Loina 3 - Buki Tabu Lowaenei 1919

‘UPWA 3.

¹ Ta ‘abo ‘ina ‘ebwaeadaita i ‘ebwaeadaita guguia ‘idi taria; ‘abo manua ‘aedi ‘e ata ‘ediega i ‘ebwaea, nai me‘olotona nai mewainena, ‘i da ‘ebwaea‘ena nigea ma‘ina to‘umalinamo Ieoba matanaia.

² Ta nimana ‘i da sa‘u ‘ina ‘ebwaeadaita debanaia, ta anua‐‘ebeeloba ‘ana ‘awa ‘ena ‘i da loemwawasina: ta Aarona natunao to taria rarana si da loseuseula dadanena ‘ebetaria ‘enaia.

³ Ta ‘ebwaeadaita guguia ‘ana taria ‘ediega ‘i da ‘ebwaea ‘ebwaeadaita aweiega Ieoba ‘enaia; iapa dia ‘i bodebodena, ta iapa maibo‘ana dia ‘ena ‘i miamiana,

⁴ Ta nua kwaia ‘e rua, ta iapa ‘i miami ‘edia, tauna iapa‘ubu tolobwana deinaia, ta tana ‘ate ‘enaia, nuakwaia ma‘edi, ‘i da ‘ewa iauledi.

⁵ Ta Aarona natunao me‘olotodi si da gabuna ‘ebetaria ‘enaia ‘ebwaeadaita gabugabu ‘enaia, tauna kaiwe ‘ena ‘i miami tauna awe sabelulu ‘ena ‘i miami: tauna ‘ebwaeadaita aweiega, maina dibidibina Ieoba ‘enaia.

⁶ Ta ‘abo ‘ina ‘ebwaeadaita taria ‘ebwaeadaita guguia manuna Ieoba ‘enaia sipiega ‘i da me‘ena; me‘olotona nai mewainena, ‘i da ‘ebwaea‘ena nigea ma‘ina to‘umalinamo.

⁷ ‘Abo lami i ‘ebwaeae ‘ina ‘ebwaeadaita manuna, ga ‘i da ‘ebwaea‘ena Ieoba matanaia:

⁸ Ta nimana ‘i da sa‘u ‘ina ‘ebwaeadaita debanaia, ta ‘i da ununa anua‐‘ebeeloba matanaia; ta Aarona natunao rarana si da loseuseula dadana ‘ebetaria ‘enaia.

⁹ Ta ‘ebwaeadaita guguia ‘adi taria ‘enega ‘ebwaeadaita ‘i da ‘ebwaea aweiega Ieoba ‘enaia; iapana, iuiuna iapana maibo‘ana, ‘i da ‘ewena lulutouna serabenaia; ta iapa dia ‘i bodebodena, ta iapa maibo‘ana dia ‘ena ‘i miamiana,

¹⁰ Ta nuakwaia ‘e rua, ta iapa ‘edia ‘i miami, tauna iapa‘ubu tolobwana deinaia ‘i miamiana, ta tana ‘ate ‘enaia, nuakwaia ma‘edi, ‘i da ‘ewa iauledi.

¹¹ Ta to‐taria ‘i da gabuna ‘ebetaria ‘enaia: tauna ‘ebwaeadaita ‘aweiega Ieoba ‘enaia masurina.

¹² Ta ‘abo ‘ina ‘ebwaeadaita ‘i gota, ga ‘i da ‘ebwaea‘ena Ieoba matanaia:

¹³ Ta nimana ‘i da sa‘u debanaia, ta ‘i da ununa anua‐‘ebeeloba matanaia: ta Aarona natunao rarana si da loseuseula dadane ‘ebetaria ‘enaia.

¹⁴ Ta ‘ina ‘ebwaeadaita ‘enega ‘i da ‘ebwaea, ‘ebwaeadaita aweiega Ieoba ‘enaia; iapa diana ‘i bodebodena, ta iapa maibo‘ana diana ‘ena ‘i miamiana,

¹⁵ Ta nuakwaia ‘e rua, ta iapa ‘edia ‘i miamiana, tauna iapa‘ubu tolobwana deinaia, ta tana ‘ate ‘enaia, nuakwaia ma‘edi, ‘i da ‘ewa‐iau‐ledi.

¹⁶ Ta to taria ‘i da gabudi ‘ebetaria ‘enaia; tauna ‘ebwaeadaita aweiega masurina, maina dibidibi manuna: iapa maibo‘ana Ieoba ‘ina iage.

¹⁷ ‘I da loina ‘ataia ‘imi epata‐tomota ‘edia ‘imi anua iauiauna ‘edia, ‘aene gea‘abo iapa nai rara wa da ‘e‘ani.