Loina 6 - Buki Tabu Lowaenei 1919

‘UPWA 6.

¹ Ta Ieoba ‘i ona Mose ‘enaia, ‘i gwae,

² ‘Abo ‘e bweu ‘i loegesi, ta bubuna bokobokona ‘i guinua Ieoba ‘enaia, ta gosiana ‘ena ‘i guinua bokobokona iage ‘i sa‘una manuna, nai gimwani, nai oae, nai gosiana ‘i didigena;

³ Nai iage si loseena ‘i lobena, ta ‘enega ‘i bubuna kabokabo, ta ‘onakabokaboegu ‘i ona‘upa‘upa; iage getedi iauiaudi ‘e bweuna ‘ediega tai ‘i guinuena, ‘edia ‘i loegesi:

⁴ Ga gete ‘i da apwesa, ‘abo ‘i loegesi ni‘atu, ta ‘i to‘umalina, ga iage i ‘ewena oaeiega ‘i da ‘ebwaea limana, nai iage i ‘ewena didigega, nai iage si sa‘u ‘enaia, nai iage si loseena ga ‘i lobena,

⁵ Nai ‘e bweu iage manuna ‘i ona‘upa‘upa kabokabo ni‘atu; ‘i da ‘ebwaea limana maibo‘ana, ta ‘ana e nima ‘ena ‘i da sa‘uepopoe: tauna ina iage ‘ena ‘i da ‘ebwaeaena, asiata ‘enega si lobena ‘i to‘umali.

⁶ Ta ‘ina to‘umalina ‘ana ‘ebwaeadaita ‘i da me‘ena Ieoba ‘enaia, iau ‘enega sipi me‘olotona nigea ma‘ina to‘umalina, na‘ieana ‘imu sawa, to‘umalina ‘ana ‘ebwaeadaita, to‐taria ‘enaia.

⁷ Ta to‐taria ‘i da gienua‘ebweu manuna Ieoba matanaia, ta ‘ina to‘umalina ‘i da kweuna; to‘ase nai ‘i guinua ga ‘enega ‘i to‘umalina leleana.

⁸ Ta Ieoba ‘i ona Mose ‘enaia, ‘i gwae,

⁹ Aarona ta natunao ‘edia ‘u da ona, ‘u da gwae, Gete ‘ebwaeadaita‐gabugabu ‘ana loina: ‘ebwaeadaita gabugabu nina ‘ana kaiwe ‘ebetaria ‘enaia ‘ena ‘i da mia masari ga gonagonaia; ta ‘ebetaria ‘ana awe ‘ena ‘i da ‘ara‘arata ‘ataia.

¹⁰ Ta to‐taria ‘ana ‘oama kaleko ‘i da ‘otena, ta ‘ana tarausesa kaleko esiona ‘ena ‘i da sa‘udi; ta karikaunina tauna ‘enega ‘ebwaeadaita gabugabu i ‘ara‘arasina ‘ebetaria ‘enaia ‘i da ‘ewena, ta ‘ebetaria deinaia ‘i da sa‘udi.

¹¹ Ta ‘ana ‘oama ‘i da alolodi, ta mari ‘oama ‘i da ‘otedi, ta karikau ‘i da ‘a‘ara apwesa etauluia esena ‘esasena ‘enaia.

¹² Ta awe ‘ebetaria ‘enaia ‘i da ‘ara‘arata ‘ataia ‘enaia, gea‘abo ‘i da kweukweu; ta to‐taria kaiwe ‘ena ‘i da oreore gonagona iauna: ta ‘ebetaria gabugabu ‘i da sa‘u leleni ‘enaia, ta guguia ‘ana ‘ebwaeadaita iapadi ‘ena ‘i da gabuna.

¹³ Awe ‘i da ‘ara‘arata ‘ataia; gea‘abo ‘i kweukweu.

¹⁴ Ta gete ‘ebwaeadaita palaua ‘ana loina; Aarona natunao si da ‘ebwaea‘ena Ieoba matanaia, ‘ebetaria matanaia.

¹⁵ Ta ‘enega nimanega ‘i da sapwari be ‘i da ‘ewena, ‘ebwaeadaita rabia palaua ‘esasena ‘enega, ta bunamina ‘enega, ta mu‘ana iauiauna tauna ‘ebwaeadaita rabia ‘enaia, ta ‘ebetaria ‘ena ‘i da ‘arasi maina dibidibi manuna, ‘ina ‘ebenua‘i‘isi manuna, Ieoba ‘enaia.

¹⁶ Ta tauna tupwana ‘enega Aarona ta natunao si da ‘enina: si da ‘enina nigea malebeninamo, esena tabu ‘enaia; anua ‘ebeeloba ‘atamaninaia ‘ena si da ‘enina.

¹⁷ Gea‘abo si gabugabu lebeniega. Ni‘atu ia ‘ebwaea‘ena be ‘idi egueguia ‘agu ‘ebwaeadaita aweiega si bubudi ‘ediega; tauna ‘i e tabu wawasae, loegesi ‘ana ‘ebwaeadaita manuna, ta to‘umalina ‘ana ‘ebwaeadaita manuna.

¹⁸ Aarona natunao ‘ediega me‘olotona iauna si da ‘enina, ‘idi iage manuna ‘ataia ‘imi epata tomota ‘edia, Ieoba ‘ana ‘ebwaeadaita si bubudi aweiega ‘ediega; tauna ‘i gitoodi ‘i da etabu.

¹⁹ Ta Ieoba ‘i ona Mose ‘enaia, ‘i gwae,

²⁰ Gete Aarona ta natunao ‘idi ‘ebwaeadaita, tauna si da ‘ebwaea Ieoba ‘enaia asiata nina ‘enega si eorona; palaua ‘esasena ‘enega epa ‘ana sanauna ‘ebwaeadaita rabia tuta iauiauna manuna, ‘ana‘upwaruena gonagonaia, ta ‘ana ‘upwa‐ruena asuinuanuaia.

²¹ ‘Urena ‘ebegabu ‘ena si da bubuna bunamega; ni‘atu ‘i epwasena, ga ‘u da me‘ena: tomwatomwana gabugabudi ‘ediega ‘ebwaeadaita rabia ‘u da ‘ebwaea maina bobo‘ana manuna Ieoba ‘enaia.

²² Ta to‐taria orooroina tauna ‘ana lopa‘eru natunao ‘ediega ‘i da ‘ebwaeaena: loina ‘ataia ‘enega si da gabuna maibo‘ana Ieoba ‘enaia.

²³ Ta to‐taria ‘ina ‘ebwaeadaita rabia iauna si da gabuna: gea‘abo si da ‘e‘ani.

²⁴ Ta Ieoba ‘i ona Mose ‘enaia, ‘i gwae,

²⁵ Aarona ta natunao ‘edia ‘u da ona, ‘u da gwae, Gete loegesi ‘ana ‘ebwaeadaita ‘ana loina: esena ‘ena ‘ebwaeadaita gabugabu si ununa ‘ena loegesi ‘ana ‘ebwaeadaita si da ununa Ieoba matanaia: tauna ‘i tabu wawasae.

²⁶ Tauna to‐taria loegesi manuna i ‘ebwaea‘ena tauna ‘i da ‘enina; esena tabu ‘ena si da ‘e‘ani, anua ‘ebeeloba ‘atamanina ‘enaia.

²⁷ To‘ase nai esiona ‘i gitoona ‘i da etabu: ta ‘ena raranega ‘i loseuseule ‘oama ‘e bweu ‘enaia, iage ‘i loseuseulina ‘u da ‘utuna esena tabu ‘enaia.

²⁸ Ta ‘urena‐bwa‘a ‘ena si ‘e‘urena si da ‘auweari: ta ‘abo si ‘e‘urenina ‘urena barasega, si da ‘isina, ta boasiega si da ‘utuna.

²⁹ To‐taria ‘ediega me‘olotona iauna ‘enega si da ‘e‘ai: tauna ‘i etabu wawasae.

³⁰ Ta nigea ‘e bweu loegesi ‘ana ‘ebwaeadaita, ‘enega rara ‘e bweu si me‘ena anua ‘ebeeloba ‘enaia sabi gienua‘ebweu esena tabu ‘enaia, si da ‘e‘ani; si da gabuna aweiega.