Loina 24 - Buki Tabu Lowaenei 1919

‘UPWA 24.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ‘aene bunama olibe ‘esasena tututuna si da me‘ena ‘emuia ma‘edana manuna, be maieare ‘i da ‘arata ataia.

³ ‘Ebee‘ita ‘ana ‘auboda guinaia, ‘ebeeloba ‘ana anua‐kaleko ‘enaia, Aarona ‘i da sa‘u ‘ai‘ailina asuinuenuega ga gonagona Ieoba matanaia tuta iauiauna: tauna ‘i da loina tomwana ataia ‘imi epata‐tomota ‘edia.

⁴ Maieareao ‘ebesa‘u ‘esasena ‘ena ‘i da sa‘u ‘ai‘ailidi Ieoba matanaia tuta iauiauna.

⁵ Ta palaua emutuna ‘u da ‘ewa, ta keike ‘e twelu ‘enega ‘u da gabu; keike ‘e bweuna keiga‐epa ‘ana ‘upwa sanau ‘e rua.

⁶ Ta raba ‘e rua ‘edia ‘u da sa‘udi, raba ‘e bweuna ‘e sikisi, tebeli ‘esasena ‘enaia Ieoba matanaia.

⁷ Ta mu‘ana ‘esasena ‘u da sa‘u raba ‘e bweuna ‘e bweuna ‘enaia, be ‘i da ‘ebenua‘i‘isi palaua ‘enaia, tuga ‘ebwaeadaita si bubuna aweiega Ieoba ‘enaia.

⁸ Asiata sabate iauna ‘enega ‘i da sa‘u ‘ai‘ailina Ieoba matanaia tuta iauiauna; tauna Iseraela tubunao leleadi, ona‘upa‘upa ‘i mia ataia.

⁹ Ta ‘i da e Aarona manuna ta natunao me‘olotodi manudi; ta si da ‘enina esena tabu ‘enaia: tauna Ieoba ‘ana ‘ebwaeadaita si bubuna aweiega ‘adi to etabu sana ‘enaia loina miaataia ‘enega.

¹⁰ Ta waine Iseraela natuna me‘olotona, tauna tamana goma Aigupito, ‘i tauiawa Iseraela tubunao gamwagamwanidia; ta Iseraela wainena natuna ta ‘e bweu tai goma Iseraela si e‘upwa ‘asa gamwanaia;

¹¹ Ta Iseraela wainena natuna Esana Nina i ‘inana besobesona, ta ‘i elia: ta si me‘ena Mose ‘enaia. Ta sinana ‘ana ‘esana Selomita, Dibiri natuna, Dana ‘ina susu ‘enega.

¹² Ta anua‘ebeiona ‘ena si sa‘una, be Ieoba ‘awanega ‘edia ‘i da simana.

¹³ Ta Ieoba ‘i ona Mose ‘enaia, ‘i gwae,

¹⁴ Tauna ‘i elia ‘u da me‘ena ‘asa etaulunaia; ta iauiaudi si nonona nimadi si da sa‘u debanaia, ta deriegogona maibo‘ana si da lo‘ibwe‘ibwena.

¹⁵ Ta ‘u da ona Iseraela tubunao ‘edia, ‘u da gwae, Tauna ‘ina Eaubada ‘i eliena ‘ina loegesi ‘i da ‘a‘ari.

¹⁶ Ta tauna Ieoba ‘ana esana i ‘inana besobesona, si da loemwawasa ‘ai‘ailina; deriegogona maibo‘ana si da lo‘ibwe‘ibwe‘ai‘ailina: to‘u‘umara, na‘ieana to tubua ‘asaia, ‘ena Esana Nina i ‘inana besobeso, si da loemwawasina.

¹⁷ Ta tauna tai ‘e bweuna ‘i ununa ga ‘i mwawasa si da loemwawasina;

¹⁸ Ta tauna iobai ‘i ununa ga ‘i mwawasa ‘i da e‘isa: maiawasina maiawasina manuna.

¹⁹ Ta ‘abo ‘e bweu tai gosiana ‘ana kiiakiiama ‘i sa‘u; na‘ieana ‘i guinua, na‘ieana wate si da guinua ‘enaia;

²⁰ Kiiakiiama kiiakiiama manuna, mata mata manuna, sara sara manuna: na‘ieana tai ‘ana kiiakiiama ‘i sa‘una, na‘ieana wate si da guinua ‘enaia.

²¹ Ta tauna lagolagowa ‘i loemwawasina ‘i da e‘isa ‘ai‘aila: ta tauna tai ‘i ununa ga ‘i mwawasa si da loemwawasina.

²² Loina ‘ana bubuna ‘e bweuna ‘emia, na‘ieana to‘u‘umara ‘enaia, na‘ieana to tubua ‘asaia: ‘Abo‘agu Ieoba ‘imi Eaubada ta ‘enega.

²³ Ta Mose ‘i ona Iseraela tubunao ‘edia, ta tauna to elia nina si ‘au‘ewenama ‘asa ‘etaulunaia, ta gurewega si lo‘ibwe‘ibwena. Ta Iseraela tubunao si guinua na‘ieana Ieoba ‘i ona Mose ‘ena.