Loina 26 - Buki Tabu Lowaenei 1919

‘UPWA 26.

¹ Gea‘abo ‘e bweu goamamea wa da bubu ‘emia, nai tokwarui wa gietooro ‘emia, nai ‘ora gurewa, ta gea‘abo tokwarui gurewa ‘imi ‘asaia wa sa‘usa‘u, be ‘ena ‘u da bwagobwago: ‘Abo‘agu Ieoba ‘imi Eaubada ta ‘enega.

² ‘Igu sabate wa da ‘ita‘i‘isidi, ta ‘igu anua tabu wa da ‘amaiabena: ‘abo‘agu Ieoba.

³ ‘Abo ‘igu loina ‘edia wa tautauia, ta ‘igu ona wa ‘ita‘i‘isi, ta wa guinuedi;

⁴ Ga ‘imi usana ia da ‘ebwaea ‘adi tuta ‘enega, ta bwa‘a ‘ina sinabwa ‘i da uaua, ta bagura ‘ina kaiwe uadi si da uaua.

⁵ Ta ‘imi tutu witi ‘i da apwesa sesoi‐oine ‘enaia, ta sesoi‐oine ‘i da apwesa tuta dauna ‘enaia: ta ‘ami palaua wa da ‘e‘ai ga sawesawemia, ta ‘imi ‘asa ‘ena wa da miabesobeso.

⁶ Ta guguia ia da sa‘u ‘asaia, ta wa da ‘eno, ta gea‘abo ‘e bweu ‘i da giematautemi: ta ia da loina be bosasa to‘umalina si da gumwara ‘asega, ta sisisaia gea‘abo ‘imi ‘asa ‘i da rubware.

⁷ Ta ‘ami tarauwarao wa da pa‘idi, ta sisi‐saiega si da be‘u matamiega.

⁸ Ta ‘emiega sitenima wan anaredi si da pa‘i, ta ‘emiega site anaredi teni tausana si da pa‘i: ta ‘ami tarauwarao si da be‘u matamia sisi‐saiega.

⁹ Ta ia da nua‘i‘isimi, ta ia da loina be wa da uaua, ta ia da gieiauiemi; ta ‘igu ona‘upa‘upa ia da giepa‘ari ‘emia.

¹⁰ Ta ‘alagawa nina ‘ana tuta dudurana wa da ‘e‘ai, ta kadekaderina wa da me‘ena auauna manuna.

¹¹ Ta ‘igu anua‐tabenakele ia da sa‘u gamwagamwanimia: ta iaruiaruagu gea‘abo ‘i da guitoasemi.

¹² Ta ia da lopilidadana ‘emia, ta ia da ‘imi Eaubada, ta ‘omi wa da ‘igu tomota.

¹³ ‘Abo‘agu Ieoba ‘imi Eaubada, tauna ‘i me‘emi ‘asa Aigupitoega, be ‘enega gea‘abo ‘omi ‘idi tai‐ioniionidi; ta ‘imi ‘ebe‘a‘ara ‘ana kaiwe sa‘ubarabara ia gilasedi, ta ia bubuna be wa tauia paruparu.

¹⁴ Ta ‘abo nigea wa da nonogu, ta ona getedi iauiaudi nigea wa da guinuedi;

¹⁵ Ta ‘abo ‘igu loina tomwanao wa da e‘idi‘idiedi, ta ‘abo iaruiaruami ‘igu loinaiao ‘i guitoasedi, be ‘enega ‘igu loina iauiauna nigea wa da guinua, ta ‘igu ona‘upa‘upa wa li‘oena;

¹⁶ Gete wate ia da guinua ‘emia; didiga ia da aseiena ‘emia, tuga tubua gumwagumwara ta iaiiai, taudi mata si da loegumwaridi, ta iaruiarua ‘i da eowasi; ta ‘imi ewana wa da dauna daita, ‘ami tarauwarao si da ‘enina ta ‘enega.

¹⁷ Ta matagu ia da sa‘u matamia, ta wa da esilae ‘ami tarauwarao matadia: taudi si guitoasemi ‘emia si da loina; ta wa da dena ‘ena nigea ‘e bweu ‘i pa‘imi.

¹⁸ Ta ‘abo iage gete manudi nigea ‘eguia wa da nonono, ga ia da sapimi wate ‘e sebeni ‘imi loegesiao manudi.

¹⁹ Ta ‘imi waiwai ‘ina gagasa ia da lasena; ta ‘imi garewa ia da bubuna ‘i da ‘e kainumu ‘atua, ta ‘imi bare‘u ‘atua barasa:

²⁰ Ta ‘imi waiwai wa da loegumwara daita: ‘imi bwa‘a gea‘abo ‘ina sinabwa ‘i da uaua ta ‘enega, ta bwa‘a ‘ina kaiweao gea‘abo si da uaua.

²¹ Ta ‘abo wa tautauia loguitoasegu, ta nigea wa da nonogu; muia wate ‘eiau sebeni ia da me‘edi ‘emia na‘ieana ‘imi loegesiao.

²² Ta mitawa ‘ina bosasa ia da etunena ‘emia, taudi natumiao si da ‘oaemi, ta ‘imi bulomakau si da loesawaridi, ta ‘ami iau si da loesaesapulelena; ta ‘imi ‘edao si da waborebore.

²³ Ta ‘abo iage getedi ‘ediega nigea wa da nuaebuni ‘eguia, ta wa tautauia loguitoasegu;

²⁴ Ga ‘abo‘agu wate ia da tauia loguitoasemi; ta ia da sapimi, tuga ‘abo‘agu, tuta e sebeni ‘imi loegesiao manudi.

²⁵ Ta sisi‐saia ia da me‘ena ‘emia, tauna ‘ona‘upa‘upa ‘ina e‘isa ‘i da iagena; ta wa da egogona ‘imi ‘asa soradia: ta muia ia da etunena ‘emia; ta tarauwara nimanaia ia da tagwaremi.

²⁶ ‘Ena ‘imi witi ‘ina guna ia lasena, iine sanau ‘ami palaua si da gabu umura ‘e bweuna ‘enaia, ta ‘ami palaua si da ‘ebwaea limana nadigega ‘ana mwau: ta wa da ‘e‘ai, ta gea‘abo ‘i da sawesawemia.

²⁷ Ta ‘abo gete maibo‘ana manuna nigea wa da nonogu, ta wa tautauia loguitoasegu;

²⁸ Ga ia da tauia loguitoasemi egamwagamwagu ‘ena; ta wate ia da sapimi tuta ‘e sebeni ‘imi loegesiao manudi.

²⁹ Ta natumiao me‘olotodi esiodi wa da ‘e‘ai, ta natumiao me wainedi esiodi wa da ‘e‘ai.

³⁰ Ta ‘imi esenao si miamia tu‘e ia da loesaooridi, ta ‘imi tokwarui‐sinara ia da ‘ausepara mwa‘ute, ta ‘imi kokoa ia da ‘uledi ‘imi goamamea ‘idi kokoa ‘edia; ta iaruiaruagu ‘i da guitoasemi.

³¹ Ta ‘imi ‘asa ia da bubudi be si da waborebore, ta ‘imi anua tabuiao ia da loesaooridi, ta ‘imi mu‘ana dibidibi mainadi gea‘abo ia da muimui.

³² Ta ‘asa ia da loesaoori: ta ‘ami tarauwarao ‘ena si miami nuadi ‘i da owana manuna.

³³ Ta ‘omi ia da lelewanemi ‘ebeloina ‘edia, ta sisi‐saia ia da lisilolona murimia: ta ‘imi bwa‘a ‘i da saoora, ta ‘imi ‘asao si da waborebore.

³⁴ Ga bwa‘a ‘ina sabate manudi ‘i da guausoara, tuta ‘enega ‘i waborebore, ta ‘omi ‘ami tarauwarao ‘idi esena ‘ena wa miami; gote ‘enega bwa‘a ‘i da eiawai‘ata, ta ‘ina sabate manudi ‘i da guausoara.

³⁵ Tuta ‘enega i ‘eno‘eno waborebore ‘i da eiawai‘ata; tuga eiawai‘ata nigea i ‘ewena ‘imi sabate ‘edia, ‘ena wa miami ‘enaia.

³⁶ Ta taudi ‘emiega si tupwatupwa manudi, ‘adi ‘atesa‘ara ia da sa‘u ‘adi tarauwarao ‘idi esenao ‘edia: ta kaiwe iawana ‘i siiesiieie ‘enana ‘i da pa‘idi; ta si da dena, ‘atua ‘e bweu ‘i denadena sisi‐saiega; ta si da be‘u ‘ena nigea ‘e bweu ‘i muriedi.

³⁷ Ta si da esetupedi ‘e bweuna ‘e bweuna ‘enaia, ‘atua sisi‐saia matanaia, ‘ena nigea ‘e bweu ‘i pilipilima muridiega: ta gea‘abo ‘e bweu ‘imi waiwai be tarauwarao matadia wa da tooro.

³⁸ Ta wa da saoora ‘ebeloinao gamwagamwanidia, ta ‘ami tarauwarao ‘idi esena ‘i da e‘e gumwarimi.

³⁹ Ta taudi ‘emiega tupwadi si da eowasidi ‘idi bubuna bokobokona ‘enaia ‘ami tarauwarao ‘idi esenao ‘edia; ta wate tamadiao ‘idi bubuna bokobokodi ‘edia si da eowasidi ma‘ediao.

⁴⁰ Ta ‘idi bubuna bokobokona si da simana, ta tamadiao ‘idi bubuna bokobokona, ‘idi li‘oaloina ‘ena tauna si li‘oena mataguia, ta wate manuna si tautauia loguitoasegu,

⁴¹ ‘abo‘agu wate ia tauia loguitoasedi, ta ia ‘au‘ewedima ‘adi tarauwarao ‘idi esena ‘enaia: ‘abo ‘enega ‘atedi nigea lodabanamo ‘i da mwa‘uta, ta ‘enega ‘idi bubuna bokobokona ‘ana unua si ‘ewena;

⁴² Ga ‘igu ona‘upa‘upa Iakobo ma‘ieagu ia da nua‘i‘isina; ta wate ‘igu ona‘upa‘upa Isaako ma‘ieagu, ta wate ‘igu ona‘upa‘upa Aberaamo ma‘ieagu ia da nua‘i‘isina; ta bwa‘a ia da nua‘i‘isi.

⁴³ Bwa‘a wate ‘i da tupwa ‘ediega, ta ‘ina sabate manudi ‘i da guausoara, tuta ‘enega i ‘eno‘eno waborebore ta taudi nigea; ta ‘idi bubuna bokobokona ‘ana unua si da ‘ewena: manuna, tuga ‘igu loinao si e‘idi‘idiedi manuna, ta ‘igu loina tomwanao iaruiaruadi ‘i guitoasedi.

⁴⁴ Ta tua tuga iage maibo‘ana gote, ‘ena ‘adi tarauwarao ‘idi ‘esena ‘ena si miami, gea‘abo ia da e‘idi‘idiedi, nai ia da guitoasedi, be ia da loesaoora e gumwaridi, ta ‘igu ona‘upa‘upa ma‘edi ia da lasena; ‘abo‘agu Ieoba ‘idi Eaubada ta ‘enega:

⁴⁵ Ta leleadi tubudiao ‘idi ona‘upa‘upa ia da nua‘i‘isina, taudi ia ‘au‘ewedima ‘asa Aigupitoega ‘ebeloinao matadia, be ia da ‘idi Eaubada: ‘Abo‘agu Ieoba.

⁴⁶ Getedi loina tomwanao ta ‘ebebwa‘omatanaiao, ta loinao, taudi Ieoba ‘i mweruruidi tauna ta Iseraela tubunao mwatuidia ‘oea Sinai ‘ena Mose nimanega.