Loina 17 - Buki Tabu Lowaenei 1919

‘UPWA 17.

¹ Ta Ieoba ‘i ona Mose ‘enaia, ‘i gwae,

² Aarona ‘ena ‘u da ona, ta natunao ‘edia, ta Iseraela tubunao iauiaudi ‘edia, ta ‘u da ‘eonedi; Gete iage nina ni‘atu Ieoba ‘i ona, ‘i gwae,

³ Tauna tai Iseraela ‘ina susu ‘enega, tauna bulomakau ‘i ununa, nai lami, nai gota, ‘asaia, nai tauna ‘i ununa ‘asa etaulunaia,

⁴ Ta nigea ‘i me‘ena anua ‘ebeeloba ‘ana ‘awaia, be ‘i da ‘ebwaea‘ena ‘ebwaeadaita manuna Ieoba ‘enaia Ieoba ‘ina anua‐tabenakele matanaia: rarana wa da ‘inana tai gote ‘enaia; rara ni‘atu ‘i etasiwena; ta tai gote si da ‘upwena ‘ina tomota ‘ediega:

⁵ Be ‘enega Iseraela tubunao ‘idi taria si da me‘edi, taudi si taria mitawaia, tugama ‘aene si da me‘edi Ieoba ‘enaia, anua ‘ebeeloba ‘ana ‘awa ‘enaia, to‐taria ‘enaia, ta si da taria‘edi ‘ebwaeadaita guguia ‘adi tariao manudi Ieoba ‘enaia.

⁶ Ta to‐taria rara ‘i da loseuseulena Ieoba ‘ina ‘ebetaria ‘enaia anua ‘ebeeloba ‘ana ‘awa ‘enaia, ta iapa ‘i da gabuna maina dibidibi manuna Ieoba ‘enaia.

⁷ Ta gea‘abo wate ‘idi tariao si da taritaria gota me‘olotodi ‘edia, taudi si murimurie to‘umali. Gete ‘i da loina ataia ‘edia ‘idi epata‐tomota ‘edia.

⁸ Ta ‘edia ‘u da ona, Tauna tai Iseraela ‘ina susu ‘enega, nai to‘u‘umara ‘edia si miami ‘ediega, tauna ‘ebwaeadaita gabugabu nai taria i ‘ebwaea,

⁹ Ta nigea ‘i me‘ena anua‐‘ebeeloba ‘ana ‘awa ‘enaia, be ‘i da taria‘ena Ieoba ‘enaia; tai gote si da ‘upwena ‘ina tomota ‘ediega.

¹⁰ Ta tauna tai Iseraela ‘ina susu ‘enega, nai to‘u‘umara ‘edia si miami ‘ediega, tauna rara ‘e bweuna i ‘e‘ai; matagu ia da giedumaduma iaruiarua gote rara i ‘e‘ai ‘enaia, ta ia da ‘upwena ‘ina tomota ‘ediega.

¹¹ Esio iawasina rara ‘enaia ta ‘enega: ta ni‘atu ia ‘ebwaea‘ena ‘emia ‘ebetaria ‘enaia sabi gienua‘ebweuna iaruiaruami manudi: rara ‘i gienua‘ebweuna iawasina manuna ta ‘enega.

¹² Ta ‘enega ia ona Iseraela tubunao ‘edia, Gea‘abo ‘e bweu iaruiarua ‘emiega rara i ‘e‘ani, ta gea‘abo ‘e bweu to‘u‘umara ‘emia ‘i miami rara ‘i da ‘e‘ani.

¹³ Ta tauna tai Iseraela tubunao ‘ediega, nai to‘u‘umara ‘emia si miami ‘ediega, tauna bomitawa nai manua ‘e bweuna ‘e‘ai bobo‘ana i ‘ewena nai toreiega nai aimanua; rarana i da siwa iaule, ta kauiega ‘i da siuna.

¹⁴ Esio iauiauna iawasina leleana, rarana i ‘e bweuna iawasina ma‘ieana: ta ‘enega ia ona Iseraela tubunao ‘edia, Gea‘abo ‘e bweu esio rarana wa ‘e‘ani: esio iauiauna iawasina tauna rarana ta ‘enega: tauna i ‘enina si da ‘upwa iaulena.

¹⁵ Ta iaruiarua iauna tauna kokoa i ‘enina, nai iage bomitawa si sabusabuna, nai to tubua ‘asaia nai to‘u‘umara, ‘ana ‘oama ‘i da ‘utudi, ta ‘i da ‘esiwe boasi ‘ena, ta ‘i da nigea‐‘esasena ga asuinuanua: ga ‘i da ‘esasena.

¹⁶ Ta ‘abo nigea i ‘utu‘utudi, nai ‘esiona ‘i e‘esiwena, ga ‘ina bubuna bokobokona ‘i da ‘a‘ari.