Nugana 24 - Buki Tabu Lowaenei 1919

‘UPWA 24.

¹ Ta Aberaamo ‘i etai sinabwana, iawasina ‘i dudura; ta Ieoba Aberaamo ‘i obobomena iage iauiauna ‘ediega.

² Ta Aberaamo ‘ina ‘ari‘ei, ‘ina anua ‘ana tonugana, tauna ‘ina iage iauiauna ‘i loinedi, ‘ena ‘i ona, Ia sideio, nimaio bwadagagu ‘agarauna ‘u da sa‘u:

³ ta ia da loinemu be ‘u da ona‘upa‘upa Ieoba ‘enega, garewa ‘ana Eaubada ta bare‘u ‘ana Eaubada, ‘aene gea‘abo natugu manuna mwanena ‘u da ‘au‘ewa me Kanania natudiao me wainedi ‘ediega, taudi ‘edia ia miami:

⁴ ta ‘igu ‘asa ‘ena ‘u da tauia, ta ‘igu bu‘unao ‘edia, ta natugu Isaako manuna mwanena ‘u da ‘au‘ewa.

⁵ Ta ‘ari‘ei nina ‘ena ‘i ona, Nai waine geanuana ‘i da muriegu ‘asa gete ‘enaia: natuio ia da ‘au‘ewa limena nai ‘asa ‘enega ‘u mai ‘enaia?

⁶ Ta Aberaamo ‘ena ‘i ona, U ‘ita‘i‘isi be gea‘abo natugu ‘ena ‘u da ‘au‘ewa limena.

⁷ Ieoba, garewa ‘ina Eaubada, tauna tamagu ‘ina anuega i ‘au‘ewegu, ta ‘asa ‘igu ‘ebetubua ‘enega, ta tauna ‘i eonegu, ta ‘eguia ‘i ona‘upa‘upa, ‘i gwae, Tubuio ‘ena ‘asa gete ia da ‘ebwaea; tauna ‘ina anelose ‘i da etunena matamuia, ta natugu manuna mwanena ‘u da ‘au‘ewa gote ‘enega.

⁸ Ta ‘abo waine geanuana ‘i da muriemu, ga ‘u da li‘ami ‘igu ona‘upa‘upa gete ‘enega; ta gete tuga gea‘abo natugu ‘ena ‘u da ‘au‘ewa limena.

⁹ Ta ‘ari‘ei nina ‘ina ‘inapwana Aberaamo bwadagana ‘agarauna nimana ‘ena ‘i sa‘una, ta iage gete manuna ‘ena ‘i ona‘upa‘upa.

¹⁰ Ta ‘ari‘ei nina kameli e sanau i ‘ewedi, ‘ina ‘inapwana ‘ina kameliao ‘ediega, ta ‘i tauia; ‘ina ‘inapwana ‘ina gwegwe iauna nimanaia; ta ‘i tooro, ta ‘i tauia Mesopotamia ‘enaia, Naora ‘ina ‘asa ‘enaia.

¹¹ Ta ‘asa etaulunaia wewerupwa deinaia tuta asuinuanua, tuta nina iine si apwesa sabi go boasi, kameli ‘i loinedi be ‘aedi si ‘etulasedi.

¹² Ta ‘i ona, Ieoba ie, ‘igu ‘inapwana Aberaamo ‘ina Eaubada, ia sideio, batua ‘u da loina be ‘eguia ‘i da apwesa ‘ai‘aila, ta nua‘ole‘ole ‘u da e‘ita ‘igu ‘inapwana Aberaamo ‘enaia.

¹³ U ‘ita, wewerupwa ununaia ‘ena ia tootooro; ta ‘asa ‘ina tai natudiao me wainedi si apwesama sabi go boasi:

¹⁴ ta ‘i da apwesa, ‘aene gomagweine ‘ena ia da ona, Ia sideio ‘imu ‘ebego ‘u da sa‘u mwa‘ute be ia da numa; ta ‘i da gwae, ‘U da numa, wate ‘imu kameliao ia da enumedi: tauna tuga ‘i da ‘e waine u ‘aseiena ni‘atu ‘imu to‐guinua Isaako manuna; ta ‘enega ia da mwaratoni ‘igu ‘inapwana nua‘ole‘ole ‘ena u e‘ita ni‘atu.

¹⁵ Ta gete ‘i apwesa, ‘ina ona nigea ‘i losaronina, ga, wa ‘ita, Rebeka ‘i apwesama, tauna ‘i tubua Betuela Milika natuna ‘enaia, tauna Milika Naora mwanena, tauna Naora Aberaamo tasina, ma ‘ina ‘ebego ‘aranaia.

¹⁶ Ta gomagweine nina sinebwaina, ta nuenueborana, ta nigea ‘e bweu tai ‘i mwaratonina ni‘atu: ta ‘i mwa‘uta wewerupwa ‘enaia, ta ‘ina ‘ebego ‘i loemaena ta ‘i tu‘ema.

¹⁷ Ta ‘ari‘ei nina ‘i pili sabi lobena, ta ‘i gwae, Ia sideio, ‘imu ‘ebegoiega boasi gidarina ‘u da ‘ebwaegu be ia da numa.

¹⁸ Ta waine ‘i ona, ‘U da numa, ‘igu ‘inapwana: ta ‘i lomanini, ta ‘ina ‘ebego ‘i sa‘u mwa‘utena nimanaia, ta ‘i enuma sabena.

¹⁹ Ta ni‘atu ‘i enumena saba, ga waine ‘i gwae, ‘Imu kameliao wate manudi ia da goni, ga si da numa e gumwara.

²⁰ Ta ‘i lomanini, ta ‘ina ‘ebegoiega ‘i siwena iobai ‘idi ‘ebenuma ‘enaia, ta ‘i pili limana wewerupwa ‘enaia sabi goi, ta ‘i gonina ‘ina kameli iauiauna manudi.

²¹ Ta tai nina ‘ena ‘i dunedune; ‘i enono, sabi ‘ita nai Ieoba ‘ina tauiama ‘i giebobo‘anena nai nigea.

²² Ta gete ‘i apwesa, kameli ni‘atu si numa saba, ga tai nina ubusuporoporo gola ‘i ‘ewa ‘ana mwau sekeli ‘ana ‘upwarua, ta nimakudekudena manuna nimapasapasa ‘e rua ‘adi mwau sekeli gola ‘e sanau;

²³ Ta ‘i gwae, Iaita natuna me wainena ‘oio? ‘u da eonegu, ia sideio. Tamaio ‘ina anuaia nai sawesawenaia ‘ena ‘a da ‘eno?

²⁴ Ta waine ‘ena ‘i ona, ‘Abo‘agu Betuela natuna tauna Milika natuna, tauna ‘i enatunena Naora ‘enaia.

²⁵ Wate waine ‘i eonena, Witi‐tolobwana ta masura ‘ai‘aila sawesawenaia ruarua si miami, ta anua ‘ebe‘eno.

²⁶ Ta tai ‘i bwagobwago, ta Ieoba ‘ena ‘i tapwaroro.

²⁷ Ta ‘i ona, Ieoba, ‘igu ‘inapwana Aberaamo ‘ina Eaubada, tauna ‘ina nua‘ole‘ole ta ‘ina ona ‘ai‘aila ‘igu ‘inapwana ‘enaia nigea ‘i e‘idi‘idia, ta da tupuna: ta ‘abo‘agu manuna, Ieoba ‘igu ‘inapwana tasinao ‘idi anua ‘ana ‘eda ‘ena ‘i nuganegu.

²⁸ Ta gomagweine ‘i pili, ta sinana ‘ina susu ‘ena ‘i simana ona getedi nadigega.

²⁹ Ta Rebeka nuuna ‘e bweuna, ta ‘ana esana Labana: ta Labana ‘i pili apwesa tai ‘ena, wewerupwa ‘enaia.

³⁰ Ta gete ‘i apwesa, ni‘atu ubusuporoporo giimweiina i ‘itena, ta nimapasapasa nidi nuuna nimanaia, ta ni‘atu nuuna Rebeka ‘ina ona ‘i nonona, ‘i gwae, Gete nadigega tai nina ‘eguia ‘i ona; ga tai ‘ena ‘i mai; ta, wa ‘ita, kameli deidia ‘i tooro wewerupwa ‘enaia.

³¹ Ta ‘i gwae, ‘U da ruguma, ‘oio Ieoba ‘ana obooboboma; to‘ase manuna ‘u tootooro etauluia? anua ni‘atu ia bubuna ta ‘enega, ta kameli ‘idi sena.

³² Ta tai anua ‘ena ‘i mai, ta kameli ‘i li‘amidi; ta witi‐tolobwana ta masura ‘ai‘aila i ‘ebwaedi kameli manudi, ta boasi be ‘aena ‘i da utui ta tai ma‘enao ‘aedi si da utudi.

³³ Ta masura matanaia si sa‘una be ‘i da ‘e‘ai: ta ‘i gwae, Gea‘abo ia da ‘e‘ai, ga ‘igu are ia da simana bemi. Ta ‘i gwae, ‘U da ona.

³⁴ Ta ‘i ona, ‘Abo‘agu Aberaamo ‘ina ‘ari‘ei.

³⁵ Ta Ieoba ni‘atu ‘igu ‘inapwana ‘i giebobo‘anena sinabwana; ta ni‘atu ‘i sinabwa: ta sipi iau ta bulomakau iau i ‘ebwaena ni‘atu, sileba ta gola be, toguinua me‘olotodi ta to‐guinua mewainedi be, kameliao ta aseiao be.

³⁶ Ta Sara ‘igu ‘inapwana mwanena natuna me‘olotona ‘igu ‘inapwana ‘ena ‘i enatunena ‘ena i ‘ewaine sinabwa: ta natunana ‘ena ‘ina iage iauiauna i ‘ebwaena.

³⁷ Ta ‘igu ‘inapwana ‘i loinegu be ia ona‘upa‘upa, ‘i ona, Gea‘abo natugu manuna mwanena ‘u da ‘au‘ewa me Kanania natudiao ‘ediega, taudi ‘idi ‘asa ‘ena ia miami:

³⁸ ta tamagu ‘ina anua ‘ena ‘u da tauia, ta ‘igu bu‘unao ‘edia, ta natugu manuna mwanena ‘u da ‘au‘ewa.

³⁹ Ta ‘igu ‘inapwana ‘ena ia ona, Nai waine gea‘abo ‘i da murimuriegu.

⁴⁰ Ta ‘eguia ‘i ona, Ieoba, tauna matanaia ia tauia, ‘ina anelose ‘i da etunena ma‘ieaio, ta ‘imu ‘eda ‘i da giebobo‘anena; ta natugu manuna mwanena ‘u da ‘au‘ewa ‘igu buunao ‘ediega, ta tamagu ‘ina anuega:

⁴¹ ga ‘igu ona‘upa‘upa ‘enega ‘u da li‘ami, ‘ena ‘igu bu‘unao ‘edia ‘u da apwesa; ta ‘abo nigea ‘emuia si ‘ebwaea‘ena, ‘igu ona‘upa‘upa ‘enega ‘u da li‘ami.

⁴² Ta etamona wewerupwa ‘ena ia mai, ta ia ona, Ieoba ie, ‘igu ‘inapwana Aberaamo ‘ina Eaubada, ‘abo gete tuga ‘igu ‘eda ‘enega ia tautauia ‘u da giebobo‘anei:

⁴³ u ‘ita, ia tooro wewerupwa ununa deinaia; ta ‘i da apwesa, ‘aene gomagweine ‘i apwesama sabi goi, tauna ena ia da ona, Ia sideio, ‘imu ‘ebegoiega boasi gidarina ‘u da ‘ebwaegu be ia da numa;

⁴⁴ ta ‘eguia ‘i da ona, Ruarua ‘Oio ‘u da numa, ta wate ‘imu kameliao manudi ia da goni: tauna ‘i da waine nina tauna Ieoba ni‘atu ‘i aseiena ‘igu ‘inapwana natuna manuna.

⁴⁵ Ta ‘ateguia nigea ia ona saroni, ga u ‘ita, Rebeka ‘i apwesama ma‘ina ‘ebegoi ‘aranaia; ta wewerupwa ‘ena ‘i mwa‘uta, ta‘i goi: ta ia eonena, Ia sideio, ia da numa.

⁴⁶ Ta ‘i lomanini, ta ‘ebegoi ‘aranega ‘i sa‘u mwa‘utena, ta ‘i ona, ‘U da numa, ta ‘imu kameliao wate ia da enumedi; ga ia numa, ta kameli wate ‘i enumedi.

⁴⁷ Ta ia eonena, ta ia gwae, Iaita natuna ‘oio? Ta ‘i gwae, Betuela natuna, tauna Naora natuna, tauna Milika ‘ena ‘i enatunena: ta ubusuporoporo ubusuna ‘ena ia sa‘una, ta nimapasapasa nimanaia.

⁴⁸ Ta ia bwagobwago, ta Ieoba ‘ena ia tapwaroro, ta Ieoba, ‘igu ‘inapwana Aberaamo ‘ina Eaubada, ia tupuna, tauna i ‘au‘ewegu ‘eda ‘ai‘aila ‘ena be ‘igu ‘inapwana tasina natuna me wainena ia ‘ewena natuna me‘olotona manuna.

⁴⁹ Ta gete tuga ‘abo ‘igu ‘inapwana ‘ena wa bubuna nua‘ole‘ole ta wa bubuna ‘ai‘aila, wa da eonegu; be ‘enega ataiguiega ia da ‘ila, nai gegeumiguiega.

⁵⁰ Ga Labana ta Betuela si onalimana ta si gwae, Iage gete Ieoba ‘enega ‘i apwesama: nigea kapekapeana to‘umalina nai bobo‘ana ‘a da ona‘emuia.

⁵¹ U ‘ita, Rebeka matamuia, ‘u da ‘ewena, ta ‘u da tauia, ta ‘i da ‘imu ‘inapwana natuna mwanena, na‘ieana Ieoba ni‘atu ‘i ona.

⁵² Ta gete ‘i apwesa, ga, ni‘atu Aberaamo ‘ina ‘ari‘ei ‘idi ona ‘i nonodi, ga ‘i bwagobwago bare‘uia Ieoba ‘enaia.

⁵³ Ta ‘ari‘ei nina oesi sileba be, oesi gola be, ‘oama be, ‘i me‘ena ta Rebeka i ‘ebwaena: wate gwegwe bobo‘ai‘ailidi nuuna ta sinana i ‘ebwaedi.

⁵⁴ Ta si ‘e‘ai ta si numa, tauna ta tai ma‘enao, ta si mia masari; ta gonagonaia si tooro, ta ‘i gwae, ‘Igu ‘inapwana ‘ena wa da ‘etunegu.

⁵⁵ Ta nuuna ta sinana si gwae, Gomagweine ‘i da miami ma‘ema ‘asiata ‘aina, e sanau tugai; muriega ‘i da tauia.

⁵⁶ Ta ‘i eonedi, Gea‘abo wa da ‘etobodegu, ‘igu ‘eda Ieoba ‘i giebobo‘anena ta ‘enega; wa da ‘etunegu be ‘igu ‘inapwana ‘ena ia da tauia.

⁵⁷ Ta si gwae, Gomagweine ‘a da bwauiena, ta ‘awanega ‘a da eonena.

⁵⁸ Ta Rebeka si bwauiena, ta si eonena, Tai gete ma‘ieaio wa da tauia? Ta ‘i gwae, Ia da tauia.

⁵⁹ Ta nuudi Rebeka si ‘etunena, ta ‘ana to leme, ta Aberaamo ‘ina ‘ari‘ei, ta ‘ina tai.

⁶⁰ Ta Rebeka si onaobobomena, ta si eonena, Nuumai, ‘u da ‘e teni tausana matausanao sinadi, ta tubumuao ‘adi tarauwarao ‘idi ‘eberugu si da ‘ewedi.

⁶¹ Ta Rebeka ‘i tooro, ta ‘ina gomagweineao, ta kameli ‘edia si geru, ta tai nina si muriena: ta ‘ari‘ei nina Rebeka i ‘ewena, ta ‘i tauia.

⁶² Ta Isaako Beeri‐laai‐roi ‘ana ‘edega ‘i mai; ‘asa Iarasi ‘ena ‘i miami ta ‘enega.

⁶³ Ta asuinuanuaia Isaako ‘i apwesa sabi nuanua tanoa ‘enaia: ta i ‘ita tu‘e, ta i ‘itena, ta, wa ‘ita, kameli ni‘atu si memai.

⁶⁴ Ta Rebeka i ‘ita tu‘e, ta ni‘atu Isaako i ‘itena, ga kameliega ‘i suia.

⁶⁵ Ta ‘ari‘ei ‘ena ‘i gwae, To tai gete tanoa ‘ena ‘i lopilidadana sabi lobeda? Ta ‘ari‘ei ‘i gwae, Tauna ‘igu ‘inapwana: ta maninina ‘ana bwasa i ‘ewena, ta i ‘aubodebodena tauna.

⁶⁶ Ta ‘ari‘ei Isaako ‘ena ‘i simana iage iauna ni‘atu ‘i guinuedi.

⁶⁷ Ta Isaako i me‘ena sinana Sara ‘ina anua ‘enaia, ta Rebeka i ‘au‘ewena, ta waine nina ‘i e mwanena; ta ‘i obobomena: ta Isaako nuana ‘i bobo‘ana sinana ‘ina mwawasa murinaia.