Loina 22 - Buki Tabu Lowaenei 1919

‘UPWA 22.

¹ Ta Ieoba ‘i ona Mose ‘enaia, ‘i gwae,

² Aarona ta natunao ‘edia ‘u da ona, ‘aene Iseraela tubunao ‘idi iage tabu ‘ediega si da miadumaduma, taudi si gie‘esasedi ‘eguia, ta ‘aene gea‘abo ‘agu esana tabu si da gibesobeso: ‘Abo‘agu Ieoba.

³ ‘Edia ‘u da gwae, Tauna tubumiao iauiaudi ‘ediega ‘imi epata‐tomota ‘edia, tauna iage tabu ‘edia ‘i doro, taudi Iseraela tubunao si gie‘esasedi Ieoba ‘enaia, ‘abo ma‘ina bi‘i, iaruiarua gote si da ‘upwa‐iaulena mataguiega; ‘Abo‘agu Ieoba.

⁴ To tai nai Aarona tubuna ‘i lepero, nai oona daudauna; iage tabu gea‘abo ‘ediega ‘i da ‘e‘ai, ga ‘i da ‘esasena bemi. Ta tauna iage ‘e bweuna ‘i bi‘i kokoa manuna ‘i gitoona, nai tai tauna aiona ‘enega ‘i apwesa;

⁵ Nai tauna iage kawakawarina ‘i gitoona, be ‘enega ‘i da bi‘i, nai tai tauna ‘enega bi‘i ‘i da ‘ewena, to bi‘i nai ‘ena ‘i miamiana;

⁶ Iaruiarua iage nadigega ‘i gitoona ‘i da bi‘i ga ‘asuinuanua, ta iage tabu gea‘abo ‘ediega ‘i da ‘e‘ai, ‘abo nigea esiona i ‘e‘esiwena boasi ‘enaia.

⁷ Ta ni‘atu sinara ‘i mwa‘uta ga ‘i da ‘esasena; ta muriega ‘i da ‘e‘ai iage tabu ‘ediega, tauna ‘ana masura ta ‘enega.

⁸ Iage ‘i mwawasa tauna, nai bomitawa si sabusabuna, gea‘abo i ‘e‘ani be ‘enega ‘i da giebi‘ina: ‘Abo‘agu Ieoba.

⁹ ‘Igu ba‘e si da ‘ita‘i‘isi ta ‘enega, ‘abona nai loegesi si da ‘a‘ari manuna, ta ‘ena si mwawasa, ‘abo si gibesobeso; ‘Abo‘agu Ieoba taugu ia gie‘esasedi.

¹⁰ Gea‘abo ‘e bweu to‘u‘umara iage tabu ‘enega ‘i da ‘e‘ai: to‐taria ‘ina to‘u‘umara, nai ‘ina toguinua e‘isa‘isana, gea‘abo iage tabu ‘enega ‘i da ‘e‘ai.

¹¹ Ta ‘abo to taria iaruiarua ‘e bweuna ‘i lagwena, ‘ina mani ‘ana e‘isa, ‘enega ‘i da ‘e‘ai; ta taudi nadigega ‘ina anua ‘ena si tubua, taudi ‘ina masurega si da ‘e‘ai.

¹² Ta ‘abo to taria natuna mewainena to‘u‘umara ‘i aina, gea‘abo waine nina iage tabu ‘adi ‘ebwaeadaita gilagata ‘enega ‘i da ‘e‘ani.

¹³ Ta ‘abo to taria natuna ‘i kwabura, nai sa‘isa‘ilina, ta nigea natunamo, ta ‘i da ‘ila tamana ‘ina anuaia, ‘atua ‘ina tuta gomagweine, tamana ‘ina masurega ‘i da ‘e‘a; ta gea‘abo ‘e bweu to‘u‘umara ‘enega ‘i da ‘e‘ai.

¹⁴ Ta ‘abo ‘e bweu tai iage tabu nina i ‘e‘ani ta nigea ‘i nuanua, ga ‘ana tomwana ‘enimana ‘ena ‘i da sa‘u, ta iage tabu nina to‐taria ‘ena ‘i da ‘ebwaea.

¹⁵ Ta Iseraela tubunao ‘idi iage tabu, taudi Ieoba ‘ena si ‘ebwaeadaita, gea‘abo si da gibesobeso;

¹⁶ Ta nadigega si da bubudi be taudi ‘awato‘umali si me‘ena bubuna bokobokona si da ‘a‘arina, ‘ena ‘idi iage tabu si ‘e‘ai: ‘Abo‘agu Ieoba taugu ia gie‘esasedi ta ‘enega.

¹⁷ Ta Ieoba ‘i ona Mose ‘enaia, ‘i gwae,

¹⁸ Aarona ‘ena ‘u da ona, ta natunao ‘edia, ta Iseraela tubunao iauiaudi ‘edia, ta ‘edia ‘u da gwae, Tauna Iseraela ‘ina susuiega, ta to‘u‘umara Iseraela ‘ena ‘ediega, ‘ina ‘ebwaeadaita ‘i da ‘ebwaea, nai ‘idi ona‘upa‘upa ‘e bweuna, nai ‘idi ‘ebwaeadaita ‘e bweuna, taudi Ieoba ‘ena si da ‘ebwaea ‘ebwaeadaita‐gabugabu manuna;

¹⁹ Be ‘enega nuana ‘i da bobo‘ana ‘emia, me‘olotona nigea ma‘ina to‘umalinamo wa da ‘ebwaea‘ena, bulomakau ‘ediega, sipi ‘ediega, nai gota ‘ediega.

²⁰ Ta to‘ase nai ma‘ina to‘umalina, nate gea‘abo wa da ‘ebwa‘ebwaeae gea‘abo ‘i nuanuana manumi ta ‘enega.

²¹ Ta tauna ‘ebwaeadaita guguia ‘ana taria i ‘ebwaea Ieoba ‘ena be ona‘upa‘upa ‘i loegumwarina, nai ‘ebwaeadaita manuna, bulomakau ‘ana iau ‘enega nai sipi ‘ana iau ‘enega, ‘i da bobo‘ai‘ailina be ‘enega ‘i da nuanuana; nigea ‘e bweu to‘umalinamo ‘enaia.

²² Matakebokebona, nai lasalasana, nai pegopegona, nai bonubonuna, nai ma‘ana gaoia, nai ‘isi‘isina, gea‘abo getedi wa da ‘ebwa‘ebwaea‘edi Ieoba ‘enaia, nai wa da ‘ebwaea aweiega ‘ediega ‘ebetaria ‘enaia Ieoba ‘ena.

²³ Nai bulomakau nai lami ma‘ina iage sinabwawawasae nai ma‘ina iage gidarawawasae, ‘u da ‘ebwaea‘ena ‘ebwaeadaita manuna; ta ona‘upa‘upa manuna gea‘abo ‘i da nuanuana.

²⁴ Tauna kwawana ‘au‘aue‘umulina, nai ‘au‘au‘ida‘idana, nai ‘au‘aupisarina, nai ‘au‘upana, gea‘abo wa ‘ebwa‘ebwaeae Ieoba ‘enaia; ta gea‘abo wa da guinua nadigega ‘imi ‘asa ‘enaia.

²⁵ Ta gea‘abo to‘u‘umara nimanega ‘imi Eaubada ‘ina masura wa ‘ebwa‘ebwae iage getedi ‘e bweuna ‘ediega; ‘idi ‘ebeto‘umalina ‘edia ‘i miami ta ‘enega, to‘umalina ‘edia ‘i miami; gea‘abo ‘idi ‘ebwa‘ebwaea ia da nuanuana manumi.

²⁶ Ta Ieoba ‘i ona Mose ‘enaia, ‘i gwae,

²⁷ ‘Ena bulomakau, nai sipi, nai gota, ‘i tubua, ga asiata ‘e sebeni sinana ‘ena ‘i da miami; ta asiata ‘e eta nina ga muriega ‘i da bobo‘ana ‘ebwaeadaita aweiega ‘ana ‘ebwaea manuna Ieoba ‘enaia.

²⁸ Ta bulomakau me wainena nai sipi me wainena, gea‘abo wa unuunu natuna ma‘ieana asiata ‘e bweunega.

²⁹ Ta ‘ena lokagutoki ‘ana taria wa taria Ieoba ‘enaia, wa da tariena be wa da bobo‘ana matanaia.

³⁰ Asiata tauna ‘enega wa da ‘enina; gea‘abo ‘e bweu wa da pilipilisinena ga gonagonaia; ‘Abo‘agu Ieoba.

³¹ Ta ‘enega ‘igu ona wa da ‘ita‘i‘isidi, ta wa da guinuedi: ‘Abo‘agu Ieoba.

³² Ta ‘agu esana tabu gea‘abo wa da gibesobeso; ta nua‘ai‘ailigu ia da ‘esasegu Iseraela tubudiao ‘edia: ‘Abo‘agu Ieoba taugu ia gie‘esasemi,

³³ Taugu ia ‘au‘ewemi ‘asa Aigupito ‘enega, be ‘imi Eaubada; ‘Abo‘agu Ieoba.