Nugana 18 - Buki Tabu Lowaenei 1919

‘UPWA 18.

¹ Ta Mamire ‘ina Keigwanao deinaia Ieoba ‘i apwesa ‘enaia, anua ‘awanaia ‘i miatoa asiata iaiiai ‘enega;

² ta i ‘itatu‘e ta ‘i dune, ta, wa ‘ita, tai ‘e toi deinaia si tootooro: ta ni‘atu i ‘itedi, ga anua ‘awanega ‘i pili ga ‘i lobedi, ta bare‘u ‘ena ‘i bwagobwago,

³ ta ‘i gwae, ‘Igu ‘inapwana, ‘abo gete matamuia ia bobo‘ana, ia sideio, gea‘abo ‘u da ‘ataona ‘imu ‘ari‘ei ‘enega:

⁴ boasi gidarina gete tuga si da me‘ei, ta ‘aemi wa da ‘utui, ta kaiwe ‘agaraunaia wa da eiawai‘ata;

⁵ ta palaua tomwatomwana ia da me‘ei, ta ‘atemi wa da loepa‘ari; muriega wa da tauia: ‘imu ‘ari‘ei ‘ena wa mai ta ‘enega. Ta si gwae, Na‘ieana ‘u ona, na‘ieana ‘u da guinua.

⁶ Ta Aberaamo ‘i lomanini Sara ‘ena anua ‘enaia, ta ‘i gwae, Palaua bobo‘ai‘ailina keiga ‘e toi ‘u da ‘ewa manini, ‘u da ‘einisi, ta ‘u da gabu dedea.

⁷ Ta Aberaamo ‘i pili lagolagowa ‘edia, ta bulomakau menonoiana nuana ta bobo‘ana ‘i me‘ena, ta toguinua i ‘ebwaena; ta ‘i guinua manimaninina.

⁸ Ta bata i ‘ewena, ta susu, ta bulomakau menonoiana ni‘atu ‘i guinuena, ta matadia ‘i sa‘una; ta deidia ‘i tootooro kaiwe ‘agaraunaia, ta si ‘e‘ai.

⁹ Ta si eonena, Mane Sara mwaneio? Ta ‘i gwae, Wa ‘itanao, anuaia.

¹⁰ Ta ‘i ona, Ni‘atu tuta ‘i apwesama ga ‘emuia ia da ‘ila ‘ai‘ailama; ta, u ‘ita, Sara mwaneio natuna me‘olotona ‘i da enatunena. Ta Sara anua ‘awanaia, tauna ‘i mia muria, ga ‘i nonona.

¹¹ Ta Aberaamo ta Sara iawasidi dudurana, ‘adi tuta ni‘atu ‘i dudurana; iine ‘idi bubuna ni‘atu ‘i gumwara Sara ‘enaia.

¹² Ta Sara ‘atenaia ‘i edagi, ‘i gwae, Ni‘atu iawasigu ‘i dudurana ga ia da guausoara, ‘igu ‘inapwana wate iawasina ‘i dudura?

¹³ Ta Ieoba Aberaamo ‘ena ‘i ona, To‘ase manuna Sara ‘i edagi, ‘i gwae, ‘Ai‘aila nai ‘abo‘agu goama ia da enatunena, ‘aboagu iawasigu ‘i dudura?

¹⁴ ‘E bweu iage ‘i mwauwawasae Ieoba ‘enaia? Tuta ‘ai‘aila ‘enega ‘emuia ia da ‘ilama, ‘ena tuta ‘i apwesama, ta Sara natuna me‘olotona ‘i da enatunena.

¹⁵ Ga Sara ‘i eiaseiase, ‘i gwae, Nigea ia edaedagi; ‘i matauta ta ‘enega. Ta ‘i gwae, Nigea; ta ‘u edagi.

¹⁶ Ta tai nidi gote ‘enega si tooro, ta Sodoma ‘ena si ‘ita: ta Aberaamo ‘i tauia ma‘edi be ‘edega ‘i da ‘asa‘udi.

¹⁷ Ta Ieoba ‘i ona, Iage ia guinua Aberaamo ‘enega ia da sa‘u kwaia;

¹⁸ ta ‘ai‘aila Aberaamo ‘i da e ‘asa sinabwana ta waiwai, ta bare‘u ‘ina ‘asa iauiaudi ‘ena si da mia bobo‘ana?

¹⁹ Ia mwaratonina ta ‘enega, be ‘enega natunao ta ‘ina susu murinaia ‘i da loinedi, be Ieoba ‘ina ‘eda si da ‘ita‘i‘isi, be bubuna ‘ai‘aila ta loina si da guinuei; be ‘enega Ieoba iage Aberaamo manuna ‘i gwae Aberaamo ‘ena ‘i da me‘ena.

²⁰ Ta Ieoba ‘i gwae, Sodoma ta Gomora ‘idi bwau sinabwana ta ‘enega, ta ‘idi bubuna to‘umalina ‘i mwau ta ‘enega;

²¹ ga ia da mwa‘uta gete ‘enega, ta ia da ‘ita nai ni‘atu si guinua maibo‘ana nadigega ‘ina bwau, tauna ‘eguia ‘i mai; ta ‘abo nigea, ia da mwaratoni.

²² Ta tai nidi gote ‘enega si sana‘ila, ta Sodoma ‘ena si tauia: ta Aberaamo Ieoba matanaia ‘i tootooro.

²³ Ta Aberaamo serabenaia ‘i doro, ta ‘i gwae, Taudi ‘idi bubuna ‘i paruparuna ‘u da gabudi to to‘umalidi ma‘ediao?

²⁴ Nai ‘e pipiti ‘idi bubuna ‘i paruparuna ‘asa ‘ena si miami: esena nina ‘u da gabuna ta gea‘abo nai ‘u da ‘atenua‘ole‘oleiena site pipiti ‘idi bubuna ‘i paruparu manudi?

²⁵ Gete bubuna nina ‘emuiega ‘i da mia ‘edasora, ‘aene taudi ‘idi bubuna ‘i paruparu to to‘umalidi ma‘edi ‘u da unudi, be ‘enega taudi ‘idi bubuna ‘i paruparu si da nadigega to to‘umalidi; gote ‘emuiega ‘i da mia ‘edasora: bare‘u maibo‘ana ‘ana To Loina gea‘abo nai ‘i da guinua ‘ai‘aila?

²⁶ Ta Ieoba ‘i gwae, ‘Abo Sodoma ‘ena ‘asa gamwanaia taudi ‘idi bubuna ‘i paruparu ‘e pipiti ia lobedi, esena maibo‘ana ia da ‘atenua‘ole‘oleiena leleadi.

²⁷ Ta Aberaamo ‘i ona limana ta ‘i gwae, Gete ‘enega ‘u da ‘ita, ‘Abo‘agu nedila ta karikau, taugu ia gewagewana ta Ieoba ‘ena ia ona;

²⁸ nai taudi ‘idi bubuna ‘i paruparu ‘e pipiti ‘ediega ‘e paibe nigea: ‘asa maibo‘ana ‘u da loesaoori ‘abo site paibe nigea? Ta ‘i gwae, Gea‘abo ia loesaoori, ‘abo ‘e poti‐paibe ‘ena ia lobena.

²⁹ Ta wate ‘ena ‘i ona limana, ta ‘i gwae, Nai ‘e poti ‘ena ‘u da loba. Ta ‘i ona, Gea‘abo ia da guiguinue site poti manudi.

³⁰ Ta ‘i ona, Ieoba gea‘abo ‘i da gamwasoara, ta ia da ona: nai ‘e tati ‘ena ‘u da loba. Ta ‘i ona, Gea‘abo ia da guiguinue, ‘abo ‘e tati ‘ena ia lobedi.

³¹ Ta ‘i ona, Gete ‘enega u ‘ita, Taugu ia gewagewana be Ieoba ‘ena ia ona: nai ‘e tweniti ‘ena ‘u da lobedi. Ta ‘i gwae, Site tweniti manudi gea‘abo ia da loesaoori.

³² Ta ‘i ona, Ieoba gea‘abo ‘i da gamwasoara, ta gete tuga ma‘ebweuna ia da ona: nai ‘e teni ‘ena ‘u da lobedi. Ta ‘i gwae, gea‘abo ia da loesaooridi site teni manudi.

³³ Ta Ieoba, ni‘atu ‘ina ona Aberaamo ma‘ieana ‘i losa‘u, ga ‘i tauia: ta Aberaamo ‘ina esena ‘ena i ‘ila.