Loina 4 - Buki Tabu Lowaenei 1919

‘UPWA 4.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ‘u da gwae, ‘Abo ‘e bweu ‘i loegesi mwagemwage, iage ‘e bweuna Ieoba ni‘atu ‘i ona be gea‘abo ‘ena si da guiguinua ‘enaia, ta ‘e bweuna ‘ediega ‘i da guinuena:

³ ‘Abo to‐taria orooroina ‘i loegesi be ‘enega to‘umalina ‘i me‘ena tomota ‘edia; ga ‘ina loegesi manuna, tauna ni‘atu ‘i loegesiena, bulomakau menonoiana nigea ma‘ina to‘umalinamo ‘i da ‘ebwaeadaita Ieoba ‘enaia ‘ebwaeadaita loegesi manuna.

⁴ Ta bulomakau nina ‘i da me‘ena anua ‘ebeeloba ‘ana ‘awa ‘enaia Ieoba matanaia; ta nimana ‘i da sa‘u bulomakau debanaia, ta bulomakau ‘i da loemwawasina Ieoba matanaia.

⁵ Ta to‐taria orooroina bulomakau rarana ‘i da ‘ewa, ta anua ‘ebeeloba ‘ena ‘i da me‘ena:

⁶ Ta to‐taria nimamatagigina ‘i da e ‘etomwa‘ute rara ‘enaia, ta rara ‘i da loseuseule masebeni Ieoba matanaia, anua tabu ‘ana ‘auboda matanaia.

⁷ Ta to‐taria rara ‘i da sa‘u mu‘ana dibidibi ‘ana ‘ebetaria kunanao ‘edia Ieoba matanaia, tauna anua ‘ebeeloba ‘ena ‘i miami; ta bulomakau nina rarana iauiauna ‘i da siwa ‘ebwaeadaita‐gabugabuna ‘ana ‘ebetaria ‘aenaia, tauna anua‐‘ebeeloba ‘ana ‘awa ‘ena ‘i miami.

⁸ Ta loegesi ‘ana ebwaeadaita bulomakauna iapana iauiauna ‘enega ‘i da ‘ewena; iapa dia ‘i bodebodena, ta iapa maibo‘ana diana ‘ena ‘i miamiana,

⁹ Ta nuakwaia ‘e rua, ta iapa ‘edia ‘i miami, tauna iapa‘ubu tolobwana deinaia, ta tana ‘ate ‘enaia, nuakwaia ma‘edi, ‘i da ‘ewa iauledi,

¹⁰ Na‘ieana si ‘ewena ‘ebwaeadaita guguia ‘ana taria bulomakauna ‘enega: ta to taria ‘i da gabudi ‘ebwaeadaita gabugabu ‘ana ‘ebetaria ‘enaia.

¹¹ Ta bulomakau bwarana, ta esiona maibo‘ana, mabulubuluna, ta ma‘aena, ta diana, ta bi‘ina,

¹² Tugama bulomakau maibo‘ana ‘asa etaulunaia ‘i da ‘a‘ara‘iledi esena ‘esasena ‘enaia, ‘ena karikau si siwa iaulei, ta kaiwe ‘ena ‘i da gabuna awe‘ara‘arata ‘enega: karikau ‘ana ‘ebesiwaiaula ‘ena si da gabuna.

¹³ Ta ‘abo Iseraela ‘ina deriegogona maibo‘ana si loegesi, ta iage nina ‘i mia kwaia miaegogona matadiega, ta iage ni‘atu Ieoba ‘i ona gea‘abo si da guiguinue ga ‘e bweuna ni‘atu si guinuena, ta si to‘umali;

¹⁴ ‘Ena loegesi ‘enega si loeloegesi ‘i apwesa, ga miaegogona bulomakau menonoiana si da ‘ebwaeae loegesi ‘ana ‘ebwaeadaita manuna, ta anua‐‘ebeeloba matanaia si da me‘ena.

¹⁵ Ta deriegogona ‘ana ‘inapwanao nimadi si da sa‘u bulomakau debanaia Ieoba matanaia: ta bulomakau si da ununa Ieoba matanaia.

¹⁶ Ta to taria orooroina bulomakau raranega ‘i da me‘ena anua‐‘ebeeloba ‘enaia:

¹⁷ Ta to‐taria nimamatagigina ‘i da e ‘etomwa‘ute rara ‘enaia, ta ‘i da loseuseula masebeni Ieoba matanaia, ‘auboda matanaia.

¹⁸ Ta rara ‘i da sa‘u ‘ebetaria kunanao ‘edia tauna Ieoba matanaia ‘i miami, tauna anua‐‘ebeeloba ‘ena ‘i miami, ta rara maibo‘ana ‘i da siwa ‘ebwaeadaita gabugabu ‘ana ‘ebetaria ‘aenaia, tauna anua‐‘ebeeloba ‘ana ‘awa ‘ena ‘i miami.

¹⁹ Ta iapana maibo‘ana ‘enega ‘i da ‘ewena, ta ‘ebetaria ‘ena ‘i da gabuna.

²⁰ Gote nadigega ‘i da guinua bulomakau ‘enaia; na‘ieana ‘i guinua loegesi ‘ana ‘ebwaeadaita ‘ina bulomakau manuna, na‘ieana gete ‘ena ‘i da guinua: ta to‐taria ‘i da gienua‘ebweu manudi, ta Ieoba nuana ‘i da bobo‘ana ‘edia.

²¹ Ta bulomakau nina ‘i da ‘a‘arina ‘asa etaulunaia, ta ‘i da gabuna na‘ieana gimi bulomakau ‘i gabuna: tauna loegesi ‘ana ‘ebwaeadaita miaegogona manuna.

²² ‘Ena ‘Inapwana ‘e bweu ‘i loegesi, ta iage iauiauna Ieoba ‘ina Eaubada ni‘atu ‘i loina gea‘abo ‘i da guinua ‘i guinua ma‘ina mwagemwage, ta ‘i to‘umali;

²³ ‘Abo ‘ina loegesi, ‘enega ni‘atu ‘i loegesiena, si e‘ita ‘enaia, ‘ina ‘ebwaeadaita manuna gota ‘e bweu ‘i da me‘ena, me‘olotona nigea ma‘ina to‘umalinamo;

²⁴ Ta nimana ‘i da sa‘u gota debanaia, ta ‘i da ununa esena nina ‘enega ‘ebwaeadaita gabugabu si unuunu Ieoba matanaia: tauna loegesi ‘ana ‘ebwaeadaita.

²⁵ Ta to‐taria loegesi ‘ana ‘ebwaeadaita raranega ‘i da ‘ewa nimamatagiginega, ta ‘i da sa‘una ‘ebwaeadaita gabugabu ‘ana ‘ebetaria kunanao ‘edia, ta rarana ‘i da siwa ‘ebwaeadaita gabugabu ‘ana ‘ebetaria ‘aenaia.

²⁶ Ta iapana maibo‘ana ‘i da gabu ‘ebetaria ‘enaia, na‘ieana ‘ebwaeadaita guguia ‘adi taria iapana: ta to‐taria ‘i da gienua‘ebweu manuna na‘ieana ‘ina loegesi manuna, ta Ieoba nuana ‘i da bobo‘ana ‘enaia.

²⁷ Ta ‘abo tomotai ‘ediega ‘e bweuna ‘i loegesi ma‘ina mwagemwage, iage ni‘atu Ieoba ‘i ona gea‘abo si da guinua ga ‘e bweuna ‘i guinuena, ga ‘i to‘umali;

²⁸ ‘Abo ‘ina loegesi, tauna ni‘atu ‘i loegesiena, ga si e‘ita ‘enaia, ga ‘ina ‘ebwaeadaita manuna gota ‘e bweu ‘i da me‘ena, mewainena nigea ma‘ina to‘umalinamo, ‘ina loegesi ni‘atu ‘i loeloegesiei manuna.

²⁹ Ta nimana ‘i da sa‘u loegesi ‘ana ‘ebwaeadaita debanaia, ta loegesi ‘ana ‘ebwaeadaita ‘i da ununa ‘ebwaeadaita gabugabu ‘ana esena ‘enaia.

³⁰ Ta to‐taria rarana ‘enega ‘i da ‘ewa nimamatagiginega, ta ‘ebwaeadaita gabugabu ‘ana ‘ebetaria kunanao ‘edia ‘i da ‘e sa‘una, ta rarana maibo‘ana ‘i da siwa ‘ebetaria ‘aenaia.

³¹ Ta iapana maibo‘ana ‘i da ‘ewa iaulei, na‘ieana iapa si ‘ewena ‘ebwaeadaita guguia ‘adi taria ‘enega; ta to‐taria ‘i da gabuna ‘ebetaria ‘enaia maina dibidibi Ieoba ‘enaia manuna; ta to‐taria ‘i da gienua‘ebweu manuna, ta Ieoba nuana ‘i da bobo‘ana ‘enaia.

³² Ta ‘abo lami ‘i me‘ena ‘ina ‘ebwaeadaita loegesi ‘ana ‘ebwaeadaita manuna, mewainena nigea ma‘ina to‘umalinamo ‘i da me‘ena.

³³ Ta nimana ‘i da sa‘u loegesi ‘ana ‘ebwaeadaita debanaia, ta ‘i da ununa loegesi ‘ana ‘ebwaeadaita manuna esena ‘enega ‘ebwaeadaita gabugabu si ununa.

³⁴ Ta to‐taria loegesi ‘ana ‘ebwaeadaita raranega ‘i da ‘ewa nimamatagiginega, ta ‘i da sa‘una ‘ebwaeadaita gabugabu ‘ana ‘ebetaria kunanao ‘edia, ta rarana maibo‘ana ‘i da siwa ‘ebetaria ‘aenaia:

³⁵ Ta iapana maibo‘ana ‘i da ‘ewa iaulei, na‘ieana lami iapana si ‘ewena ‘ebwaeadaita guguia ‘adi taria ‘enega; ta to‐taria ‘ebetaria ‘ena ‘i da gabudi, Ieoba ‘ana ‘ebwaeadaita ‘aweiega ‘edia: ta to‐taria manuna ‘i da gienua‘ebweu ‘ina loegesi ni‘atu ‘i loeloegesiena manuna, ta Ieoba nuana ‘i da bobo‘ana ‘enaia.