Loina 18 - Buki Tabu Lowaenei 1919

‘UPWA 18.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da ona, ta ‘edia ‘u da gwae, ‘Abo‘agu Ieoba ‘imu Eaubada.

³ ‘Asa Aigupito ‘ina bubunao ‘atua, ‘ena wa miami, gea‘abo wa guiguinue: ta ‘asa Kanania, ‘ena ia ‘au‘ewemi, ‘ina bubunao ‘atua ‘gea‘abo wa guiguinue: ta gea‘abo ‘idi loina tomwana ‘edia wa da tautauia.

⁴ ‘Igu loinao wa da guinua, ta ‘igu loina tomwana wa da ‘ita‘i‘isidi, be ‘edia wa da tautauia: ‘Abo‘agu Ieoba ‘imi Eaubada.

⁵ Ta ‘enega ‘igu loina tomwanao, ta ‘igu loinao wa da ‘ita‘i‘isidi; taudi ‘abo tai ‘i guinuedi, ‘ediega iawasina ‘i da sa‘u: ‘Abo‘agu Ieoba.

⁶ Gea‘abo ‘e bweu ‘emiega tauna ‘ina susu ‘ai‘aila ‘ena ‘i da dorodoro be bubugewadi ‘ana ‘aubodaboda ‘i da lolona: ‘Abo‘agu Ieoba.

⁷ Tamaio bubugewana, tugama sinaio bubugewana, gea‘abo ‘ina ‘aubodaboda u ‘ewa‘ewa; tauna sinaio; bubugewana ‘ana ‘aubodaboda gea‘abo ‘u da ‘ewa‘ewa.

⁸ Tamaio mwanena ‘ina bubugewa gea‘abo ‘ina ‘aubodaboda ‘u da ‘ewa‘ewa: tauna tamaio ‘ina bubugewa.

⁹ Nuuio bubugewana, tamaio natuna, nai sinaio natuna, nai ‘i tubua ‘asaia, nai ‘i tubua ‘edasoraia, tugama bubugewadi gea‘abo ‘idi ‘aubodaboda ‘u da ‘ewa‘ewa.

¹⁰ Natuiome‘olotona natuna‐mewainena bubugewana, nai natuio‐me‐wainina natuna‐mewainena, tugama bubugewadi gea‘abo ‘idi ‘aubodaboda u ‘ewa‘ewa: taudi ‘idi bubugewa tauio ‘imu bubugewa ta ‘enega.

¹¹ Tamaio mwanena natuna‐me‐wainena bubugewana, tamaio ‘i enatunena, tauna nuuio, bubugewana ‘ana ‘aubodaboda gea‘abo u ‘ewa‘ewa.

¹² Tamaio nuuna ‘ina bubugewa gea‘abo ‘ana ‘aubodaboda ‘u ‘ewa‘ewa: tauna tamaio ‘ina susu ‘ai‘aila ta ‘enega.

¹³ Sinaio tasina bubugewana gea‘abo ‘ana ‘aubodaboda ‘u ‘ewa‘ewa: tauna sinaio ‘ina susu ‘ai‘aila ta ‘enega.

¹⁴ Tamaio tasina gea‘abo bubugewana ‘ana ‘aubodaboda ‘u ‘ewa‘ewa, gea‘abo mwanena ‘ena ‘u da dorodoro; tauna sinaio.

¹⁵ Lawaio bubugewana ‘ana ‘aubodaboda gea‘abo ‘u ‘ewa‘ewa; tauna natuio‐me‐‘olotona mwanena; bubugewana gea‘abo ‘ana ‘aubodaboda u ‘ewa‘ewa.

¹⁶ Tasio mwanena bubugewana gea‘abo ‘ana ‘aubodaboda ‘u da ‘ewa‘ewa: tauna tasio ‘ina bubugewa.

¹⁷ Waine ta natuna‐me‐wainena gea‘abo bubugewadi ‘adi ‘auboda ‘u da ‘ewa‘ewa; natuna‐me‐‘olotona natuna‐me‐waine‐na nai natuna‐me‐wainena natuna‐me‐wainena, gea‘abo ‘u da ‘ewa‘ewa be bubugewana ‘ana ‘aubodaboda ‘u da ‘ewena; taudi iine susu ‘e bweunamo; ‘i to‘umali wawasae.

¹⁸ Ta gea‘abo waine ‘u da ‘ewa tasina ‘enaia, be ‘i etarauware, be bubugewana ‘ana ‘aubodaboda ‘u da ‘ewena, mari waine nina deinaia ‘ena maiawasina ‘i miami.

¹⁹ Ta gea‘abo waine ‘ena ‘u da dorodoro be bubugewana ‘ana ‘aubodaboda ‘u da ‘ewena, tuta ‘enega ‘i miamiadumaduma ‘ina nigea‐‘esasena manuna.

²⁰ Ta gea‘abo ‘u da ‘eno sabi to‘umalina gosiaio mwanena ma‘ieana, be ‘u da giebailimu ma‘ieana.

²¹ Ta gea‘abo tubumuao ‘ediega ‘e bweu ‘u da ‘ebwaea be Moleka ‘ena awesabelulu si rubwarena, ta gea‘abo ‘imu Eaubada ‘ana esana ‘u da ‘ina‘inana besobeso: ‘Abo‘agu Ieoba.

²² Gea‘abo tai ma‘ieaio wa ‘eno‘eno, na‘ieana waine ma‘ieana: tauna ‘i gadilulu.

²³ Ta gea‘abo lagolagowa ‘e bweu ma‘ieana ‘u da ‘eno be ‘u giebailimu ma‘ieana: wate gea‘abo ‘e bweu waine lagolagowa matanaia ‘i da tooro, sabi ‘eno ‘enaia; tauna ‘ebeomaiamaia.

²⁴ Gea‘abo wa da giebailemi iage getedi ‘e bweuna ‘ediega: iage getedi iauiauna ‘ediega ‘ebeloina si ‘ebaila taudi matamiega ia pa‘idi:

²⁵ Ta ‘asa ‘i baila: ta ‘enega ‘ina bubuna bokobokona ia da e‘isa ‘enaia, ta ‘asa ‘ana tomianao ‘i maiwedi.

²⁶ Ta ‘enega ‘omi ‘igu loina tomwanao ta ‘igu loinao wa da ‘ita‘i‘isidi, ta iage gadilulu getedi gea‘abo ‘e bweuna ‘ediega wa da guiguinue; nai to tubua ‘asaia, nai to‘u‘umara ‘emia ‘i miami:

²⁷ (Iage gadilulu getedi iauiaudi ‘asa nina ‘ina tai ni‘atu si guinua, taudi nuganimia si miami, ta ‘asa ‘i baibailina;)

²⁸ Be ‘enega gea‘abo ‘asa ‘i da maimaiwemi wate, ‘ena wa giebailena, na‘ieana ‘ebeloina ‘i nuganuganemi ‘i maiwena.

²⁹ Tauna iage gadilulu getedi ‘e bweuna ‘i da guiguinue, tugama iaruiarua si guinuedi si da ‘upwa iauledi ‘idi tomota ‘ediega.

³⁰ Ta ‘enega ‘igu ematarua wa da ‘ita‘i‘isi, be ‘enega bubuna gadilulu getedi gea‘abo ‘e bweu wa da guiguinue, taudi si guinua nuganemi, ta ‘enega gea‘abo wa da giebailemi ‘ediega: ‘Abo‘agu Ieoba ‘imi Eaubada.