Loina 27 - Buki Tabu Lowaenei 1919

‘UPWA 27.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ta ‘edia ‘u da gwae, ‘Ena tai ‘e bweu ona‘upa‘upa ‘i sa‘u, tomota nidi si da Ieoba manuna na‘ieana ‘imu sawa.

³ Ta ‘imu sawa me‘olotona manuna ‘ana iakwara ‘e tweniti ga iakwara ‘e sikisiti, tuga ‘imu sawa ‘i da ‘e sekeli sileba ‘e pipiti, na‘ieana anua tabu ‘ina sekeli.

⁴ Ta ‘abo mewainena, ga ‘imu sawa ‘i da ‘e sekeli ‘e tati.

⁵ Ta ‘abo iakwara ‘e nima ga iakwara ‘e tweniti, ga ‘imu sawa me‘olotona manuna ‘i da ‘e sekeli ‘e tweniti, ta mewainena manuna sekeli ‘e teni.

⁶ Ta ‘abo nawarae ‘e bweuna ga iakwara ‘e nima, ga ‘imu sawa me‘olotona manuna ‘i da ‘e sekeli sileba ‘e nima, ta me wainena manuna ‘imu sawa ‘i da ‘e sekeli sileba ‘e toi.

⁷ Ta ‘abo iakwara ‘e sikisiti ‘enega ta ‘i da tu‘e; ‘abo me‘olotona, ga ‘imu sawa ‘i da ‘e sekeli ‘e pipitini, ta mewainena manuna sekeli ‘e teni.

⁸ Ta ‘abo ‘imu sawa ‘i sinabwa ta ‘ina gwegwe gidarina, ga to taria matanaia si da sa‘u, ta to taria iage sawesawenaia ‘i da ‘inana; na‘ieana tauna ‘i ona‘upa‘upa ‘ina waiwai na‘ieana to taria iage sawesawenaia ‘i da ‘inana.

⁹ Ta ‘abo iobai, ‘enega tai si ‘ebwaeadaita Ieoba ‘enaia, nadigega iauiauna tai ‘e bweuna i ‘ebwaea Ieoba ‘enaia ‘i da ‘e tabu.

¹⁰ Gea‘abo ‘i da gibunina, nai ‘i da sa‘ugelasina, bobo‘ana to‘umalina manuna, nai to‘umalina bobo‘ana manuna: ta ‘abo ‘e bweu tuta ‘i sa‘ugelasa iobai iobai manuna, ga tauna ta tauna manuna ‘i sa‘ugelasa ruedi si da ‘e tabu.

¹¹ Ta ‘abo iobai nigea‐‘esasena, tauna ‘enega nigea si da ‘ebwaeadaita Ieoba ‘enaia, ga iobai nina ‘i da sa‘u to‐taria matanaia:

¹² Ta to taria iage sawesawenaia ‘i da ‘inana, nai ‘i bobo‘ana nai ‘i to‘umalina; na‘ieana ‘oio to taria u ‘inana, na‘ieana ‘i da sawesawenaia.

¹³ Ta ‘abo i ‘ewalimena, ga ‘imu sawa ‘ena ‘i da loeposeana ‘ina ‘upwa nima.

¹⁴ Ta ‘ena tai ‘e bweuna ‘ina anua ‘i etabuna be i ‘etabu Ieoba ‘enaia, ga to taria ‘i da sawena, nai ‘i bobo‘ana nai ‘i to‘umalina: na‘ieana to taria ‘i sawena, na‘ieana ‘i da tooro.

¹⁵ Ta ‘abo tauna ‘i etabuna ‘ina anua i ‘ewalimena, ga ‘imu sawa mani ‘ana ‘upwa ‘e nimana ‘i da loeposeana ‘enaia, ta ‘i da ‘e ‘ina anua.

¹⁶ Ta ‘abo ‘e bweu tai ‘ina bagura tauna tomwana ‘i etabuna Ieoba ‘enaia, ga ‘imu sawa ‘i da nadigega ‘ina dauna: keiga omera baali ‘ina dauna ‘i da sawesawenaia sekeli sileba ‘e pipiti.

¹⁷ ‘Abo ‘ina bagura ‘i etabuna iakwara iubile ‘enega, na‘ieana ‘imu sawa na‘ieana ‘i da tooro.

¹⁸ Ta ‘abo ‘ina bagura ‘i etabuna iubile murinaia, ga to taria mani ‘ena ‘i da sawa nadigega iakwara si miami ga iakwara iubile ‘enaia, ta ‘imu sawa ‘enega si da ‘ewena.

¹⁹ Ta ‘abo tauna bagura ‘i etabuna ‘i da ‘ewa lima ‘ai‘ailina, ga ‘imu sawa ‘ina mani ‘ana ‘upwa ‘e nimana ‘ena ‘i da loeposeana, ta ‘i da ‘e ‘ina bagura ‘ai‘aila.

²⁰ Ta ‘abo geanuana ‘i da ‘ewalimena, nai ‘abo bagura nina ni‘atu ‘i gimwaniena mari tai ‘enaia, gea‘abo wate ‘i da ‘ewa‘ewa lima:

²¹ Ta bagura nina, ‘ena ‘i apwesa iubile ‘ena, ‘i da ‘etabu Ieoba ‘enaia, ‘atua bagura ‘etabuna; ‘ana ‘ewa tauna to taria ‘ina iage.

²² Ta ‘abo bagura ‘i lagwena, tauna nigea ‘ina bagura tauna, Ieoba ‘ena i ‘etabuiena:

²³ Ga to taria sawa sawesawenaia ga iakwara iubile ‘ena ‘i da simanei: ta ‘imu sawa ‘i da ‘ebwaea asiata gote ‘enega, iage tabu manuna Ieoba ‘enaia.

²⁴ Iakwara iubile ‘enega bagura ‘i da ‘ila tauna ‘enega ‘i lagwelagwena ‘enaia, tuga tauna bwa‘a nina ‘ana to ‘ewa ‘ai‘aila ‘enaia.

²⁵ Ta ‘imu sawa iauiaudi si da na‘ieana anua tabu ‘ina sekeli: sekeli ‘i da gera ‘e tweniti.

²⁶ Gete tuga iobai ‘ina gimi to tubua, tauna ‘i egimi totubua Ieoba ‘enaia, gea‘abo ‘e bweu tai ‘i da etabuiena; nai bulomakau, nai sipi, tauna Ieoba ‘ina iage.

²⁷ Ta ‘abo iobai nigea‐‘esasena ‘enega, ga ‘i da lagwena na‘ieana ‘imu sawa, ta ‘ina ‘upwa ‘e nimana ‘ena ‘i da loeposeana: nai ‘abo nigea i ‘ewalimena, ga si da gimwaniena na‘ieana ‘imu sawa.

²⁸ Ta gete, gea‘abo ‘e bweu iage ‘e etabuna, tauna tai ‘i da ‘etabuna Ieoba ‘enaia ‘ina iage iauiauna ‘ediega, nai tai nai iobai, nai ‘ina bagura tauna, ‘i da gimwani nai ‘i da ‘ewalimena; iage ‘e etabuna iauna ‘i tabu wawasae Ieoba ‘enaia.

²⁹ Nigea ‘e bweu ‘e etabuna, tauna tomota ‘ediega ‘i etabuna, si da e‘isa limena; ‘i da mwawasa ‘ai‘aila.

³⁰ Ta bwa‘a ‘ana ‘e sanau iauiauna, nai bwa‘a ‘ina ewanega, nai kaiwe uanega, tauna Ieoba ‘ina iage: tauna ‘i tabu Ieoba ‘enaia.

³¹ Ta ‘abo tai ‘e bweu ‘ana ‘e sanau ‘e bweu ‘i da ‘ewalimena, ‘ina ‘upwa ‘e nimana ‘ena ‘i da loeposeana.

³² Ta bulomakau iau nai sipi iau ‘ana ‘e sanau maibo‘ana, to‘ase nai keweliwelili ‘ubunaia ‘i tauia, ‘ana ‘e sanau ‘i da ‘e tabu Ieoba ‘enaia.

³³ Gea‘abo ‘i da ‘ebesa nai ‘i bobo‘ana nai ‘i to‘umalina, ta gea‘abo ‘i da gibunina: ta ‘abo ‘i sa‘ugelasa ‘e bweuna, ga tauna ta tauna manudi si da sa‘ugelasa ruarua si da ‘etabu; gea‘abo si da ‘ewa‘ewalimana.

³⁴ Gete loina nidi, taudi Ieoba ‘i ona Mose ‘ena Iseraela tubunao manudi ‘oea Sinai ‘enaia.