Loina 21 - Buki Tabu Lowaenei 1919

‘UPWA 21.

¹ Ta Ieoba ‘i ona Mose ‘enaia, to tariao nidi Aarona natunao ‘edia ‘u da ona, ta ‘edia ‘u da gwae, Gea‘abo ‘e bweu ‘i da giebi‘ina tomwawasa ‘ina tomota ‘edia manudi;

² Taudi tuga getedi ‘ina susu manudi, taudi deinaia, sinana manuna, ta tamana manuna, ta natuna me‘olotona manuna, ta natuna mewainena manuna, ta tasina manuna;

³ ta nuuna manuna gomagweine, tauna deinaia, tauna nigea mwanenamo, tauna manuna ‘i da giebi‘ina.

⁴ Gea‘abo ‘i da giebi‘ina be ‘i gibesobeso‘ena, tauna tai sinabwana ‘ina tomota ‘edia ta ‘enega.

⁵ Gea‘abo debadi si suisui, nai ‘umidi tupitupina si ‘upwa‘upwa, nai esiodi si dabadaba.

⁶ Si da etabudi ‘idi Eaubada ‘enaia, ta gea‘abo ‘idi Eaubada ‘ana esana si da gibesobeso; Ieoba ‘ana ‘ebwaeadaita si bubuna aweiega, ‘idi Eaubada ‘ana palaua, si ‘ebwa‘ebwaeae ta ‘enega: ta ‘enega si da etabudi.

⁷ Gea‘abo ‘e bweu waine sogasogarina, nai waine besobeso si da ‘ewa‘ewa; nai waine si da ‘ewena mwanena me‘olotona ‘i sa‘isa‘ilena: tauna ‘i etabu ‘ina Eaubada ‘ena ta ‘enega.

⁸ Ta ‘enega ‘u da gie‘esasena; ‘imu Eaubada ‘ana palaua i ‘ebwa‘ebwaeae ta ‘enega: ‘i da etabu ‘emuia: ‘Abo‘agu Ieoba, tauna ‘i gie‘esasemi, ia etabu ta ‘enega.

⁹ Ta to taria natuna me wainena, ‘abo ‘i gibesobeso‘ena tauna bubuna sogara ‘enega, tauna tamana ‘i gibesobesona: ‘i da ‘arasi aweiega.

¹⁰ Ta tauna ‘i e to‐taria sinabwana tasinao ‘edia, tauna debanaia bunama oroorowa si siwena, ta ‘i mia ‘ai‘aila be ‘oama ‘ediega si ‘e‘otena, gea‘abo uiauiana ‘i gisine be i ‘eli‘ali‘ami, nai ‘ana ‘oama ‘i da sabudi;

¹¹ Wate gea‘abo kokoa ‘ena ‘i da rugurugu, nai ‘i da giebi‘ina tamana manuna, nai sinana manuna;

¹² Wate gea‘abo anua tabuiega ‘i da ‘apweapwesa, nai ‘ina Eaubada ‘ina anua tabu ‘i da gibesobeso; ‘ina Eaubada ‘ina bunama ‘oroorowa ‘ana mia‘ai‘aila ‘ena ‘i miami ta ‘enega: ‘Abo‘agu Ieoba.

¹³ Ta mwanena ‘i da ‘ewa gomagweine nuaebora tuga.

¹⁴ Kwabura, nai sa‘isa‘ilina, nai waine besobeso, sogasogarina, getedi gea‘abo ‘i da ‘ewa‘ewadi: ta gomagweine nuenueborana tauna ‘ina tomota ‘ediega ‘i da aina.

¹⁵ Ta natuna gea‘abo ‘i da gibesobeso ‘ina tomota ‘edia: ‘Abo‘agu Ieoba ia gie‘esasena ta ‘enega.

¹⁶ Ta Ieoba ‘i ona Mose ‘enaia, ‘i gwae,

¹⁷ Aarona ‘ena ‘u da ona, ‘u da gwae, tubumuao ‘ediega ‘idi epata‐tomota ‘edia tauna oona ‘ina to‘umalina ‘e bweuna, gea‘abo ‘i da doro be ‘ina Eaubada ‘ana palaua ‘i da ‘ebwa‘ebwae.

¹⁸ To tai nai oona ‘ina to‘umalina ‘e bweuna, gea‘abo ‘i dorodoro: tai matakebokebona, nai lopegona, nai ubusu iaialina, nai ‘e bweu iage ma‘ana tubua‘eo‘eoi,

¹⁹ nai tai ‘ae ‘e‘elasana, nai nima ‘e‘elasana,

²⁰ Nai guaukopukopuna, nai loloutunina, nai matana ‘e bweu ‘ina to‘umalina, nai ma‘ana gaoia, nai ma‘isi‘isina, nai kwawana ‘eepisarina;

²¹ Gea‘abo ‘e bweu tai to‐taria ‘Aarona tubunao ‘ediega, oona ‘ina to‘umalina ‘e bweuna, ‘i da mai serabenaia be Ieoba ‘ana ‘ebwaeadaita si bubuna aweiega ‘i da ‘ebwa‘ebwaeae: oona ma‘ina to‘umalina; gea‘abo ‘i da mai serabenaia be ‘ina Eaubada ‘ana palaua ‘i da ‘ebwa‘ebwae.

²² ‘Ina Eaubada ‘ana palaua ‘i da ‘e‘ani, ruarua tauna ‘i tabu to sinabwasana ‘enega, ta tauna ‘i tabu ‘enega.

²³ Tugama gea‘abo ‘auboda ‘ena ‘i rugurugu, nai ‘ebetaria ‘ena ‘i mama serabenaia, oona ma‘ina to‘umalina ta ‘enega; be ‘enega gea‘abo ‘igu anua tabu nidi ‘i da gibesobesodi: ‘abo‘agu Ieoba taugu ia gie‘esasedi ta ‘enega.

²⁴ Ga Mose ‘i ona Aarona ‘enaia, ta natunao me‘olotodi ‘edia, ta Iseraela tubunao iauiaudi ‘edia.