Nugana 33 - Buki Tabu Lowaenei 1919

‘UPWA 33.

¹ Ta Iakobo i ‘ita tu‘e, ta ‘i dune, ta, wa ‘ita, Esau ‘i mema, ta ma‘enao tai ‘e poa anaredi. Ta gogama ‘i wearidi Lea ‘enaia, ta Rakela ‘enaia, ta toguinua mewainedi ‘e rua ‘edia.

² Ta toguinua mewainedi ‘e rua manatudiao ‘i sa‘u nuganedi, ga Lea ta natunao, ta Rakela ta Iosepa murinaia.

³ Ta tauna ‘i ataona nuganidia, ta ‘i bwagobwago bare‘uia ‘e sebeni, ga tasina ‘ena ‘i apwesa serabenaia.

⁴ Ta Esau ‘i pili sabi lobena, ta ‘i ‘atubwailina, ta otona ‘ena ‘i be‘u, ta i ‘awamuina: ta si ededoi.

⁵ Ta i ‘itatu‘e, ta iine be gogama i ‘itedi; ta ‘i ona, Iaisigei getedi ma‘emuao? Ta ‘i ona, Gogama taudi Eaubada ma‘ina nua‘ole‘ole ‘imu toguinua I ‘ebwaena.

⁶ Ga toguinua mewainedi si mai serabenaia, taudi ta natudiao, ta si bwagobwago.

⁷ Ta Lea wate ta natunao si mai serabenaia, ta si bwagobwago: ta muriega Iosepa ‘i mai serabenaia ta Rakela, ta si bwagobwago.

⁸ Ta ‘i ona, To‘ase ‘imu bubuna boda gete maibo‘ana ia lobena ‘enega? Ta ‘i ona, Sabi loba nua‘ole‘ole ‘igu ‘inapwana matanaia.

⁹ Ta Esau ‘i ona, ‘Igu iage ‘i sawesaweguia; tasigu, ‘imu iage tua tuga ‘imu iage.

¹⁰ Ta Iakobo ‘i gwae, Nigea, ia sideio, ‘abo gete tuga nua‘ole‘ole ni‘atu ia lobena matamuia, ga ‘igu ‘ebwaeadaita ‘u da ‘ewena nimaguiega; ni‘atu maniniio ia ‘itena ta ‘enega, ‘atua ‘e bweu Eaubada maninina i ‘itena, ta nuaio ‘i bobo‘ana manugu.

¹¹ Ia sideio, ‘igu ‘ebeoboboma ia me‘ena ‘emuia ‘u da ‘ewa; Eaubada ‘i bubuna nua‘ole‘ole ‘eguia ta ‘enega, ta ‘igu maibo‘ana ta ‘enega. Ta ‘ena ‘i gewanina, ga i ‘ewena.

¹² Ta ‘i ona, Ta da logara, be ta da tauia, ta ‘abo‘agu ia da nugana ‘emuia.

¹³ Ta ‘ena ‘i ona, ‘Igu ‘inapwana ‘i mwaratonina gogama tabadi, ta sipi iau be bulomakau iau esusudi: ta ‘abo asiata ‘e bweuna si tauia didigedi, iau maibo‘ana si da mwawasa.

¹⁴ Ia sideio, ‘igu ‘inapwana ‘i da ataona ‘ina toguinua matanaia: ta ia da muria manuaegu, lagolagowa nuganiguia ‘idi tauia nadigega ta gogama ‘idi tauia nadigega, ga ia da wai ‘igu ‘inapwana ‘ena Seira ‘enaia.

¹⁵ Ta Esau ‘i ona, Aina tomota ‘eguia si miamiana ia da pilisinedi ‘emuia. Ta ‘i ona, To‘ase manuna? nua‘ole‘ole ia da loba ‘igu ‘inapwana ‘enaia.

¹⁶ Ta ‘enega Esau ‘asiata gote i ‘ila Seira ‘ana ‘eda ‘enega.

¹⁷ Ta Iakobo ‘i tauia Sukota ‘enaia, ta anua i ‘abina, ta ioeioe i ‘abidi ‘ina lagolagowa manudi: ta ‘enega esena nina si eesena Sukota.

¹⁸ Ta Iakobo ‘asa Sekema ‘ena ‘i mai guguiega, tauna esena Kanania ‘ena ‘i miami, ‘ena ‘i mai Padanaramega; ta ‘asa matanaia i ‘abi anua.

¹⁹ Ta bwa‘a tomwana nina, ‘ena i ‘abi‘abi anua, ‘i lagwena, Sekema tamana, Amora natunao nimadiega, mani tomwana ‘e anaredi manuna.

²⁰ Ta nada ‘ebetaria i ‘abina, ta ‘i eesena Eleloe Iseraela.