da tautauia, ‘abo tasimi me goamana gete ‘ena nigea ‘i memai.

¹⁶ ‘E bweu ‘emiega wa da etunena, ta tasimi ‘i da ‘au‘ewenama, ta wa da miami ioniionimi, be ‘enega ‘imi ona ia da toodi, nai ona ‘ai‘aila ‘emia ‘i miami: nai Parao iawasina ‘enega ‘omi toiausa ‘ai‘aila.

¹⁷ Ta asiata ‘e toi anua‐‘ebeiona ‘ena iauiaudi ‘i sa‘udi rererea.

¹⁸ Ta ‘asiata ‘e tonina Iosepa ‘edia ‘i ona, Gete wa da guinua, ta wa da bobo‘ana; Eaubada ia matautena ta ‘enega:

¹⁹ ‘abo ‘omi tai to bubuna ‘ai‘aila, tasimi ‘e bweuna ‘i da miami ioniionina ‘imi anua ‘ebeiona ‘enaia; ta ‘omi wa da tauia, ‘imi susuiao botanidi manuna witi wa da ‘a‘ara:

²⁰ ta tasimi me goamana ‘eguia wa da ‘au‘ewenama; ga ‘imi ona si da e ona ‘ai‘aila, ta gea‘abo wa da mwawamwawasa. Ta si guinua nadigega.

²¹ Ta si ona ‘e bweuna ‘e bweuna ‘enaia, ‘Abo‘ada ta to‘umali ‘ai‘aila tasidai manuna, iaruiaruana ‘ina elo‘uia ta ‘itena ta ‘enega, ‘ena ‘edaia ‘i sida, ta nigea ta da nonona; ta ‘enega elo‘uia gete ‘i apwesa ‘edaia.

²² Ta Rubena ‘edia ‘i onalimana, ‘i gwae, Nigea nai ‘emia ia onaona, ia gwae, Gea‘abo wa bubuna to‘umalina goama ‘enaia; ta nigea wa da nono? ‘enega wate, wa ‘ita, rarana ta ‘e‘isa.

²³ Ta nigea si mwaratoni ‘aene Iosepa ‘i nonodi; to gibuiona mwatuidi ‘i miami ta ‘enega.

²⁴ Ta ‘ediega ‘i sana‘ila, ta ‘i dedoi; ta i ‘ila ‘edia, ta ‘i ona ‘edia, ta Simeona ‘ediega i ‘au‘ewena, ta matadia ‘i ionina.

²⁵ Ga Iosepa ‘i ona be ‘idi ‘ebe‘a‘ara si da loemae witiega, ta tai ‘e bweuna ‘e bweuna ‘ina mani si da ‘ebwaea limana ‘ina baga ‘enaia, ta masura ‘eda manuna si da ‘ebwa‘edi: ta nadigega si guinua ‘edia.

²⁶ Ta ‘idi aseao si e‘a‘aridi ‘idi witiega, ta gote ‘enega si tauia.

²⁷ Ta ‘e bweuna ‘ediega ‘ina baga ‘i gigegena be ‘ina ase masura ‘i da ‘ebwae ‘idi anua ‘ebe‘eno ‘enaia, ga ‘ina mani i ‘itena; ta, wa ‘ita, ‘ina baga ‘awanaia ‘i miami.

²⁸ Ta tasinao ‘edia ‘i ona, ‘Igu mani si sa‘u limana; ta, wa ‘ita, ‘igu baga ‘ena ‘i miami: ta si ‘atesa‘ara, ta si sakowasi ‘e bweuna ‘e bweuna ‘enaia ma‘idi dedera si gwae, To‘ase gete Eaubada ‘i bubuna ‘edaia?

²⁹ Ta si mai tamadi Iakobo ‘ena ‘asa Kanania ‘enaia, ta iage iauiauna ‘edia si apweapwesa si ‘e simanena ‘enaia; si gwae,

³⁰ Tai nina, ‘asa ‘ana ‘inapwana, ‘i ona gamwagamwasoara ‘emaia, ta ‘aene ‘abo‘ama ‘asa ‘ana toiausa.

³¹ Ta ‘ena ‘a ona, ‘Abo‘ama tai bubuna ‘ai‘aila; ‘Abo‘ama nigea toiausa:

³² ‘abo‘ama matasimao ‘e twelu, tamama natunao me‘olotodi; ‘e bweuna nigea, ta megoamana batua tamana ma‘ieana ‘asa Kanania ‘enaia.

³³ Ta tai nina, ‘asa ‘ana ‘inapwana, ‘i ona ‘emaia, Gete ‘enega ia da mwaratoni ‘omi tai bubuna ‘ai‘aila; tasimi ‘e bweuna wa da pilisinena ‘eguia, ta ‘imi susuiao botanidi manuna wa da ‘ewa, ta wa da tauia:

³⁴ ta tasimi me goamana ‘eguia wa da ‘au‘ewenama: ga ia da mwaratoni ‘omi nigea toiausa, ta ‘omi tai bubuna ‘ai‘aila: ga tasimi ‘emia ia da ‘ebwaea, ta wa da egimwane ‘asa ‘enaia.

³⁵ Ta gete ‘i apwesa, ‘idi baga si ‘e asiwena, ga, wa ‘ita, tai ‘e bweuna ‘e bweuna ‘ina mani mabwagilina ‘ina baga ‘ena ‘i miami: ta ni‘atu taudi ta tamadi ‘idi mani mabwagilina si ‘itedi, ga si matauta.

³⁶ Ta tamadi Iakobo ‘edia ‘i ona, ‘Eguiega natuguao wa tauiedi: Iosepa nigea, ta Simeona nigea, ta Beniamina wa da ‘au‘ewena: iage iauiauna gete ‘eguia.

³⁷ Ta Rubena ‘i ona tamana ‘enaia, ‘i gwae, Natuguao me‘olotodi ‘e rua ‘u da unudi, ‘abo nigea ia me‘ena ‘emuia: nimaguia ‘u da ‘ebwaeaena, ta ia da ‘au‘ewa limenama ‘emuia.

³⁸ Ta ‘i ona, Natugu gea‘abo ‘i mwa‘umwa‘uta ma‘emi; tasina ‘i mwawasa ta ‘enega, ta tebweuna ‘i tupwa: ‘abo to‘umalina ‘i ununa ‘edega wa tautauia, ga uiauiagu segwasegwana wa da mwa‘utena ma‘ate‘uia‘uia ‘ari‘ari ‘enaia.