Loina 19 - Buki Tabu Lowaenei 1919

‘UPWA 19.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘idi boda maibo‘ana ‘edia ‘u da ona, ta ‘edia ‘u da gwae, Wa da ‘esasemi: ‘Abo‘agu Ieoba ‘imi Eaubada ‘esasegu tai ‘enega.

³ ‘Omi tai ‘e bweuna ‘e bweuna sinana, ta tamana ‘i da ‘amaiabedi, ta ‘igu sabateao wa da ‘ita‘i‘isi: ‘Abo‘agu Ieoba ‘imi Eaubada.

⁴ Iage besobeso gea‘abo ‘edia wa bunibuni, nai eaubada kainumu dogadogadi ‘emia wa da bubudi: ‘Abo‘agu Ieoba ‘imi Eaubada.

⁵ Ta ‘ena taria ‘ebwaeadaita guguia wa da ‘ebwaea Ieoba ‘enaia, wa da ‘ebwaea‘ena be ‘omi ‘i da nuanuana.

⁶ Asiata nina ‘enega wa ‘ebwaea‘ena wa da ‘enina, ta ‘i da ‘ulisi wate ‘enega: ta ‘abo ‘e bweu ‘i tupwa ga asiata ‘e toi, wa da gabuna aweiega.

⁷ Ta ‘abo si ‘e‘ani gidarina asiata ‘etonina ‘enega, tauna ‘i da gadilulu: gea‘abo Ieoba ‘i da nuanuana:

⁸ Ta tai iauna si ‘enina ‘idi bubuna bokobokona si da ‘a‘ari, Ieoba ‘ina iage tabu ni‘atu si giebesobesona ta ‘enega: ta iaruiarua gote si da ‘upwa iaulena ‘ina tomota ‘ediega.

⁹ Ta ‘ena ‘imi bare‘u ‘ina sesoi wa ‘upwena, ‘imi bagura tupitupina gea‘abo u ‘upwa‘upwa egumwaridi, nai sesoi sagusaguna ‘u da egogona.

¹⁰ Ta bagura oine gea‘abo ‘u da egogona egumwari, nai ‘imu bagura oine ‘i sagusagu ‘u da egogone; ta ‘u da pilisinedi gomabeso manuna ta to‘u‘umara manuna: ‘Abo‘agu Ieoba ‘imu Eaubada.

¹¹ Gea‘abo wa anawara; nai wa da bubuna kabokabo, nai ona kabokabo ‘e bweuna ‘e bweuna ‘enaia.

¹² Ta gea‘abo ‘agu esanega wa onaona‘upa‘upa kabokabo, be nadigega ‘imu Eaubada ‘ana esana wa gibesobeso: ‘Abo‘agu Ieoba.

¹³ Gosiaio gea‘abo ‘u didigena, nai ‘u da ‘oae‘ena: to guinua e‘isa‘isana ‘ana pari gea‘abo ‘emuia ‘i miamiamasari ga gonagonaia.

¹⁴ To tena tui gea‘abo ‘u elia, nai to matakebo ‘ebebe‘u matanaia ‘u da sa‘u, ta ‘imu Eaubada ‘u da matautena: ‘Abo‘agu Ieoba.

¹⁵ Ta gea‘abo ‘e bweu bubuna nigea paruparuna ‘u da guiguinue loina ‘ena: gea‘abo gomabeso matana ‘u nuanua, nai to ewaiwai matana u ‘amaiabe: ta bubuna paruparuna ‘enega gosiaio ‘u da loinei.

¹⁶ Gea‘abo ‘u da tu‘e ta ‘u da mwa‘uta to simana ‘atua ‘imu tomota ‘edia: nai gosiaio rarana matanaia ‘u da tooro: ‘Abo‘agu Ieoba.

¹⁷ Gea‘abo nuaio ‘i to‘umalina tasio ‘ena ‘atemuiega: gosiaio ‘u da ‘atuba‘e ‘ai‘aila, ta gea‘abo loegesi u ‘a‘ara manuna.

¹⁸ Gea‘abo ‘u e‘isa, nai nuaio ‘i da to‘umalina ‘imu tomota natudiao ‘edia, ta gosiaio ‘u da obobomena ‘oio ‘atua: ‘Abo‘agu Ieoba.

¹⁹ ‘Igu loina ‘u da ‘ita‘i‘isidi. ‘Imu bulomakau gea‘abo ‘u tagwatagwara be si ‘eno‘eno mari bomitawa ma‘ieana: ‘imu bagura gea‘abo ‘u da lelewanena atuna ‘idi bubuna ‘e rua ‘ediega: nai ‘oama ‘ana iage ‘e rua si metameta ‘emuia ‘u da sa‘u.

²⁰ Ta tauna i ‘eno to‘umalina waine ma‘ieana, tauna to‐guinua ioniionina, to ai me‘olotona ma‘ieana si sawaeai, ta nigea ‘i etamapu, nai ‘ana li‘ama si ‘ebwaena; si da loinedi; gea‘abo si mwawamwawasa, waine nigea li‘aminamo ta ‘enega.

²¹ Ta ‘ina to‘umalina ‘ana ‘ebwaeadaita me‘olotona ‘i da me‘ena Ieoba matanaia, anua ‘ebeeloba ‘ana ‘awa ‘enaia, tugama sipi me‘olotona to‘umalina ‘ana ‘ebwaeadaita manuna.

²² Ta to‐taria ‘i da gienua‘e bweu manuna to‘umalina ‘ana ‘ebwaeadaita sipina me‘olotona ‘enega Ieoba matanaia ‘ina loegesi ni‘atu ‘i loegesiei manuna: ta ‘ina loegesi ni‘atu ‘i loegesiei manuna ‘i da kweu.

²³ Ta ‘ena ‘asa ‘ena wa rurugu, ta mari kaiwe iauiauna ni‘atu wa ‘asona masura manuna, ga uana wa da sawa ‘atua ‘idi nigea‐lodaba: iakwara ‘etoi si da nigea‐lodaba ‘atua ‘emia; gea‘abo wa ‘e‘ani.

²⁴ Ta iakwara ‘e atana uana maibo‘ana ‘i da etabu, lotuputupu Ieoba ‘enaia manuna.

²⁵ Ta iakwara ‘e nimana uana ‘enega wa da ‘e‘ai, be sinabwanega ‘i da uaua ‘emia: ‘Abo‘agu Ieoba ‘imi Eaubada.

²⁶ Gea‘abo ‘e bweu iage wa ‘e‘ani rara ma‘ieana: wate gea‘abo wa ‘oba‘oba, nai paropisai kabokabo.

²⁷ Debami gea‘abo tupitupidi wa ‘upwa‘upwa sakowasie, nai ‘umio tupitupina ‘u da gieto‘umaliena.

²⁸ Gea‘abo esiomi wa dabadaba to mwawasa manudi, nai ‘e bweu iage wa da ‘eto‘etokidi ‘emia: ‘Abo‘agu Ieoba.

²⁹ Natuio me wainena gea‘abo ‘u gibesobeso, be ‘u giesogarina; ‘abona nai ‘asa ‘i bebe‘u sogara ‘enaia, ta ‘asa ‘i da maa to‘umaliega.

³⁰ ‘Igu sabate wa da ‘ita‘i‘isidi, ta ‘igu anua tabu wa da ‘amaiabena: ‘Abo‘agu Ieoba.

³¹ To loiaruiarua besobeso gea‘abo ‘edia wa sanasana‘ila, nai to barau ‘edia; gea‘abo wa ‘ebe‘ebesedi, be wa da baila ‘ediega: ‘Abo‘agu Ieoba ‘imu Eaubada.

³² Deba segwasegwana matanaia ‘u da tooro, ta ‘ina‘inapwanina maninina ‘u da ‘amaiabena, ta ‘imu Eaubada ‘u da matautei: ‘Abo‘agu Ieoba.

³³ Ta ‘abo to‘u‘umara ‘i miami ma‘emi ‘imi ‘asa ‘enaia, gea‘abo bubuna geiogeioi ‘ena wa guiguinue.

³⁴ To‘u‘umara ‘i miami ma‘emi ‘i da ‘emia na‘ieana to tubua ‘asaia gamwagamwanimia, ta ‘u da obobomena ‘oio ‘atua; ‘oni wa eto‘u‘umara ‘asa Aigupito ‘enaia ta ‘enega: ‘Abo‘agu Ieoba ‘imu Eaubada.

³⁵ Gea‘abo ‘e bweu bubuna nigea paruparuna wa da guiguinue etarae ‘ena, ‘etopwapwa dudurana ‘ena, ‘etopwapwa mwau ‘ena, nai ‘etopwapwa keiga ‘ena.

³⁶ ‘Ebekuge paruparuna, ‘ebemwau paruparuna, keiga‐epa paruparuna, keiga‐iina paruparuna, wa da ‘ewedi: ‘Abo‘agu Ieoba ‘imi Eaubada, tauna i ‘au‘ewemi ‘asa Aigupito ‘enega.

³⁷ Ta ‘igu loina tomwanao iauiauna, ta ‘igu loina iauiauna, wa da ‘ita‘i‘isi, ta wa da guinuedi: ‘Abo‘agu Ieoba.