Nugana 20 - Buki Tabu Lowaenei 1919

‘UPWA 20.

¹ Ta Aberaamo gote ‘enega ‘i laga ‘asa Iarasi ‘enaia, ta Kadesa ta Sura gamwagamwanidia ‘i miami; ta Gerara ‘ena ‘i miami.

² Ta Aberaamo ‘i ona Sara mwanena manuna, Tauna Nuugu; ta Abimeleka Gerara ‘ana king, ‘i etune, ta Sara i ‘au‘ewena.

³ Ta Eaubada Abimeleka ‘ena ‘i mai boiboi ‘ana madawarega, ta ‘i eonena, U ‘ita, ‘oio ‘i abe ‘u e tomwawasa, waine nina u ‘au‘ewena manuna: tauna tai mwanena ta ‘enega.

⁴ Ta Abimeleka nigea ‘i mai serabenaia: ta ‘i gwae, Ieoba, ‘asa bubuna paruparu ‘u da ununa nai?

⁵ Tauna nigea nai ‘eguia ‘i ona, Tauna nuugu? ta waine, tauna wate ‘i gwae, Tauna nuugu: ‘ategu ‘ina nuanua ‘ai‘aila ta nimagu ‘idi ‘esasena ‘enega iage gete ni‘atu ia guinuei.

⁶ Ta Eaubada madawara nina ‘enega ‘i eonena, Tamo, ia mwaratoni ‘ateio ‘ina nuanua ‘ai‘aila ‘enega iage gete ni‘atu ‘u guinuei, ta ‘abo‘agu wate ia egagaremu be gea‘abo ‘u da bubuna to‘umali ‘eguia: ta ‘enega nigea ia tagwaremu be ‘u da gitoona.

⁷ Gete ‘enega tai mwanena ‘u da ‘ilena; tauna paropita ta ‘enega, ta manuio ‘i da ‘awanoi, ta ‘u da bobo‘ana: ta ‘abo nigea u ‘ilena, ‘u da mwaratoni ‘oio ‘u da mwawasa ‘ai‘aila, ‘oio, ta iauiaudi ‘imu tomota.

⁸ Ta Abimeleka i ‘unuboi, ta ‘ina toguinuao ‘i bwauiedi, ta iage iauiauna getedi tenadi ‘edia ‘i ona: ta tai nidi si matauta sinabwana.

⁹ Ga Abimeleka Aberaamo ‘i bwauiena, ta ‘i eonena, To‘ase ‘u guinua ‘emaia? ta mane ‘enega ia bubuna to‘umali ‘emuia, ta ‘enega ‘eguia ta ‘igu ‘ebeloina ‘ena bubuna to‘umalina sinabwana ‘u me‘ena? bubuna nigea sawesawemuia ‘u da guinua ‘eguia ni‘atu ‘u guinuena.

¹⁰ Ta Abimeleka Aberaamo ‘ena ‘i ona, To‘ase u ‘itena, ta ‘enega iage gete ‘u guinuena?

¹¹ Ta Aberaamo ‘i gwae, Ia nuena ta ‘enega, ‘Ai‘aila Eaubada matausina nigea esena gete ‘enaia; ta mwanegu manuna si da loemwawasigu.

¹² Ta wate tauna ‘ai‘aila nuugu, tamagu natuna, ta nigea sinagu natuna; ta tauna ‘agu to ai:

¹³ ta gete ‘i apwesa, ‘ena Eaubada ‘i loinegu be tamagu ‘ina anua ia da pilisinena, ga ia eonena, Gete ‘imu nua‘ole‘ole ‘u da e‘ita ‘eguia; esena ‘e bweuna ‘e bweuna ‘ena ta da apwesa, manugu ‘u da gwae, Tauna nuugu.

¹⁴ Ta Abimeleka sipi ta bulomakau i ‘ewedi, ta toguinua me‘olotodi ta toguinua mewainedi, ta Aberaamo ‘ena i ‘ebwaea‘edi, ta mwanena Sara ‘ena i ‘ilena.

¹⁵ Ta Abimeleka ‘i ona, U ‘ita, ‘igu bwa‘a matamuia: ‘ena ‘i bobo‘ana ‘emuia, ‘ena ‘u da miami.

¹⁶ Ta Sara ‘ena ‘i ona, U ‘ita, Nuuio ‘ena sileba tomwana ‘e wani tausana ‘ena ia ‘ebwaea: u ‘ita, gete manuio iauiaudi ma‘emuao wa miami matadi ‘adi bwasa; ta iauiaudi matadia ni‘atu ‘u paruparu.

¹⁷ Ta Aberaamo Eaubada ‘ena i ‘awanoi: ta Eaubada Abimeleka ‘i giebobo‘anena, mwanena be, ‘ina toguinua mewainediao be; ta si enatuna.

¹⁸ Ieoba Abimeleka ‘ina anua ‘ana tomianao gamwadi ni‘atu ‘i giepa‘ara ta ‘enega, Sara Aberaamo mwanena manuna.