Nugana 25 - Buki Tabu Lowaenei 1919

‘UPWA 25.

¹ Ta Aberaamo wate ‘e bweu waine ‘i aina, ta ‘ana esana Ketura.

² Ta waine nina Simarana ‘ena ‘i enatunena, Iokisana ta, Medana ta, Midiana ta, Isibaka ta, Sua ta.

³ Ta Iokisana natunao Seba, ta Dedana. Ta Dedana natunao Asurima ta, Letusima ta, Leumima ta.

⁴ Ta Midiana natunao; Epa ta, Eperi ta, Anoka ta, Abida ta, Elidaa ta. Iauiaudi getedi Ketura natunao.

⁵ Ta Aberaamo ‘ina iage iauiauna Isaako ‘ena i ‘ebwaeaena.

⁶ Ta mwanenao me gidaridi natudiao, taudi Aberaamo i ‘ewedi, Aberaamo ‘ebwaeadaita i ‘ebwa‘ebwaedi; ta natuna Isaako ‘enega i ‘etunediwa, ‘ena ‘i miami, bomatu ‘ena, ‘asa bomatu ‘enaia.

⁷ Ta getedi Aberaamo iawasina ‘ana iakwara ‘adi ‘asiata ‘ediega ‘i miami, iakwara ‘e wan anaredi ta sikisiti ta pipitini.

⁸ Ta Aberaamo iaruiaruana ‘i apwesa, ta iawasina dudurana ‘enega ‘i mwawasa, ‘ina‘inapwanina, ga sawesawenaia; ta ‘ina tomota ‘edia ‘i miaegogona.

⁹ Ta natunao Isaako ta Isimaela gaula Makipela ‘ena si sa‘una, Eperona Soaa goma Eta natuna ‘ina tanoa ‘enaia, tauna Mamire matanaia;

¹⁰ tauna tanoa nina Aberaamo ‘i lagwena Eta natunao ‘ediega: gote ‘ena Aberaamo si sa‘una, ta mwanena Sara.

¹¹ Ta Aberaamo ‘ina mwawasa murinaia, ga Eaubada natuna Isaako ‘i onaobobomena; ta Isaako ‘i miami Beeri‐laai‐roi ‘enaia.

¹² Ta getedi Isimaela ‘ina ‘ebetubua, Aberaamo natuna, tauna Agari kena Aigupito, Sara ‘ina toguinua me wainena, Aberaamo ‘ena ‘i enatunena:

¹³ ta getedi Isimaela natunao me‘olotodi ‘adi esana, ‘adi esanega, ‘idi ‘ebetubua ‘atua: Isimaela ‘ina tomatua, Nebaiota; Kedara ta, Adibeela ta, Mibisama ta.

¹⁴ Misima ta, Duma ta, Masa ta;

¹⁵ Adada ta, Tema ta, Ietura ta, Napisi ta, Kedema ta:

¹⁶ getedi Isimaela natunao, ta getedi ‘adi esana, ‘idi ‘asa ‘ediega, ta ‘idi ‘ebemia ‘ediega; ‘inapwanao ‘e twelu ‘idi ‘asa nadigega.

¹⁷ Ta getedi Isimaela iawasina ‘ana iakwarao, iakwara ‘e wan anaredi ta tati ta sebeni: ta iaruiaruana ‘i apwesa ta ‘i mwawasa; ta ‘ina tomota ‘edia ‘i miaegogona.

¹⁸ Ta Abilaega si miami ga Sura ‘enaia tauna Aigupito matanaia, na‘ieana ‘u tautauia ga Asiria ‘enaia: tasinao iauiaudi matadia ‘i miami.

¹⁹ Ta getedi Isaako, Aberaamo natuna, ‘ina ‘ebetubua: Aberaamo natuna Isaako:

²⁰ ta Isaako ‘ana iakwara ‘e poti ga Rebeka ‘i aina, tauna Betuela goma Siria me Padanarama natuna, Labana goma Siria nuuna.

²¹ Ta Isaako Ieoba ‘ena i ‘awanoi mwanena manuna, megagarina ta ‘enega: ta Ieoba ‘ina ‘awanoi ‘i nonona, ta mwanena Rebeka i ‘euwana.

²² Ta gogama si e‘upwa gamwanaia; ta ‘i gwae, ‘Abo bubuna nina, to‘ase manuna ‘abo‘agu nadigega? Ta ‘i tauia sabi eona Ieoba ‘enaia.

²³ Ta Ieoba ‘ena ‘i ona, Gamwamuia ‘asa ‘e rua ‘ena si miami, Ta diamuiega susu‐tomotai e rua si da weara tuga: Ta susu‐tomota ‘e bweuna si da ewaiwai susu ‘e ruena ‘enaia; Ta tomatua ‘i da guinua me goamana ‘ena.

²⁴ Ta ni‘atu ‘ina tuta be i ‘edadama saba, ga wa ‘ita, didiruarua gamwana ‘enaia.

²⁵ Ta ‘e bweu ‘i gimi apwesama bweabwearina, maibo‘ana ‘atua ‘oama manuaunuununa; ta si eesena Esau.

²⁶ Ta murinega tasina ‘i apwesama, ta nimanega Esau ‘ae‘edu‘edunaia i ‘abi; ta si eesena Iakobo: ta Isaako ‘ana iakwarao ‘e tomo toi ‘ena mwanena ‘i enatunedi.

²⁷ Ta gogama me‘olotodi nidi si sinabwa: ta Esau to tore ‘ai‘aila, tai goma mitawina; ta Iakobo tai manuaena, anua ‘edia ‘i miami.

²⁸ Ta Isaako Esau ‘i obobomena, ‘ina ‘e‘ai toreiega ‘enega i ‘e‘ai manuna: ta Rebeka Iakobo ‘i obobomena.

²⁹ Ta Iakobo lenitile i ‘eureni: ta Esau ‘i ruguma mitawega, ta ‘i emwaro‐mwarowa:

³⁰ Ta Esau Iakobo ‘ena ‘i ona, Ia sideio, ‘u da ‘e‘enigu lenitile bweabwearina tauna gote ‘enega; ia mwawamwawasa ta ‘enega: ta ‘enega si eesena Edoma.

³¹ Ta Iakobo ‘i gwae, ‘Imu tomatua batua ‘eguia ‘u da gimwaneie.

³² Ta Esau ‘i gwae, U ‘ita, ‘i abe ia mwamwawasa: ta tomatua nina to‘ase ‘ana bobo‘ana ‘eguia?

³³ Ta Iakobo ‘i gwae, Batua ‘eguia ‘u da ona‘upa‘upa; ta ‘i ona‘upa‘upa ‘enaia: ta ‘ina tomatua ‘i gimwaneiena Iakobo ‘enaia.

³⁴ Ta Iakobo palaua ta lenitile ‘eureni Esau ‘ena i ‘ebwaena; ta i ‘e‘ai ta ‘i numa, ta ‘i tooro, ta ‘i tauia: nadigega Esau ‘ina tomatua ‘i sinarina.