Nugana 35 - Buki Tabu Lowaenei 1919

‘UPWA 35.

¹ Ta Eaubada ‘i ona Iakobo ‘enaia, ‘U da tooro, Betela ‘ena ‘u da tu‘e, ta ‘ena ‘u da miami: ta nada ‘ebetaria ‘u da ‘abina Eaubada ‘ena, tauna ‘emuia ‘i apwesa ‘ena ‘u denadena Esau tasio matanega.

² Ga Iakobo ‘i ona ‘ina anua ‘ana tomianao ‘edia, ta iauiaudi ma‘enao ‘edia, tokwarui dumadumadi ‘emia si miami wa da ‘ewa iauledi, ta wa da gie‘esasemi, ta ‘ami ‘oama wa da e‘otedi;

³ be ta da tooro, ta Betela ‘ena ta da tu‘e; ta ‘ena ‘ebetaria ia da ‘abi Eaubada ‘enaia, tauna ‘eguia ‘i onalimanama ‘igu dedoi ‘ina ‘asiata ‘enega, ta ‘edega ia tautauia tauna ma‘ieagu.

⁴ Ta tokwarui dumadumadi iauiaudi nimadiega, komwakomwa tenadiega be, Iakobo ‘ena si ‘ebwaea‘edi; ta Iakobo ‘i sa‘u kwaiedi keigwana ‘arenaia tauna Sekema deinaia.

⁵ Ta si tautauia: ta ‘asao si miasakowasiedi matauta sinabwana ‘edia ‘i miami, ta nigea si da pili Iakobo natunao me‘olotodi muridia.

⁶ Ta ‘enega Iakobo ‘i apwesa Lusa ‘enaia, tauna esena Kanania ‘ena ‘i miami (tauna Betela), tauna ta tomota iauiaudi ma‘enao si miami.

⁷ Ta ‘ena ‘ebetaria i ‘abina, ta esena nina ‘i eesena Elabetela: ‘ena Eaubada ‘i apwesa ‘enaia ta ‘enega, ‘ena tasina matanega ‘i denadena.

⁸ Ta Debora Rebeka ‘ana toleme ‘i mwawasa, ta si sa‘una Betela ‘ubunaia keigwana ‘agarauna: ta si eesena Alona‐Bakuta.

⁹ Ta Eaubada ‘i apwesa limana Iakobo ‘enaia, ‘ena Padanaramega ‘i mai, ta ‘i onaobobomena.

¹⁰ Ta Eaubada ‘i ona ‘enaia, ‘Amu esana Iakobo: gea‘abo wate ‘amu esana si da ‘ina‘inana Iakobo, ta ‘amu esana Iseraela: ta ‘i eesena Iseraela.

¹¹ Ta Eaubada ‘i ona ‘enaia, ‘Abo‘agu Eaubada Toewaiwaisana: ‘U da losiwa ta ‘u da susaila: ‘emuiega ‘ebeloina ta ‘ebeloina mabodadi si da apwesa, ta tolobwamuiega kiniao si da apwesa;

¹² ta ‘asa Aberaamo ta Isaako ia ‘ebwa‘ebwa‘edi, ‘emuia ia da ‘ebwaea‘ena, ta tubumuao murimuia ‘asa nina ia da ‘ebwaedi.

¹³ Ta Eaubada esena nina ‘ena ‘i onaona ‘enaia ‘i tu‘e Iakobo ‘enega.

¹⁴ Ta Iakobo esena nina ‘ena ‘i onaona ma‘ieana ‘ena ‘ora ‘i gietooro, ‘ora gurewa: ta ‘ebwaeadaita numanumana ‘i siwena ‘enaia, ta bunama ‘i siwena ‘enaia.

¹⁵ Ta Iakobo esena nina ‘ena Eaubada ‘i onaona ‘enaia, ‘i eesena Betela.

¹⁶ Ta Betelega si tautauia; ta Eparata nigea ‘ena si apweapwesa: ta Rakela ‘i edadama, ta ‘i enatuna pa‘ara.

¹⁷ Ta gete ‘i apwesa, ‘i enatuna pa‘ara, ga waine to etubua ‘i ona ‘enaia, Gea‘abo ‘u matamatauta; gete tuga wate ‘ebweu natuio me‘olotona ‘i tutubua.

¹⁸ Ta gete ‘i apwesa, iaruiaruana ‘i apweapwesa (‘i kwaia ta ‘enega), ga ‘i eesena Benoni: ta tamana ‘i eesena Beniamina.

¹⁹ Ta Rakela ‘i mwawasa, ta si sa‘una Eparata ‘ana ‘eda ‘enaia (tauna Beteleema).

²⁰ Ta Iakobo ‘ora ‘i gietooro ‘ana ‘ari‘ari ‘enaia: tauna Rakela ‘ana ‘ari‘ari ‘ana ‘Ora ga batua.

²¹ Ta Iseraela ‘i tautauia, ta Ederi ‘ina anua‘ebe‘ita‘i‘ita ta mariesenaia ‘ina anua i ‘abina.

²² Ta gete ‘i apwesa, tuta ‘enega Iseraela ‘asa gote ‘ena ‘i miami, ga Rubena ‘i tauia ta ‘i ‘eno Bila tamana mwanena ‘eia‘eiabarana ma‘ieana: ta Iseraela ‘i nonona. Ta Iakobo natunao me‘olotodi ‘e twelu.

²³ Lea natunao; Rubena, Iakobo ‘ina tomatua, Simeona ta, Lebi ta, Iuda ta, Isakara ta, Sebulona ta:

²⁴ Rakela natunao; Iosepa ta Beniamina:

²⁵ ta Bila, Rakela ‘ina toguinua mewainena, natunao; Dana ta Napatali:

²⁶ ta Silipa, Lea ‘ina toguinua mewainena, natunao; Gada ta Asera: getedi Iakobo natunao me‘olotodi, taudi ‘ena si tubua Padanarama ‘enaia.

²⁷ Ta Iakobo ‘i mai tamana Isaako ‘ena Mamire ‘enaia, Kiriata‐aba (tauna Eberona) ‘enaia, ‘ena Aberaamo ta Isaako si miami.

²⁸ Ta Isaako ‘ana tuta iakwara e wani anaredi ta tomo‘ata.

²⁹ Ta Isaako iaruiaruana ‘i apwesa, ta ‘i mwawasa, ta ‘ina tomota ‘edia ‘i egogona, ‘i e tai sinabwa ta ‘ana tuta ‘i dudura: ta natunao me‘olotodi Esau ta Iakobo si sa‘una.