Loina 7 - Buki Tabu Lowaenei 1919

‘UPWA 7.

¹ Ta gete to‘umalina ‘ana ‘ebwaeadaita ‘ana loina: tauna ‘i etabu wawasae.

² Esena ‘ena ‘ebwaeadaita gabugabu si ununa ‘ena to‘umalina ‘ana ‘ebwaeadaita si da ununa; ta rarana ‘i da loseuseula dadane ‘ebetaria ‘enaia.

³ Ta ‘enega ‘i da ‘ebwaea iapana maibo‘ana; iuiuna iapana, ta iapa dia ‘i bodena,

⁴ Ta nuakwaia ‘e rua, ta iapa ‘edia ‘i miami, tauna asiana deinaia, ta tana ‘ate ‘enaia, nuakwaia ma‘edi, ‘i da ‘ewa iaulei:

⁵ Ta to‐taria ‘i da gabudi ‘ebetaria ‘enaia ‘ebwaeadaita manuna si bubuna aweiega Ieoba ‘enaia: tauna to‘umalina ‘ana ‘ebwaeadaita.

⁶ Me‘olotodi iaudi to‐taria ‘edia si da ‘e‘ani ‘enega: si da ‘enina esena tabu ‘enaia: tauna ‘i etabu wawasae.

⁷ Na‘ieana loegesi ‘ana ‘ebwaeadaita, na‘ieana to‘umalina ‘ana ‘ebwaeadaita: ‘e bweu loina manudi: to‐taria ‘i da gienua‘ebweu ‘enega, tauna ‘i da ‘ewena.

⁸ Ta to‐taria ‘e bweu tai ‘ina ‘ebwaeadaita gabugabuna i ‘ebwaeae, tauna to‐taria ‘ebwaeadaita gabugabu i ‘ebwaea bwarana ‘i da ‘ewena tauna ‘enaia.

⁹ Ta ‘ebwaeadaita rabia iauna si gabuna umura ‘enaia, ta iauna si guinuena tega ‘enaia, ta ‘ebegabu ‘ana disi ‘enaia, tauna to‐taria i ‘ebwaea‘ena ‘ina iage.

¹⁰ Ta ‘ebwaeadaita rabia iauna, bunama ma‘ieana si ilienoenowena, nai iadaiadana, Aarona natunao iauiaudi si da ‘ewena, ‘e bweuna na‘ieana ‘e bweuna.

¹¹ Ta gete ‘ebwaeadaita‐guguia ‘ana taria ‘ana loina, iaita ‘i da ‘ebwaea Ieoba ‘enaia.

¹² ‘Abo i ‘ebwaea lokagutoki manuna, ga ‘i da ‘ebwaea lokagutoki ‘ana taria ma‘ieana keke nigea‐ma‐lebenidimo si ilienoenowena bunama ma‘ieana, ta dedeadi nigea‐ma‐lebenidimo bunamega si siwarorodi, ta keke si ilienoenowena bunama ma‘ieana, palaua ‘esasena ‘i pwasapwasana ‘enega.

¹³ ‘Ina ‘ebwaeadaita ‘i da ‘ebwaea keke palaua malebeninega ma‘edi ‘ina ‘ebwaeadaita guguia ‘ana taria ma‘ieana lokagutoki manuna.

¹⁴ Ta ‘enega ‘ebwaeadaita ‘e bweuna ‘e bweuna ‘i da ‘ebwaea gilagata manuna Ieoba ‘enaia; tauna to‐taria ‘ebwaeadaita guguia rarana ‘i loseuseula ‘ina iage.

¹⁵ Ta ‘ina ‘ebwaeadaita guguia ‘adi taria esiona lokagutoki manuna ‘ina ‘ebwaeadaita ‘ana asiata ‘enega ‘i da ‘e‘ai; gea‘abo ‘e bweu ‘i sa‘usa‘u ga gonagonaia.

¹⁶ Ta ‘abo ‘ina ‘ebwaeadaita ‘ana taria ‘i da ona‘upa‘upa, nai ‘ebwaeadaita nuenega, asiata ‘enega ‘ana taria i ‘ebwaea ‘i da ‘e‘ani: ta ‘i ulisi be tauna ‘i tu pwatupwa ‘i da ‘e‘ani.

¹⁷ Ta tauna taria esiona tupwana asiata ‘etonina ‘enega ‘i da gabuna aweiega.

¹⁸ Ta ‘abo ‘ina ‘ebwaeadaita guguia ‘ana taria esiona ‘e bweuna i ‘enina asiata ‘etonina, gea‘abo ‘i da bobo‘ana, nai tauna i ‘ebwaea‘ena ‘ena si da sawena: tauna ‘i da gadilulu, ta iaruiarua ‘enega i ‘e‘ai ‘ina bubuna bokobokona ‘i da ‘a‘ari.

¹⁹ Ta esio iage nigea ‘esasena ‘e bweuna ‘i gitoona gea‘abo si da ‘e‘ai; si da gabuna aweiega. Ta esio manuna, tauna i ‘esasena ‘enega ‘i da ‘e‘ai:

²⁰ Ta iaruiarua ‘ebwaeadaita guguia ‘adi taria esiona ‘enega i ‘e‘ai, tauna Ieoba ‘ina iage, ta ma‘ina nigea‘esasena, iaruiarua gote ‘ina tomota ‘ediega si da ‘upwena.

²¹ Ta ‘ena tai ‘e bweu iage nigea‐‘esasena ‘i gitoona, tai ‘ina nigea‐‘esasena, nai bomitawa nigea‐‘esasena, nai lage gadilulu nigea‐‘esasena, ta ‘ebwaeadaita guguia ‘ana taria esiona ‘enega i ‘e‘ai, tauna Ieoba ‘ina iage, iaruiarua gote ‘ina tomota ‘ediega si da upwena.

²² Ta Ieoba ‘i ona Mose ‘enaia, ‘i gwae,

²³ Iseraela tubunao ‘edia ‘u da ona, ‘u da gwae, Iapa gea‘abo ‘e bweu wa ‘e‘ani, bulomakau ‘enega, nai sipi, nai gota.

²⁴ Ta iage tauna ‘i mwawasa iapana, ta tauna bomitawa si sabusabuna iapana, wa da ‘ewa mari guinua manuna: ta gea‘abo sa‘i ‘enega wa ‘e‘ani.

²⁵ Tauna bomitawa iapana i ‘e‘ai, tauna ‘enega tai ‘ebwaeadaita aweiega Ieoba ‘enaia si ‘ebwaea, tauna iaruiarua i ‘enina si da ‘upwena ‘ina tomota ‘ediega.

²⁶ Ta gea‘abo rara ‘e bweu wa ‘e‘ani, nai manua ‘enega nai bomitawa ‘enega, ‘imi anua ‘e bweuna ‘enaia.

²⁷ Tauna rara ‘e bweuna i ‘e‘ani, iaruiarua gote si da ‘upwena ‘ina tomota ‘ediega.

²⁸ Ta Ieoba ‘i ona Mose ‘enaia, ‘i gwae,

²⁹ Iseraela tubunao ‘edia ‘u da ona, ‘u da gwae, Tauna ‘ina ‘ebwaeadaita guguia ‘ana taria i ‘ebwaea Ieoba ‘enaia ‘ina ‘ebwaeadaita ‘i da me‘ena Ieoba ‘enaia ‘ina ‘ebwaeadaita guguia ‘adi taria ‘enega:

³⁰ Tauna nimana Ieoba ‘ana ‘ebwaeadaita si bubuna aweiega si da me‘ena; iapa lumaluma ma‘ieana ‘i da me‘ena, be ‘enega lumaluma si da elo‘uio ‘ebwaeadaita lo‘uio Ieoba matanaia.

³¹ Ta to‐taria iapa ‘i da gabuna ‘ebetaria ‘enaia: ta lumaluma tauna Aarona ta natunao ‘idi iage.

³² Ta bwadaga ‘ataina wa da ‘ebwaea to‐taria ‘enaia ‘ebwaeadaita‐gilagata manuna ‘imi ‘ebwaeadaita guguia ‘adi taria ‘ediega.

³³ Tauna Aarona natunao ‘edia, tauna ‘ebwaeadaita guguia raradi i ‘ebwaedi, ta iapa, bwadaga ‘ataina ‘i da ‘ewena ‘ana ‘egu‘eguia.

³⁴ Lumaluma lo‘uio ta bwadaga gilagata Iseraela tubunao ‘ediega ia ‘ewena ‘idi ‘ebwaeadaita guguia ‘adi taria ‘ediega, ta ia ‘ebwaea‘edi Aarona to‐taria ‘enaia ta natunao ‘edia ‘idi iage sawesawedia ataia Iseraela tubunao ‘ediega.

³⁵ Gete Aarona ‘ina oroa‐tomwana, ta natunao ‘idi oroa‐tomwana, Ieoba ‘ana ‘ebwaeadaita si bubuna aweiega ‘ediega, asiata ‘enega i ‘ebwaea‘edi be si guinua Ieoba ‘enaia to‐taria ‘ina guinua ‘enaia;

³⁶ Tauna Ieoba ‘i ona Iseraela tubunao si da ‘ebwaedi, ‘asiata ‘enega ‘i eorodi. Tauna ‘idi iage ataia ‘idi epata‐tomota ‘edia.

³⁷ Gete ‘ebwaeadaita gabugabuna ‘ana loina, ‘ebwaeadaita rabia be, loegesi ‘ana ‘ebwaeadaita be, to‘umalina ‘ana ‘ebwaeadaita be, tagwara‐‘ai‘aila be, ‘ebwaeadaita guguia ‘adi taria be;

³⁸ Tauna Ieoba ‘i ona Mose ‘ena ‘oea Sinai ‘enaia, asiata ‘enega ‘i ona Iseraela tubunao ‘edia be ‘idi ‘ebwaeadaita si da ‘ebwaea Ieoba ‘enaia, mitawa Sinai ‘enaia.