Loina 25 - Buki Tabu Lowaenei 1919

‘UPWA 25.

¹ Ta Ieoba ‘i ona Mose ‘ena ‘oea Sinai ‘enaia, ‘i gwae,

² Iseraela tubunao ‘edia ‘u da gwae, ta ‘u da eonedi, ‘Ena wa apwesa ‘asa ia ‘ebwa‘ebwaemi ‘enaia, ga bwa‘a nina sabate ‘i da ‘ita‘i‘isina Ieoba ‘enaia.

³ Iakwara ‘e sikisi ‘imu bagura ‘u da dauna, ta iakwara e sikisi ‘imu bagura‐oine ‘u da ‘upwa be ‘i da garu, ta uanao ‘u da egogona;

⁴ Ta iakwara ‘e sebeni nina ‘i da sabate eiawai‘ata mwaumwau bwa‘a manuna, sabate Ieoba ‘enaia: gea‘abo bagura ‘u daudauni, nai bagura‐oine u ‘upwa‘upwa be ‘i gagaru.

⁵ Tauna iage nina ‘i tabwa daita ‘imu sesoiega gea‘abo u ‘upwa‘upwa, ta ‘imu oine nigea ‘upwenamo uanao gea‘abo ‘u egogonedi: ‘i da ‘eiakwara eiawai‘ata mwau bwa‘a manuna.

⁶ Ta bwa‘a ‘ina sabate ‘i da e ‘ami masura manuna, manuio, ta ‘imu to guinua me‘olotona be mewainena manudi, ta imu to guinua e‘isa‘isana manuna ta ‘imu to‘u‘umara ma‘ieaio wa miami manuna;

⁷ Ta ‘imu bulomakau manudi, ta lagolagowa ‘imu ‘asaia si miami manudi, bwa‘a ‘ina sinabwa maibo‘ana ‘i da miami masura manuna.

⁸ Ta ‘u da sawa ‘emuia sabate iakwara ‘e sebeni, iakwarao ‘e sebeni gieiau ‘e sebeni; ta ‘emuia si da miami sabate iakwara ‘e sebeni ‘ana ‘asiataiao, tuga iakwara ‘e poti naine.

⁹ Ga ioguli ‘enana sinabwana ‘u da etune dadane nawarae ‘e sebeni nina ‘ana asiata ‘e teni nina; gienua‐‘ebweuna ‘ana asiata ‘enega ioguli wa da etune dadanei ‘imi ‘asa maibo‘ana ‘enaia.

¹⁰ Ta iakwara ‘e pipiti nina ‘u da etabuna, ta li‘ama wa da wananae ‘asa ‘enaia ‘ana tomianao iauiauna ‘edia: ‘i da iubile ‘emia; ta wa da ‘ila tai iauna ‘ana ‘ebe‘ewa ‘enaia, ta wa da ‘ila tai iauna ‘ina susu ‘enaia.

¹¹ Iakwara ‘e pipiti nina ‘i da iubile ‘emia: gea‘abo wa daudauna, nai iage ‘i tabwa daita ‘enaia wa da sesoi, nai oine nigea ‘upwenamo wa da egogona.

¹² Tauna iubile ta ‘enega; ‘i da etabu ‘emia: ‘ina sinabwa bagurega wa da ‘e‘ani.

¹³ Iakwara iubile gete ‘ena wa da ‘ila tai iauna ‘ana ‘ebe‘ewa ‘enaia.

¹⁴ Ta ‘abo ‘e bweu iage ‘u gimwanie gosiaio ‘enaia, nai gosiaio nimanega ‘u lagwa, gea‘abo wa guinua geiogeioi ‘e bweuna ‘e bweuna ‘enaia:

¹⁵ Na‘ieana iakwara ‘adi iau iubile murinaia gosiaio ‘enega ‘u da gimwani, ta na‘ieana sesoi ‘adi iakwara ‘adi iau ‘i da gimwani ‘emuia.

¹⁶ Na‘ieana iakwara ‘adi iau ‘ana e‘isa ‘u da giesinabwa, ta na‘ieana iakwara pu‘epu‘edi ‘ana e‘isa ‘u da gimwa‘uta; sesoi ‘adi iau manuna ‘i gimwani ‘emuia.

¹⁷ Ta gea‘abo wa da guiguinua geiogeioi ‘e bweuna ‘e bweuna ‘enaia; ta ‘imu Eaubada ‘u da ‘amaiabena: ‘Abo‘agu Ieoba ‘imu Eaubada ta ‘enega.

¹⁸ Ta ‘enega ‘igu loina tomwanao ‘u da guinuedi, ta ‘igu loinaiao ‘u da ‘ita‘i‘isidi be ‘u da guinuedi; ta ‘asa ‘ena wa da mia guguia.

¹⁹ Ta ‘asa uana ‘i da uaua, ta wa da ‘e‘ai ga sawesawemia, ta ‘ena wa da mia guguia.

²⁰ Ta ‘abo wa ona, To‘ase ‘a da ‘e‘ai iakwara ‘e sebeni nina? Wa ‘ita, nigea ‘a daudauna, nai ‘ima iage ‘i sinabwa ‘a da egogone:

²¹ Ga ‘igu oboboma ia da sa‘u ‘emia iakwara ‘e sikisi nina ‘enaia, ta ‘i da ualoebwaina iakwara ‘etoi manudi.

²² Ta iakwara ‘e eta nina wa da dauna, ta uana ‘ediega wa da ‘e‘ai, gimi ‘alagawa; ga iakwara e naine nina, ga uanao si da ruguma, ga ‘alagawa wa da ‘enina.

²³ Ta bwa‘a gea‘abo wa gimwagimwane ‘ataia; bwa‘a ‘igu iage ta ‘enega: ‘omi to‘u‘umara ta sugalagala ma‘eguao ta ‘enega.

²⁴ Ta ‘imi ‘ebe‘ewa ‘ana bwa‘a maibo‘ana ‘enaia ‘ewalimana wa da tagwara bwa‘a manuna.

²⁵ ‘Abo tasio ‘i egomabeso, ta ‘ina iage tupwana ‘i gimwagimwani‘ena, ga tai ‘ina susu tauna serabenaia ‘i da mai, be iage tasina ni‘atu ‘i gimwani‘ena ‘i da ‘ewalimana.

²⁶ Ta ‘abo tai nigea ‘e bweu ‘ina susuiega be i ‘ewalimana, ta tauna ‘i esaesa ta ‘ana ‘ewalimana sawasawenaia ‘i lobena;

²⁷ Ga ‘ina gimwani ‘ana iakwarao ‘i da sawedi, ta ‘ana sinabwa ‘i da sinabwa sinena tai ‘enega ‘i gimwaniena ‘i da ‘ebwaea limana ‘enaia; ta ‘ina iage ‘ena ‘i da ‘ila.

²⁸ Ta ‘abo nigea ‘i ‘ewaiwai be tauna ‘i da ‘ewa‐limana, ga iage nina ni‘atu ‘i gimwaniena ga tai ‘i lagwelagwena ‘ena ‘i da miami ga iakwara iubile: ta iubile ‘ena ‘i da apwesa, ta ‘i da ‘ila ‘ina iage ‘enaia.

²⁹ Ta ‘abo tai anua ‘asa ma‘ana ‘ari ‘enaia ‘i gimwaniena, ga iakwara ‘e bweu maibo‘ana ‘i da ‘ewalimena; iakwara ‘e bweuna maibo‘ana kapekapeana ‘i da ‘ewalimena.

³⁰ Ta ‘abo nigea i ‘ewalimena iakwara ‘e bweuna maibo‘ana ‘ana tuta, ga anua nina ‘asa ma‘ana ‘ari ‘ena ‘i miami ‘i da mia ‘ai‘aila ataia tauna ‘i lagwelagwena ‘enaia, ‘ana epata‐tomota ‘edia: gea‘abo ‘i da apwesa iubile ‘enaia.

³¹ Ta ‘asa gidaridi nigea ‘ari sakowasimo ‘idi anua si da sawa ‘asa ‘ina bagurao ma‘edi: taudi si da ‘ewalimedi, ta si da apwesa iubile ‘enaia.

³² Ta me Lebi ‘idi ‘asa sinabwadi, ‘idi iage ‘ebe‘ewa ‘ana ‘asa sinabwadi ‘adi anuao, me Lebi si da ‘ewalimedi tuta besobeso ‘enega.

³³ Ta ‘abo goma Lebi ‘e bweuna i ‘ewalimena, ga anua ‘i gimwani, ta ‘ina ‘ebe‘ewa ‘ana ‘asa, si da apwesa iubile ‘enaia: me Lebi ‘idi ‘asa ‘idi anua taudi ‘idi ‘ebe‘ewa Iseraela tubunao gamwagamwanidia.

³⁴ Ta ‘idi ‘asa ‘idi bagura etaulunaia si miami gea‘abo si da gimwagimwanie; tauna ‘idi ‘ebe‘ewa ataia ta ‘enega.

³⁵ Ta ‘abo tasio ‘i egomabeso, ta nimana ‘i neneta ga ma‘ieaio; ga ‘u da lemena: ‘atua to‘u‘umara ta sugalagala ma‘ieaio wa da miami.

³⁶ Loeposeana nai giesinabwa gea‘abo ‘enega u ‘ewa‘ewa; ta ‘imu Eaubada ‘u da ‘amaiabena: be ‘enega tasio ‘i da miamia ma‘ieaio.

³⁷ Gea‘abo ‘imu mani ‘u da ‘ebwa‘ebwaeae loeposeana manuna, nai ‘imu masura ‘u da ‘ebwaena iage sinabwana manuna.

³⁸ ‘Abo‘agu Ieoba ‘imi Eaubada, taugu ia ‘au‘ewemi ‘asa Aigupito ‘enega, be ‘asa Kanania ia da ‘ebwaemi, be ‘abo‘agu ‘imi Eaubada.

³⁹ Ta ‘abo tasio ‘i egomabeso ga ma‘ieaio, ta ‘i gimwaniena tauna ‘emuia; gea‘abo ‘u bubuna be ‘i guinua ‘atua to‐guinua ioniionina;

⁴⁰ ‘Atua to guinua e‘isana, ta ‘atua sugalagala, ‘i da miami ma‘ieaio; ta ‘i da guinua ma‘ieaio ga iakwara iubile:

⁴¹ Ga ‘emuiega ‘i da apwesa, tauna ta natunao ma‘enao, ta ‘ina susu tauna ‘ena ‘i da ‘ila, ta tamanao ‘idi ‘ebe‘ewa ‘ena ‘i da ‘ila.

⁴² Taudi ‘igu to‐guinuao ta ‘enega, taudi ia ‘au‘ewedima ‘asa Aigupito ‘enega: gea‘abo wa da gimwagimwaniedi tai ioniionidi ‘atua.

⁴³ Gea‘abo ‘ena ‘u loina didiga; ta ‘imu Eaubada ‘u da ‘amaiabena.

⁴⁴ Ta ‘imu tai ioniionidi, ta ‘imu iine ioniionidi, taudi wa da ‘ewa; ‘ebeloina si mia sakowasiemi ‘ediega, taudi ‘ediega tai ioniionidi ta iine ioniionidi wa da lagwadi.

⁴⁵ Wate to‘u‘umara ‘emia si e sugalagala natudiao ‘ediega, taudi ‘ediega wa da lagwadi, ta ‘idi susu si miamia ma‘emiao ‘ediega, taudi si enatunedi ‘imi ‘asa ‘enaia: ta taudi si da ‘imi iage.

⁴⁶ Ta wa da bubudi be si da e ‘ebe‘ewa natumiao manudi murimia, be si giiai ‘idi iage; ‘ediega wa da ‘ewa ‘imi tai ioniionidi ataia: ta tasimiao Iseraela tubunao gea‘abo ‘edia wa loina didiga, ‘e bweuna ‘e bweuna ‘enaia.

⁴⁷ Ta ‘abo to‘u‘umara nai sugalagala ma‘emi ga ni‘atu i ‘eesaesa, ta tasio ‘i egomabeso deinaia, ta ‘i gimwaniena tauna to‘u‘umara nai sugalagala ma‘emi ‘enaia, nai to‘u‘umara ‘ina susu tubuna ‘enaia:

⁴⁸ ‘Ana gimwani murinaia kapekapeana si da li‘amina; tasina ‘e bweuna kapekapeana ‘i da ‘ewalimena:

⁴⁹ Nai wana, nai wana natuna, ‘i da ‘ewalimena, nai ‘e bweu ‘ina susu ‘enega tauna serabenaia ‘i da ‘ewalimena; nai ‘abo i ‘eesaesa, ‘i da gimwani lima tauna.

⁵⁰ Ta tauna ‘i lagwelagwena ma‘ieana ‘i da sawa iakwara ‘i gimwaniena tauna ‘enaia ga iakwara iubile: ta ‘ana gimwani ‘i da na‘ieana iakwara ‘adi iau; na‘ieana to‐guinua e‘isana ‘ana tuta ‘i da miamia ma‘ieana.

⁵¹ ‘Abo iakwara iauna si miami, nadigega iakwara nidi ‘ana ‘ewalimana ‘ana e‘isa ‘i da ‘ilena mani ‘enega si gimwanena manuna ‘enega.

⁵² Ta ‘abo iakwara pu‘epu‘edi si miami ga iakwara iubile, ga ‘i da sawa ma‘ieana; nadigega ‘ina iakwarao ‘ana ‘ewalimana ‘ana e‘isa ‘i da ‘ilena.

⁵³ ‘Atua to guinua e‘isana iakwara be iakwara ‘i da miamia ma‘ieana: gea‘abo ‘ena ‘i da loina didiga matamuia.

⁵⁴ Ta ‘abo nigea iage getedi si da li‘amina, ga ‘i da apwesa iakwara iubile ‘enaia, tauna, ta natunao ma‘enao.

⁵⁵ ‘Eguia Iseraela tubunao si ‘etoguinuao ta ‘enega; taudi si ‘igu to guinuao taudi ia ‘au‘ewedima ‘asa Aigupito ‘enega: ‘abo‘agu Ieoba ‘imi Eaubada.