Nugana 4 - Buki Tabu Lowaenei 1919

‘UPWA 4.

¹ Ta tai Ebe mwanena ‘i mwaratonina; ta i ‘euwana, ta Kaina ‘i enatunena, ta ‘i gwae, Ni‘atu tai ia ‘ewena Ieoba ‘ina lemeiega.

² Ta wate tasina Abela ‘i enatunena. Ta Abela to‘ita‘i‘isi sipi, ta Kaina to gesoa bwa‘a.

³ Ta tuta iauna si gumwara ga gete ‘i apwesa, Kaina bwa‘a uanega ‘ebwaeadaita ‘i me‘ena Ieoba ‘enaia.

⁴ Ta Abela, tauna wate ‘ina sipiao ‘ediega tomatua ta iapa ‘i me‘edi. Ta Ieoba Abela ta ‘ina ‘ebwaeadaita ‘i nuanuana:

⁵ ta Kaina ta ‘ina ‘ebwaeadaita nigea nuanuana. Ta Kaina ‘i gamwasoara sinabwana, ta maninina ‘i tuegoegoa‘ena.

⁶ Ta Ieoba Kaina ‘ena ‘i ona, To‘ase manuna ‘u gamwasoara? ta to‘ase manuna maninio ‘i tuegoegoa?

⁷ ‘Abo ‘u guinua ‘ai‘aila nigea nai ia da nuanuana? Ta ‘abo nigea ‘u guinua ‘ai‘aila, bubuna to‘umalina ‘awa ‘ena i ‘enokwaia: ta ‘emuia ‘ana nuanuana, ta ‘ena ‘u da loina.

⁸ Ta Kaina Abela tasina ‘ena ‘i ona. Ta gete ‘i apwesa, ‘ena baguraia si miami, ga Kaina ‘i tooro tasina Abela ‘enaia, ta ‘i ununa.

⁹ Ta Ieoba Kaina ‘ena ‘i ona, Abela tasio mwa‘o? Ta ‘i ona, Nigea ia mwaramwaratoni: ‘abo‘agu tasigu ‘ana to‘ita‘i‘ita nai?

¹⁰ Ta ‘i ona, To‘ase ‘u guinua? tasio rarana ‘enana ‘eguia ‘i bwauma bwa‘a ‘enega.

¹¹ Ta gete tuga ni‘atu ‘u to‘umali bwa‘a ‘enega, tauna ‘awana ‘i ebarina sabi ‘ewa tasio rarana nimaioiega;

¹² ‘ena bwa‘a ‘u gesoa, gea‘abo gete ‘enega ta muriega ‘ina waiwai ‘i da tagwatagware ‘emuia; ‘oio ‘u da ‘e to dena ta to lopilidadana bare‘uia.

¹³ Ta Kaina Ieoba ‘ena ‘i ona, ‘Igu to‘umalina ‘ana e‘isa nigea kapekapeana ia da ‘a‘ari.

¹⁴ U ‘ita, batua bwa‘a matanega ‘u da pa‘igu; ta matamuiega ia da pili kwaikwaia; ta ‘abo‘agu ia da ‘e to dena ta to lopilidadana bare‘uia; ta gete ‘i da apwesa, tauna ‘i lobegu ‘i da unugu.

¹⁵ Ta Ieoba ‘i eonena, ‘Enega tauna Kaina ‘i ununa, e‘isa ‘e sebeni ‘i da loba. Ta Ieoba we‘iwe‘iiaia ‘i sa‘una Kaina manuna, abo ‘e bweu ‘i lobena ga ‘i da ununa.

¹⁶ Ta Kaina ‘i apwesa Ieoba matanega, ta ‘asa Noda ‘ena ‘i miami, Edena matanaia.

¹⁷ Ta Kaina mwanena ‘i mwaratoni; ta i ‘euwana, ta Enoka ‘i enatunena: ta ‘asa ‘i taraunena, ta ‘asa nina ‘i eesena Enoka, natuna ‘ana esana nadigega.

¹⁸ Ta Enoka ‘ena Irada ‘i tubua: ta Irada natuna Meuiaela: ta Meuiaela natuna Metusaela: ta Metusaela natuna Lameka.

¹⁹ Ta Lameka i ‘aserua: mwanena ‘e bweuna Ada, ta ‘e ruena Sila.

²⁰ Ta Ada Labala ‘i enatunena: tauna taudi anua‐naia ‘edia si miami, ta ma‘idi iobai tamadi.

²¹ Ta tasina ‘ana esana Iubala: to giapi ta to gibinobinoo iauiaudi tamadi.

²² Ta Sila, tauna wate Tubalakaina ‘i enatunena, tauna ‘ebedaba barasa be kainumu iauiauna ‘ana to bubuna: ta Tubalakaina nuuna Naama.

²³ Ta Lameka mwanenao ‘edia ‘i ona: Ada ta Sila, ‘enagu wa da nonona; Lameka mwanenao ‘omi, ‘igu ona wa da nono: Tai ‘e bweu ni‘atu ia ununa ta ‘enega ‘i unuunugu ta ‘enega, Ta tubuau ‘i bwarugu ta ‘enega:

²⁴ ‘Abo Kaina ‘ana e‘isa ‘e sebeni, ‘Ai‘aila Lameka ‘e sebeniti ta sebeni.

²⁵ Ta Adama mwanena ‘i mwaratoni limena; ta natuna me ‘olotona ‘i enatunena, ta ‘i eesena, Seta: ‘I gwae, ta ‘enega, Eaubada mari susu ‘eguia ‘i sa‘una Abela ‘ana lopa‘eru; Kaina ‘i ununa ta ‘enega.

²⁶ Ta Seta ‘ena, wate natuna me‘olotona ‘ena ‘i tubua; ta ‘i eesena Enosa: gote ‘enega tomota si enugana be Ieoba ‘ana esana ‘ena si da bwau.