Loina 23 - Buki Tabu Lowaenei 1919

‘UPWA 23.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da gwae, ta ‘edia ‘u da ona, Ieoba ‘ina sagari ma‘adi tuta, taudi wa ‘inanedi be si da bwauegogona tabu, taudi tuga ‘igu sagari ma‘adi tuta.

³ ‘Asiata ‘e sikisi guinua si da bubudi; ta asiata ‘e sebeni nina ‘enega tauna ‘eiawai‘ata mwaumwau, bwauegogona tabu; gea‘abo ‘e bweu iage wa da guiguinue: tauna sabate Ieoba ‘enaia ‘imi anua iauiauna ‘edia.

⁴ Getedi Ieoba ‘ina sagari ma‘adi tuta, tugama bwauegogona tabuiao, taudi wa da ‘inanedi ‘adi tuta ‘aseiana ‘edia.

⁵ Nawarae ‘e bweuna, nawarae nina ‘ana asiata ‘e potini nina ‘enaia ‘asuinuanuaia, tauna Ieoba ‘ina Taona.

⁶ Ta tauna nawarae nina ‘ana asiata ‘e pipitini nina tauna palaua nigea malebeninamo ‘ana sagari Ieoba ‘enaia: asiata ‘e sebeni palaua nigea malebeninamo wa da ‘e‘ai.

⁷ Asiata ‘e bweuna nina bwauegogona tabu wa da iagena: gea‘abo guinua mwau wa da bubuna.

⁸ Ta ‘ebwaeadaita aweiega wa da ‘ebwaea Ieoba ‘enaia asiata ‘e sebeni ‘edia: asiata e sebeni nina tauna bwauegogona tabu; gea‘abo ‘e bweu guinua mwau wa da bubuna.

⁹ Ta Ieoba ‘i ona Mose ‘enaia, ‘i gwae,

¹⁰ Iseraela tubunao ‘edia ‘u da gwae, ta ‘edia ‘u da ona, ‘Ena wa apwesa ‘asa ia ‘ebwaemi ‘enaia, ta ‘ina sesoi wa ‘upwena, ga ‘imi sesoi ‘ina gimi uana ‘ana bwagila wa da me‘ena to taria ‘enaia.

¹¹ Ta bwagila nina ‘i da lo‘uio Ieoba matanaia, be ‘i da ‘ewena manumi: sabate murinaia ga ‘i da ‘ulisi be to‐taria ‘i da lo‘uio‘ena.

¹² Ta asiata ‘enega bwagila wa lo‘uioe, lami me‘olotona nigea ma‘ina to‘umalinamo ‘ana iakwara ‘e bweuna wa da ‘ebwaea ‘ebwaeadaita‐gabugabu manuna Ieoba ‘enaia.

¹³ Ta ‘ana ‘ebwaea‐rabia ‘i da e palaua ‘emutuna keiga epa ‘ana ‘upwa‐sanau ‘e rua si ilienoenowena bunama ma‘ieana, ‘ebwaeadaita aweiega Ieoba ‘enaia maina dibidibi: ta ‘ana ‘ebwaea‐numanuma ‘i da oineiega, keiga iina ‘ana ‘upwa ‘e atana.

¹⁴ Ta gea‘abo palaua wa da ‘e‘ai, nai witi e‘e‘arana, nai witi sorudi, ga tauna asiata gete nina, ga ‘imi Eaubada ‘ana ‘ebwaeadaita wa me‘ena ni‘atu: tauna loina ataia ‘imi epata ‘edia ‘imi anua iauiauna ‘edia.

¹⁵ Ta wa da sawa ‘emia sabate murinaia ga tomwa‘uli‘ulitaia‘ega, asiata ‘enega ‘ebwaeadaita‐lo‘uio ‘ana bwagila wa me‘ena; sabate ‘e sebeni maibo‘ana.

¹⁶ Tuga sabate ‘e sebeni nina murinaia ga tomwa‐‘uli‘ulita ‘enaia wa da sawa asiata ‘e pipiti; ta ‘ebwaeadaita rabia auauna wa da ‘ebwaea Ieoba ‘ena.

¹⁷ ‘Imi anua ‘ediega palaua‐‘ebelo‘uio puli ‘e rua keiga epa ‘ana ‘upwa sanau ‘e rua ‘enega wa da me‘edi: palaua ‘emutuna ‘enega, gabugabudi lebeni ma‘edi, gimi uana manudi Ieoba ‘enaia.

¹⁸ Ta wa da ‘ebwaea palaua ma‘ieana lami e sebeni nigea ma‘idi to‘umalinamo ‘adi iakwara ‘e bweunamo, ta bulomakau menonoiana ‘e bweuna, ta sipi me‘olotodi ‘e rua: si da e‘ebwaeadaita gabugabu Ieoba ‘enaia, ma‘idi ‘ebwaeadaita‐rabia, ta ma‘idi ‘ebwaeadaita numanuma, tuga ‘ebwaeadaita si bubuna aweiega, maina dibidibina Ieoba ‘enaia.

¹⁹ Ta gota‐me‘olotona ‘e bweuna wa da ‘ebwaea loegesi ‘ana ‘ebwaeadaita manuna, ta lami me‘olotodi ‘e rua ‘adi iakwara ‘e bweuna ‘ebwaeadaita guguia ‘ana taria manuna.

²⁰ Ta to taria ‘i da lo‘uio‘edi gimi uana ‘ina palaua ma‘ieana ‘ebwaeadaita lo‘uio Ieoba matanaia, lami nidi ‘e rua ma‘edi: si da etabu Ieoba ‘ena to taria manuna.

²¹ Ta wa da wanana tauna asiata nina ‘enega; bwauegogona tabu ‘i da apwesa ‘emia: guinua ‘ana mwau gea‘abo ‘e bweu wa da bubuna: tauna loina ataia ‘imi anua iauiauna ‘edia ‘imi epata‐tomota ‘edia.

²² Ta ‘ena ‘imi ‘asa ‘ina sesoi wa ‘upwa, gea‘abo ‘imu bagura tupitupinao maibo‘ana u ‘upwa‘upwa, ta gea‘abo ‘imu sesoi sumwasumwanina ‘u da ‘egogona: ‘u da pilisinedi gomabeso manudi, ta to‘u‘umara manudi; ‘Abo‘agu Ieoba ‘imi Eaubada.

²³ Ta Ieoba ‘i ona Mose ‘enaia, ‘i gwae,

²⁴ Iseraela tubunao ‘edia ‘u da gwae, ‘u da ona, Nawarae ‘e sebeni nina ‘enega, nawarae nina ‘ana asiata ‘e bweuna ‘enega, ‘i da eiawai‘ata mwaumwau ‘emia, ‘ebenua‘i‘isi ioguli ‘idi gwane ‘enega, bwauegogona tabu.

²⁵ Guinua ‘ana mwau gea‘abo ‘e bweu wa da bubuna: ta ‘ebwaeadaita si bubuna aweiega wa da ‘ebwaea Ieoba ‘enaia.

²⁶ Ta Ieoba ‘i ona Mose ‘enaia, ‘i gwae,

²⁷ Gete tuga nawarae ‘e sebeni nina gete ‘ina asiata ‘e teni nina tauna asiata gienua ‘ebweu: ‘i da ‘e bwauegogona tabu ‘emia, ta iaruiaruami wa da gie‘elo‘uiadi; ta ‘ebwaeadaita si bubuna aweiega wa da ‘ebwaea Eaubada ‘enaia.

²⁸ Ta asiata tauna gote gea‘abo ‘ena ‘e bweu guinua wa da iageiage: tauna asiata gienua ‘ebweu manuna, be si gienua ‘ebweu manumi Ieoba ‘imi Eaubada matanaia.

²⁹ Ta iaruiarua nai nigea i ‘elo‘uia asiata tauna gote ‘enega, ‘ina tomota ‘ediega si da ‘upwa iaulena ta ‘enega.

³⁰ Ta to iaruiarua nai guinua ‘e bweuna ‘i iagena asiata tauna gote, iaruiarua gote ia da loesaoori ‘ina tomota ‘ediega.

³¹ Gea‘abo ‘e bweu guinua wa iageiage: tauna loina ataia ‘imi epata‐tomota ‘edia ‘imi anua iauiauna ‘edia.

³² ‘I da e sabate eiawai‘ata mwaumwau ‘emia, ta iaruiaruami wa da gie‘elo‘uiadi; nawarae ‘ana asiata ‘e naine nina ‘asuinuanuaia, ‘asuinuanua ga ‘asuinuanua, ‘imi sabate wa da ‘ita‘i‘isi.

³³ Ta Ieoba ‘i ona Mose ‘enaia, ‘i gwae,

³⁴ Iseraela tubunao ‘edia ‘u da ona, ‘u da gwae, Nawarae ‘e sebeni nina gete ‘ana asiata ‘e pipitini nina tauna anua ioeioe ‘ana sagari asiata ‘e sebeni Ieoba ‘enaia.

³⁵ Asiata ‘e bweuna ‘i da bwauegogona tabu: gea‘abo ‘e bweu guinua mwauna wa da iageiage.

³⁶ Asiata ‘e sebeni ‘ebwaeadaita si bubuna aweiega wa da ‘ebwaea Ieoba ‘enaia: asiata ‘e eta nina tauna ‘i da bwauegogona tabu ‘emia; ta ‘ebwaeadaita si bubuna aweiega wa da ‘ebwaea Ieoba ‘ena: tauna deriegogona mwaumwau; gea‘abo guinua mwauna ‘e bweu wa da iagena.

³⁷ Taudi gete Ieoba ‘ana sagari ma ‘adi tuta, taudi wa da wanana‘edi bwauegogona tabuiao, be ‘ebwaeadaita si bubuna aweiega wa da ‘ebwaea Ieoba ‘enaia, ‘ebwaeadaita gabugabu be, ‘ebwaeadaita rabia be, taria, ta ‘ebwaeadaita numanuma, ‘e bweuna ‘e bweuna tauna ‘ina asiata ‘enaia:

³⁸ Wate Ieoba ‘ina sabateiao, ta wate ‘imi ‘ebwaea gwegwe, ta wate ‘imi ona‘upa‘upa iauiaudi, ta wate ‘imi ‘ebwaeadaita manua‘ai‘ailimi iauiaudi, taudi wa ‘ebwaea Ieoba ‘enaia.

³⁹ Ta wate nawarae ‘e sebeni nina ‘ina asiata ‘e pipitini nina, ‘ena ni‘atu ‘asa uanao wa egogonedi, Ieoba ‘ina sagari wa da ‘ita‘i‘isi asiata ‘e sebeni: asiata ‘e bweuna ‘ena ‘i da eiawai‘ata mwauna, ta asiata ‘e eta nina ‘i da eiawai‘ata mwauna.

⁴⁰ Ta asiata ‘e bweuna ‘enega kaiwe bobo‘adi uadi wa da ‘ewa ‘emia, bodaboda naridi, kaiwe tagatagaridi naridi be, sa‘asa‘ara kaiwenao be; ta wa da guausoara Ieoba ‘imi Eaubada matanaia asiata ‘e sebeni.

⁴¹ Ta wa da ‘ita‘i‘isina sagari Ieoba ‘enaia asiata ‘e sebeni iakwara ‘e bweuna ‘enaia: tauna loina ataia ‘imi ‘epata tomota ‘edia: wa da ‘ita‘i‘isina nawarae ‘e sebeni nina ‘enaia.

⁴² Anua ioeioe ‘ena wa da miami ga asiata ‘e sebeni; iauiaudi si tubua ‘asaia Iseraela ‘ena si da miami anua‐ioeioe ‘edia.

⁴³ Be ‘enega ‘imi epata‐tomota si da mwaratoni ‘aene Iseraela tubunao ia loinedi be ioeioe ‘edia si da miami, tuta ‘enega ia ‘au‘ewedi ‘asa Aigupito ‘enega: ‘Abo‘agu Ieoba ‘imi Eaubada.

⁴⁴ Ta Mose Ieoba ‘ina sagariao ma ‘adi tuta ‘i simanedi Iseraela tubunao ‘edia.