Loina 9 - Buki Tabu Lowaenei 1919

‘UPWA 9.

¹ Ta asiata ‘e etanina ‘enega gete ‘i apwesa, Mose Aarona ta natunao ‘i bwauiedi, ta Iseraela ‘ina to‐nuganao;

² Ta Aarona ‘ena ‘i gwae, Bulomakau me‘olotona menonoiana ‘u da ‘ewa ‘emuia loegesi ‘ana ‘ebwaeadaita manuna, ta sipi me‘olotona ‘ebwaeadaita‐gabugabu manuna, nigea ma‘idi to‘umalinamo, ta Ieoba matanaia ‘u da ‘ebwaea‘edi.

³ Ta Iseraela tubunao ‘edia ‘u da gwae, ‘u da ona, Gota me‘olotona wa da ‘ewa ‘emia loegesi ‘ana ‘ebwaeadaita manuna; ta bulomakau menonoiana ta lami, ruarua ‘adi iakwara ‘e bweuna, nigea ma‘idi to‘umalinamo, ‘ebwaeadaita gabugabu manuna;

⁴ Ta bulomakau be sipi me‘olotona guguia ‘ana ‘ebwaeadaita manudi, sabi taria Ieoba matanaia; ta ‘ebwaeadaita rabia si ilienoenowena bunama ma‘ieana: batua Ieoba ‘i apwesa ‘emia ta ‘enega.

⁵ Ta tauna iage nina Mose ‘i ona si me‘ena anua‐‘ebeeloba matanaia: ta boda maibo‘ana si doro ta Ieoba matanaia si tooro.

⁶ Ta Mose ‘i gwae, Gete iage nina Ieoba ‘i ona wa da guinua; ta Ieoba ‘ina esaesa ‘emia ‘i da apwesa.

⁷ Ta Mose ‘i ona Aarona ‘enaia, ‘Ebetaria ‘ena wa doroma, ta ‘imu loegesi ‘ana ‘ebwaeadaita ‘u da ‘ebwaea, ta ‘imu ‘ebwaeadaita gabugabu, ta manuio ‘u da gienua‘ebweu, ta tomota manudi; ta tomota ‘idi ‘ebwaeadaita ‘u da ‘ebwaeae, ta manudi ‘u da gienua‘ebweu; na‘ieana Ieoba ‘i ona.

⁸ Ga Aarona ‘ebetaria ‘ena ‘i doro, ta loegesi ‘ana ‘ebwaeadaita bulomakauna menonoiana ‘i loemwawasina, tauna manuna.

⁹ Ta Aarona natunao rara si ‘ebwaena: ta nimamatagigina i ‘etomwa‘utena rara ‘enaia, ta ‘ebetaria kunanao ‘edia i ‘esa‘una, ta rara ‘i siwena ‘ebetaria ‘aenaia;

¹⁰ Ta iapa, ta nuakwaia, ta tana loegesi ‘ana ‘ebwaeadaita ‘atenega, ‘i gabuna ‘ebetaria ‘enaia; na‘ieana Ieoba ‘i ona Mose ‘enaia.

¹¹ Ta esio ta bwarana aweiega ‘i gabudi ‘asa ‘etaulunaia.

¹² Ta ‘ebwaeadaita gabugabu ‘i loemwawasina; ta Aarona natunao rara si ‘ebwaena, ta ‘i siwaroro dadana‘ena ‘ebetaria ‘enaia.

¹³ Ta ‘ebwaeadaita gabugabu si ‘ebwaena, tomwana ta tomwana, ta bulubuluna; ta ‘i gabudi ‘ebetaria ‘enaia.

¹⁴ Ta dia ta ‘aena i ‘utudi, ta ‘ebwaeadaita gabugabu ‘ena ‘i gabudi ‘ebetaria ‘enaia.

¹⁵ Ta tomota ‘idi ‘ebwaeadaita i ‘ebwaea‘ena, ta loegesi ‘ana ‘ebwaeadaita gotana i ‘ewena tauna tomota manudi, ta ‘i loemwawasina, ta loegesi manuna i ‘ebwaea‘ena, na‘ieana ‘e bweuna.

¹⁶ Ta ‘ebwaeadaita gabugabu ‘i sa‘una, ta i ‘ebwaea‘ena loina na‘ieana.

¹⁷ Ta ‘ebwaeadaita rabia ‘i sa‘una, ta ‘enega nimanega ‘i sapwarina, ga ‘i gabuna ‘ebetaria ‘enaia, gonagona ‘ana ‘ebwaeadaita gabugabu deinaia.

¹⁸ Wate bulomakau be sipi me‘olotona ‘i loemwawasidi, ‘ebwaeadaita guguia ‘adi taria, tauna tomota manudi: ta Aarona natunao rara si ‘ebwaena, ta ‘i siwaroro dadana‘ena ‘ebetaria ‘enaia,

¹⁹ Ta bulomakau iapana; ta sipi me‘olotona ‘enega, iuiuna iapana, ta tauna dia ‘i bodebodena, ta nuakwaia, ta ‘ate ‘ana tana;

²⁰ Ta iapa si sa‘u lumaluma ‘edia, ta iapa ‘i gabuna ‘ebetaria ‘enaia:

²¹ Ta lumaluma ta bwadaga ‘ataina Aarona ‘i louio‘edi ‘ebwaeadaita lo‘uio manuna Ieoba matanaia; na‘ieana Mose ‘i ona.

²² Ta Aarona nimana ‘i gilagasina tomota matadia, ta ‘i ona‐obobomedi; ta loegesi ‘ana ‘ebwaeadaita i ‘ebwaea‘ena, ‘ebwaeadaita gabugabu be, ‘ebwaeadaita guguia be, ga ‘i mwa‘utama.

²³ Ta Mose be Aarona anua ‘ebeeloba ‘ena si rugu, ta si apwesama, ta tomota si ona‐obobomedi: ta Ieoba ‘ina esaesa ‘i apwesa tomota iauiauna ‘edia.

²⁴ Ta Ieoba matanega awe sabelulu ‘i apwesama, ta ‘ebwaeadaita gabugabu be iapa i ‘ara‘arasidi ‘ebetaria ‘enaia; ta ni‘atu tomota iauiaudi si ‘itena, ga si bwau, ta si be‘u sanamwa‘uta.