Loina 8 - Buki Tabu Lowaenei 1919

‘UPWA 8.

¹ Ta Ieoba ‘i ona Mose ‘enaia, ‘i gwae,

² Aarona ta natunao ma‘enao ‘u da ‘au‘ewedi, ‘oama be, bunama orooroa be, loegesi ‘ana ‘ebwaeadaita bulomakauna be, sipi me‘olotodi ‘e rua be, palaua nigea malebeninamo makodona be;

³ Ta boda maibo‘ana ‘u da egogonedi anua ‘ebeeloba ‘ana ‘awa ‘enaia.

⁴ Ta Mose ‘i guinua na‘ieana Ieoba ‘ena ‘i onaona; ta boda si egogona anua ‘ebeeloba ‘ana ‘awaia.

⁵ Ta Mose ‘i ona boda ‘enaia, Gete iage nina Ieoba ‘i ona ta da guinua.

⁶ Ta Mose Aarona ta natunao ‘i me‘edi, ta boasiega i ‘utudi.

⁷ Ta kotuiega ‘i e‘otena, ta gadiwanega ‘i elogadiwanina, ta ‘oama duduranega i ‘oamena, ta tara‘apwara ‘ena ‘i sa‘una, ta tara‘apwara ‘ana ‘ebepaima ionaiona ‘ai‘ailina ‘enega ‘i paimina, ta ‘enega ‘i losipwena.

⁸ Ta ailumaluma ‘i sa‘una ‘enaia: ta ailumaluma Urima ta Tumima ‘ena ‘i sa‘udi.

⁹ Ta debanaia peaula ‘i sa‘una; ta peaula ‘enaia, matanaia, pelete gola ‘i sa‘una, peaula ‘esasena tabu; na‘ieana Ieoba ‘i ona Mose ‘enaia.

¹⁰ Ta Mose bunama orooroa i ‘ewena, ta tabenakele ‘i bweramina ta iage iauiauna ‘ena si miami, ta ‘i etabudi.

¹¹ Ta ‘enega ‘ebetaria ‘ena ‘i bwerama e sebeni, ta ‘ebetaria ta ‘ana gaebao iauiaudi ‘i ebweramidi, ‘ebe‘utu ta ‘aena be, be ‘i etabudi.

¹² Ta bunama orooroa ‘i siwena Aarona debanaia, ta ‘i eorona, be ‘i etabuna.

¹³ Ta Mose Aarona natunao ‘i me‘edi, ta kotu ‘ediega ‘i e‘oamedi, ta gadiwana ‘ediega ‘i elogadiwanidi, ta deba ‘ana ‘ebepaima ‘edia ‘i losipwena; na‘ieana Ieoba ‘i ona Mose ‘enaia.

¹⁴ Ta loegesi ‘ana ‘ebwaeadaita bulomakauna ‘i me‘ena: ta Aarona ta natunao nimadi si sa‘udi loegesi ‘ana ‘ebwaeadaita bulomakauna debanaia.

¹⁵ Ta ‘i loemwawasina; ta Mose rara i ‘ewena, ta ‘ebetaria kunanao ‘edia i ‘e sa‘u dadanena nimamatagiginega, ta ‘ebetaria ‘i gie‘esasena, ta rara ‘i siwena ‘ebetaria ‘aenaia, ta ‘i etabuiena, be ‘i gienua‘ebweu manuna.

¹⁶ Ta iapa maibo‘ana dia ‘enaia i ‘ewena, ta ‘ate ‘ana tana, ta nuakwaia ‘e rua, ta iapadi, ta Mose ‘i gabuna ‘ebetaria ‘enaia.

¹⁷ Ta bulomakau, bwarana be, esiona be, bi‘ina be, ‘i gabudi aweiega ‘asa etaulunaia; na‘ieana Ieoba ‘i ona Mose ‘enaia.

¹⁸ Ta ‘ebwaeadaita gabugabu sipina me‘olotona i ‘ebwaena: ta Aarona ta natunao nimadi si sa‘udi sipi me‘olotona debanaia.

¹⁹ Ta ‘i loemwawasina: ta Mose rara ‘i siwaroro dadanena ‘ebetaria ‘enaia.

²⁰ Ta sipi me‘olotona i ‘upwena matomwana; ta Mose bulubuluna, ta tomwanao, ta iapana ‘i gabudi.

²¹ Ta dia ta ‘aena i ‘utudi boasiega; ta Mose sipi me‘olotona maibo‘ana i gabuna ‘ebetaria ‘enaia: tauna ‘ebwaeadaita ‘ara‘arasina maina dibidibi manuna: tauna ‘ebwaeadaita si bubuna aweiega Ieoba ‘enaia; na‘ieana Ieoba ‘i ona Mose ‘enaia.

²² Ta sipi me‘olotona ‘e ruena i ‘ebwaea‘ena, tagwara‐‘ai‘aila sipina me‘olotona: ta Aarona ta natunao nimadi si sa‘udi sipi me‘olotona nina debanaia.

²³ Ta ‘i loemwawasina; ta Mose raranega i ‘ewena, ta Aarona tenana ‘ataina tupitupinaia ‘ena ‘i sa‘una, ta nima mataponina ‘ataina ‘enaia, ta ‘aemataponina ‘ataina ‘enaia.

²⁴ Ta Aarona natunao ‘i me‘edi, ta Mose raraega tena ‘ataidi tupitupinaia ‘ena ‘i sa‘una, ta nima‐mataponidi ‘ataidi ‘enaia, ta ‘aemataponidi ‘ataidi ‘enaia: ta Mose rara ‘i siwaroro dadanena ‘ebetaria ‘enaia.

²⁵ Ta iapa i ‘ewena, iuiuna iapana be, iapa maibo‘ana dia ‘ena ‘i miami be, ‘ate ‘ana tana be, nuakwaia ‘e rua be, iapadi be, bwadaga ‘ataina be:

²⁶ Ta palaua nigea malebeninamo makodona, tauna Ieoba matanaia ‘i miamiana, ‘enega keke nigea malebeninamo ‘e bweuna, keke palaua mabunamina ‘e bweuna ta, dedeana ‘e bweuna ta i ‘ewedi, ta iapa ‘ena ‘i sa‘udi, ta bwadaga ‘ataina ‘enaia:

²⁷ Ta maibo‘ana ‘i sa‘una Aarona nimanao ‘edia, ta natunao nimadi ‘edia, ta si lo‘uio‘edi ‘ebwaeadaita lo‘uio manuna Ieoba matanaia.

²⁸ Ta Mose nimadiega i ‘ewedi, ta ‘ebetaria ‘ena ‘i gabudi ‘ebwaeadaita ‘ara‘arasina ‘enaia: tauna tagwara‐‘ai‘aila maina dibidibi manuna: tauna ‘ebwaeadaita si bubuna aweiega Ieoba ‘enaia.

²⁹ Ta Mose lumaluma i ‘ewena, ta ‘i lo‘uio‘ena ‘ebwaeadaita lo‘uio manuna Ieoba matanaia: tauna Mose ‘ana ‘egu‘eguia tagwara‐‘ai‘aila sipina me‘olotona ‘enega: na‘ieana Ieoba ‘i ona Mose ‘enaia.

³⁰ Ta Mose bunama orooroa ‘enega i ‘ewena, ta rara ‘ebetaria ‘ena ‘i miamiana ‘enega, ta ‘i siwaroro‘ena Aarona ‘enaia, ‘ana ‘oama ‘edia be, natunao ‘edia be, natunao ‘adi ‘oama ‘edia be ma‘enao; ta Aarona ‘i etabuna, ‘ana ‘oamao, natunao be, natunao ‘adi ‘oama be ma‘enao.

³¹ Ta Mose ‘i ona Aarona ta natunao ‘edia, Esio wa da ‘e‘ureni anua ‘ebeeloba ‘ana ‘awa ‘enaia: ta nada ‘u da ‘enina ta palaua tagwara‐‘ai‘aila ‘ana kodo ‘ena ‘i miami, na‘ieana ia ona, ia gwae, Aarona ta natunao si da ‘enina.

³² Ta tauna ‘i tupwa esioega ta palauega wa da gabuna aweiega.

³³ Ta anua ‘ebeeloba ‘ana ‘awa gea‘abo ‘enega ‘u apweapwesa ga asiata ‘e sebeni, ga ‘imi tagwara‐‘ai‘aila ‘ana asiata si da gumwara: nimami ‘i da loemaa asiata ‘e sebeni ‘enega.

³⁴ Na‘ieana si guinua asiata gete, na‘ieana Ieoba ‘i ona ‘emia, be ‘i gienua‐‘ebweu manumi.

³⁵ Ta anua ‘ebeeloba ‘ana ‘awa ‘ena wa da miami asiata be boiboi ga asiata ‘e sebeni, ta Ieoba ‘ina ematarua wa da ‘ita‘i‘isi, be gea‘abo wa da mwawamwawasa: nadigega ‘i ona ‘eguia ta ‘enega.

³⁶ Ta Aarona ta natunao iage iauiauna Ieoba ‘i ona Mose nimanega ‘i guinuedi.