Loina 20 - Buki Tabu Lowaenei 1919

‘UPWA 20.

¹ Ta Ieoba ‘i ona Mose ‘enaia, ‘i gwae,

² Wate, ‘u da ona Iseraela tubunao ‘edia, Tauna tai nina Iseraela tubunao ‘ediega, nai to‘u‘umara Iseraela ‘ena si miami ‘ediega, tubunao ‘ediega i ‘ebwaea‘edi Moleka ‘enaia; tauna si da loemwawasa ‘ai‘ailina: ‘asa ‘ina tomota si da lo‘ibwe‘ibwena gurewega.

³ ‘Abo‘agu wate maninigu ia da sa‘u tai gote matanaia, ta ia da ‘upwa iaulena ‘ina tomota ‘ediega; tubunao ‘ediega i ‘ebwaea‘edi Moleka ‘ena ta ‘enega, be ‘igu anua tabu ‘i giebaili, ta ‘agu esana tabu ‘i da gibesobeso.

⁴ Ta ‘abo ‘asa ‘ina tomota matadi si kwaiena gidarina tai gote ‘enega, ‘ena tubuna i ‘ebwa‘ebwaea‘ena Moleka ‘enaia, ta nigea si loemwawasi:

⁵ ga tai gote ia da e‘awatanesinesi tai gote matanaia, ta ‘ina susu matadia, ta ia da ‘upwa‐iaulena, ta iauiaudi si muriena sabi sogara, sabi sogara Moleka ma‘ieana, ‘idi tomota gamwagamwanidiega.

⁶ Ta iaruiarua ‘i sana‘ila taudi maiaruiarua besobesodi ‘edia, ta to barau ‘edia, sabi muriedi sogara manuna, maninigu ia da sa‘u iaruiarua gote matanaia, ta ia da ‘upwa‐iaulena ‘ina tomota ‘ediega.

⁷ Wa da etabumi ta ‘enega, ta wa da ‘esasemi: ‘Abo‘agu Ieoba ‘imi Eaubada ta ‘enega.

⁸ Ta ‘igu loina tomwanao wa da ‘ita‘i‘isi, ta wa da guinuedi: ‘Abo‘agu Ieoba ia etabumi.

⁹ Tauna ‘e bweuna ‘e bweuna tamana nai sinana ‘i eliena si da loemwawasi ‘ai‘aila: tamana nai sinana ‘i eliena; rarana ‘ena ‘i da miami.

¹⁰ Ta tai ‘i loelata mari tai mwanena ma‘ieana, tugama tauna ‘i loelata gosiana mwanena ma‘ieana, to loelata me‘olotona ta mewainena si da loemwawasa ‘ai‘ailidi.

¹¹ Ta tai tamana mwanena ma‘ieana si ‘eno ni‘atu tamana ‘ina bubugewa ‘ana ‘aubodaboda i ‘ewena: siterua si da loemwawasa ‘ai‘ailidi; raradi ‘i da miami ‘edia.

¹² Ta ‘abo tai i ‘eno natuna mwanena ma‘ieana, siterua si da loemwawasa ‘ai‘ailidi: ni‘atu si guinua geiogeioi; raradi ‘i da miami ‘edia.

¹³ Ta ‘abo tai i ‘eno tai ma‘ieana, ‘atua waine ma‘ieana, siterua ni‘atu si bubuna gadilulu: si da loemwawasa ‘ai‘ailidi; raradi ‘i da miami ‘edia.

¹⁴ Ta ‘abo tai mwanena ma sinana i ‘ewedi, tauna bubuna to‘umalina; si da gabudi awesabeluluiega, tauna ta taudi ruarua; be ‘enega gea‘abo ‘e bweu bubuna to‘umali ‘i da miami ‘emia.

¹⁵ Ta ‘abo tai lagolagowa ma‘ieana si ‘eno, si da loemwawasa‘ai‘ailina: ta lagolagowa wa da loemwawasina.

¹⁶ Ta ‘abo waine lagolagowa ‘ena ‘i nao, ta ‘ena i ‘eno, waine nina ‘u da loemwawasina, ta lagolagowa nina: si da loemwawasa‘ai‘ailidi; raradi ‘edia si da miami.

¹⁷ Ta ‘abo tai nuuna i ‘ewena, tamana natuna, nai sinana natuna, ta bubugewana i ‘itena, ta tauna waine nina bubugewana i ‘itena; tauna ‘ebeomaiamaia; ta si da ‘upwa‐iauledi ‘idi tomota natudiao matadia; nuuna bubugewana ‘ana ‘aubodaboda i ‘ewena; ‘ina bubuna bokobokona ‘i da ‘a‘ari.

¹⁸ Ta ‘abo tai ‘i ‘eno waine ma‘ana le‘oasa ma‘ieana, ta bubugewana ‘ana ‘aubodaboda i ‘ewena: rarana matana ni‘atu ‘i giebubugewena, ta tauna waine ni‘atu rarana matana ‘ana ‘aubodaboda i ‘ewena: ta siterua si da ‘upwa‐iauledi ‘idi tomota gamwagamwanidiega.

¹⁹ Ta sinaio tasina gea‘abo bubugewana ‘ana aubodaboda ‘u ‘ewa‘ewa, nai tamaio nuuna ‘ina: ni‘atu ‘ina susu ‘i giebubugewana: ‘idi bubuna bokobokona si da ‘a‘ari.

²⁰ Ta ‘abo tai wana mwanena ma‘ieana i ‘eno, wana bubugewana ‘ana ‘aubodaboda i ‘ewena: ‘idi loegesi si da ‘a‘ari; si da mwawasa ta nigea natudimo.

²¹ Ta ‘abo tai tasina mwanena i ‘ewena, ‘i da baila: tasina bubugewana ni‘atu ‘ana ‘aubodaboda i ‘ewena; gea‘abo natudimo.

²² ‘Igu loina tomwana iauiauna wa da ‘ita‘i‘isidi ta ‘enega, ta ‘igu loina iauiaudi, ta wa da guinuedi: be ‘enega ‘asa, ‘ena ia ‘au‘ewemi be wa miami, gea‘abo ‘i da maiwa iaulemi.

²³ Ta ‘ebeloina, tauna matamia ia ‘ula apwesedi, ‘ina bubuna gea‘abo ‘edia wa da tautauia: iage gete iauiauna si guinuedi ta ‘enega, ta ‘enega ia guitoasedi.

²⁴ Ta ‘emia ia gwae ni‘atu, ‘Idi ‘asa wa da ‘ewa, ta ia da ‘ebwaemi be wa da ‘ewena, ‘asa ‘i daudau susu ta mu‘awa ‘ediega: ‘Abo‘agu Ieoba ‘imi Eaubada, tomotaiao ‘ediega ni‘atu ia sa‘u dumedumemi.

²⁵ ‘Enega wa da sa‘u dumedume lagolagowa ‘esasena ta nigea‐‘esasena mwatuidi, ta manua ‘esasena ta nigea‐‘esasena mwatuidi: ta gea‘abo iaruiaruami wa da giegadilulue lagolagowa ‘enega, nai manua ‘enega, nai iage ‘e bweuna ‘enega bare‘u ‘i maamaa, tauna ia sa‘u dumedumena ‘aene nigea‐‘esasena.

²⁶ Ta wa da ‘esasena ‘eguia: ‘Abo‘agu Ieoba ‘esasegu ta ‘enega, ta tomotaiao ‘ediega ia sa‘u dumedumemi, be wa da ‘igu tomota.

²⁷ Tai wate nai waine maiaruiarua besobesona, nai tauna to oba, si da loemwawasa ‘ai‘ailina: gurewega si da lo‘ibwe‘ibwedi: raradi ‘edia ‘i da miami.