Loina 16 - Buki Tabu Lowaenei 1919

‘UPWA 16.

¹ Ta Aarona natunao me‘olotodi ‘idi mwawasa murinaia, ‘ena Ieoba matanaia si dorodoro ga si mwawasa, Ieoba ‘i ona Mose ‘enaia;

² Ta Ieoba ‘i ona Mose ‘ena, Aarona tasio ‘ena ‘u da ona, gea‘abo tuta iauiauna ‘i mema esena tabu ‘ena ‘aubodaboda gamwanaia, ‘ebemi‐nua‘ole‘ole tauna dedewaga ‘ena ‘i miami matanaia; be gea‘abo ‘i da mwawamwawasa: ‘Abo‘agu ia da apwesa poana ‘ena ‘ebemi‐nua‘ole‘ole ‘enaia ta ‘enega.

³ Gete ma‘ieana Aarona ‘i da mai ‘esena tabu ‘enaia: ma‘ina bulomakau menonoiana loegesi ‘ana ‘ebwaeadaita manuna, ta sipi me‘olotona ‘ebwaeadaita gabugabu manuna.

⁴ Kotukaleko tabu ‘i da ‘otena, ta tarausesa‐kaleko ‘esiona ‘ena, ta diapwata‐kalekoega ‘i da diapwata, ta ‘ebepaima‐kalekoega debana ‘i da paimi: taudi ‘oama tabu; ta esiona ‘i da e‘esiwena boasiega, ta ‘i da ‘otedi.

⁵ Ta Iseraela tubunao ‘idi deriegogona ‘enega gota me‘olotodi ‘e rua ‘i da ‘ewa loegesi ‘ana ‘ebwaeadaita manuna, ta sipi‐me‘olotona ‘e bweuna ‘ebwaeadaita gabugabu manuna.

⁶ Ta Aarona loegesi ‘ana ‘ebwaeadaita bulomakauna ‘i da ‘ebwaeae, tauna manuna, ta ‘i da gienua‘ebweu tauna manuna, ta ‘ina anua manuna.

⁷ Ta gota ‘e rua nidi ‘i da ‘ewa, ta Ieoba matanaia ‘i da sa‘udi anua ‘ebeeloba ‘ana ‘awa ‘enaia.

⁸ Ta Aarona gote ‘e rua nidi ‘ena ‘i da ‘ula‘esinua; ‘ula‐‘esinua ‘e bweuna Ieoba manuna, ta ‘ula‐‘esinua ‘e ruena Asasela manuna.

⁹ Ta Aarona gota ‘ula‘esinua ‘ena ‘i be‘u Ieoba manuna ‘i da sa‘ui, ta ‘i da ‘ebwaea‘ena loegesi ‘ana ‘ebwaeadaita manuna.

¹⁰ Ta gota, tauna ‘ula‐‘esinua ‘ena ‘i be‘u Asasela manuna, ‘i da sa‘u bobo‘ana Ieoba matanaia, sabi gienua‘ebweuna manuna, be ‘i da etunena mitawaia Asasela manuna.

¹¹ Ta Aarona loegesi ‘ana ‘ebwaeadaita bulomakauna ‘i da ‘ebwaeae, tauna manuna, ta ‘i da gienua‘ebweuna tauna manuna, ta ‘ina anua manuna, ta loegesi ‘ana ‘ebwaeadaita bulomakauna tauna manuna ‘i da loemwawasina:

¹² Ta gaeba ‘i maa ganibwara ‘ara‘aratega ‘i da ‘ewa ‘ebetaria Ieoba matanaia ‘enega, ta nimanega ‘i da sapwari mu‘ana dibidibi tututuna matagidarina ‘enega, ta ‘i da me‘ena ‘aubodaboda gamwanaia:

¹³ Ta mu‘ana ‘i da sa‘u awe‐sabelulu ‘enaia Ieoba matanaia, be ‘enega mu‘ana poanana ‘ebemi‐nua‘ole‘ole tauna ‘ebee‘ita ‘ena ‘i miami ‘i da bodena, be gea‘abo ‘i mwawamwawasa:

¹⁴ Ta bulomakau raranega ‘i da ‘ewa, ta nimamatagiginega ‘i da loseuseula ‘ebemi‐nua‘ole‘ole ‘ena bomatu ‘enaia; ta ‘ebemi‐nua‘ole‘ole matanaia rarega nimamatagiginega ‘i da loseuseuli ‘e sebeni.

¹⁵ Ga loegesi ‘ana ‘ebwaeadaita gotana ‘i da loemwawasina, tauna tomota manudi, ta rarana ‘i da me‘ena ‘aubodaboda gamwanaia, ta raranega ‘i da guinua nadigega ‘i guinua bulomakau raranega, ta ‘i da loseuseulena ‘ebemi‐nua‘ole‘ole ‘enaia, ta ‘ebemi‐nua‘ole‘ole matanaia:

¹⁶ Ta ‘i da gienua‘ebweuna esena tabu manuna, Iseraela tubunao ‘idi nigea‐‘esasena manuna, ta ‘idi li‘oa‐loina manudi, tugama ‘idi loegesi iauiauna: ta nadigega ‘i da guinua anua‐‘ebeeloba manuna, tauna ‘i miami ma‘edi ‘idi nigea‐‘esasena gamwagamwanidia.

¹⁷ Ta gea‘abo ‘e bweu tai anua‐‘ebeeloba ‘ena ‘i da miami tuta ‘enega ‘i rugu sabi gienua‐‘ebweu esena tabu ‘enaia, ga ‘i da apwesama, ta ‘i gienua‐‘ebweu tauna manuna, ta ‘ina anua ‘ana tomianao manudi, ta Iseraela ‘ina boda maibo‘ana manuna.

¹⁸ Ta ‘i da apwesa ‘ebetaria ‘enaia tauna Ieoba matanaia ‘i miami, ta ‘i da gienua‘ebweuna manuna; ta bulomakau raranega ‘i da ‘ewa, ta gota raranega, ta ‘ebetaria kunana ‘edia ‘i da sa‘u dadana.

¹⁹ Ta raranega ‘ena ‘i da loseuseula nimamatagiginega ‘e sebeni, ta ‘i da gie‘esasena, ta Iseraela tubunao ‘idi nigea‐‘esasena ‘ediega ‘i da ‘etabuiena.

²⁰ Ta ni‘atu gienua‐‘ebweu esena tabu manuna ‘i da losaronina, anua ‘ebeeloba be, ‘ebetaria be, gota bobo‘ana ‘i da sa‘ui:

²¹ Ta Aarona nimanao ‘e rua ‘i da sa‘u gota bobo‘ana debanaia, ta ‘etanaia Iseraela tubunao ‘idi bubuna bokobokona iauiauna ‘i da ‘e simane, ta ‘idi li‘oa‐loina iauiauna, tugama ‘idi loegesi iauiauna; ta gota debanaia ‘i da sa‘udi, ta ‘i da etunenawa tai wa ‘aseiena nimanega mitawaia:

²² Ta gota nina ‘idi bubuna bokobokona iauiauna ‘ena ‘i da ‘a‘ari ‘asa waboreborena ‘enaia: ta gota ‘i da gisinena mitawaia.

²³ Ta Aarona anua ‘ebeeloba ‘ena ‘i da mai, ta ‘oama kaleko ‘i da lolodi, taudi i ‘e‘otedi ‘ena ‘i rugu esena tabu ‘enaia, ta ‘ena ‘i da pilisinedi:

²⁴ Ta esena tabu ‘ena esiona ‘i da e‘esiwe boasi ‘ena, ta ‘ana ‘oama ‘i da e‘otedi, ta ‘i da apwesama, tauna ‘ina ‘ebwaeadaita gabugabu ta tomota ‘idi ‘ebwaeadaita gabugabu ‘i da ‘ebwaeae, ta ‘i da gienua‘ebweu tauna manuna ta tomota manudi.

²⁵ Ta loegesi ‘ana ‘ebwaeadaita iapana ‘i da gabuna ‘ebetaria ‘enaia.

²⁶ Ta tauna gota ‘i li‘ali‘amina Asasela manuna ‘ana ‘oama ‘i da ‘utudi, ta ‘esiona ‘i da e‘esiwena boasi ‘ena, ta muriega ‘asa ‘ena ‘i da mai.

²⁷ Ta loegesi ‘ana ‘ebwaeadaita bulomakauna, ta loegesi ‘ana ‘ebwaeadaita gotana, tauna rarana ‘i da me‘ena sabi gienua‘ebweu esena tabu ‘enaia, si da ‘a‘arina ‘asa etaulunaia, ta awe ‘ena bwaradi si da ‘egabu, esiodi be, bi‘idi be.

²⁸ Ta tauna i ‘egabudi ‘ana ‘oama ‘i da ‘utudi, ta esiona ‘i da e‘esiwena boasi ‘enaia, ta muriega ‘asa ‘ena ‘i da mai.

²⁹ Ta ‘i da loina ataia ‘emia: nawarae ‘e sebeni ‘enaia, nawarae nina ‘ina asiata ‘e teni nina ‘enega, iawasimi wa da giemwauiedi, ta gea‘abo ‘e bweu guinua ‘ina bubuna wa da guinuei, to tubua ‘asaia, nai to‘u‘umara ‘i miamia gamwagamwanimia:

³⁰ Asiata gete ‘enega wa da gienua‘ebweuna manumi ta ‘enega, sabi gie‘esasemi; ‘imi loegesi iauiauna ‘enega wa da ‘esasena Ieoba matanaia.

³¹ Tauna ‘i e sabate eiawai‘ata mwaumwau ‘emia, ta iawasimi wa da giemwauiedi; tauna loina ‘ataia.

³² Ta to‐taria, tauna si ‘eoroina ta tauna si tagwara ‘ai‘ailena be i ‘e to‐taria tamana ‘ana lopa‘eru, tauna ‘i da gienua‘ebweu, ta ‘oama kaleko ‘i da ‘e‘otedi, tugama ‘oama tabu:

³³ Ta ‘i da gienua‘ebweu anua tabu manuna, ta ‘i da gienua‘ebweu anua ‘ebeeloba manuna ta ‘ebetaria manuna; ta ‘i da gienua‘ebweu to‐taria manudi ta boda ‘ina tomota iauiauna manudi.

³⁴ Ta gete ‘i da loina mia ataia ‘emia, be wa da gienua‘ebweu Iseraela tubunao manudi ‘idi loegesi iauiauna manudi ma‘ebweuna iakwara ‘ena. Ta ‘i guinua na‘ieana Ieoba ‘i ona Mose ‘enaia.