Loina 14 - Buki Tabu Lowaenei 1919

‘UPWA 14.

¹ Ta Ieoba ‘i ona Mose ‘enaia, ‘i gwae,

² Gete ‘i da lepero ‘ana loina ‘ina ‘ebeesasa ‘ana asiata ‘enega: si da me‘ena to‐taria ‘enaia;

³ Ta to‐taria etauluia ‘i da tauiawa; ta to taria ‘i da ‘ita, ta, u ‘ita, ‘abo muia lepero ‘i bobo‘ana lepero ‘enaia;

⁴ Ga to‐taria ‘i da ona be tauna sabi ‘esasena manuna manua maiawasidi ‘esasadi ‘e rua si da ‘ewedi, kaiwe maruana ta, bweabwearina ta, isopa ta:

⁵ Ta to‐taria ‘i da ona be manua ‘e bweuna si da ununa gaeba bwa‘a ‘enaia boasi daudauna debanaia:

⁶ Ta manua bobo‘ana manuna, ‘i da ‘ewena, kaiwe maruana ta, bweabwearina ta, isopa ta, ta ‘i da sa‘udi ta manua bobo‘ana wate manua si ununa boasi daudauna debanaia rarana ‘enaia:

⁷ Ta tauna ‘i da ‘esasena leperoega ‘i da loseuseula masebeni, ta ‘i da ‘inanena ‘aene i ‘esasena, ta manua bobo‘ana ‘i da gisinena mitawaia.

⁸ Ta tauna i ‘abe i ‘esasena ‘ana ‘oama ‘i da ‘utudi, ta uiauiana maibo‘ana ‘i da sui, ta boasi ‘ena ‘i da ‘esiwe, ta ‘i da ‘esasena: ta muriega ‘asaia ‘i da mai, ta ‘ina anua‐kaleko guaunaia ‘i da miami asiata ‘e sebeni.

⁹ Ta asiata ‘e sebeni nina, ga uiauiana ‘i da sui iaulei maibo‘ana debanega ta uminega ta mata‘ipinega, tugama uiauiana maibo‘ana ‘i da sui iauledi; ta ‘ana ‘oama ‘i da ‘utudi, ta esiona ‘i da e‘esiwena boasi ‘ena, ta ‘i da ‘esasena.

¹⁰ Ta asiata ‘e eta nina lami me‘olotodi nigea ma‘idi to‘umalinamo ‘e rua ‘i da ‘ewedi, ta lami mewainena ‘e bweuna ‘ana iakwara ‘e bweuna nigea ma‘ina to‘umalinamo, ta palaua ‘esasena epa ‘ana ‘upwa‐sanau ‘etoi ‘ebwaeadaita rabia manuna, bunamega si ilienoenowena, ta bunama keiga ‘e bweuna.

¹¹ Ta to‐taria ‘i gie‘esasena tai sabi ‘esasena, ta iage gotedi, ‘i da sa‘u Ieoba matanaia, anua ‘ebeeloba ‘ana ‘awa ‘enaia;

¹² Ta to‐taria lami me‘olotona ‘e bweuna ‘i da ‘ewa, ta ‘i da ‘ebwaea‘ena to‘umalina ‘ana ‘ebwaeadaita manuna, ta keiga bunama, ta ‘i da lo‘uio‘edi ‘ebwaeadaita ‘elo‘uia manuna Ieoba matanaia;

¹³ Ta lami me‘olotona ‘i da loemwawasina esena nina ‘ena loegesi ‘ana ‘ebwaeadaita ta ‘ebwaeadaita gabugabu si loemwawasidi, anua tabu ‘ana esena ‘enaia; na‘ieana loegesi ‘ana ‘ebwaeadaita to‐taria ‘ina iage, na‘ieana ta ‘enega to‘umalina ‘ana ‘ebwaeadaita: ‘i etabuna sana:

¹⁴ Ta to‐taria to‘umalina ‘ana ‘ebwaeadaita rarana ‘i da ‘ewa, ta to‐taria tauna ‘i abe i ‘esasena tenana ‘ataina garuna ‘ena ‘i da sa‘u, ta nimamataponina ‘ataina ‘ena, ta ‘aemataponina ataina ‘enaia:

¹⁵ Ta to‐taria bunama makeigana ‘i da ‘ewena, ta tauna gegeumina nimaiapaiapana ‘ena ‘i da siwa:

¹⁶ Ta to‐taria nimamatagigina ataina ‘i da sa‘u bunama ‘ena tauna gegeumina ‘ena ‘i miamiana, ta bunamega ‘i da loseuseuli nimamatagiginega ‘e sebeni Ieoba matanaia;

¹⁷ Ta bunama tupwana nimana ‘ena ‘i miamiana to‐taria ‘i da sau tauna ‘i abe i ‘esasa tenana ‘ataina garuna ‘enaia, ta nimamataponina ‘ataina ‘enaia, ta ‘aemataponina ‘ataina ‘enaia, to‘umalina ‘ana ‘ebwaeadaita rarana ‘enaia;

¹⁸ Ta bunama tupwana tauna to‐gitaria nimana ‘ena ‘i miami tauna ‘i abe i ‘esasa debanaia ‘i da sa‘u: ta to‐taria ‘i da gienua‘ebweu manuna Ieoba matanaia.

¹⁹ Ta to‐taria loegesi ‘ana ‘ebwaeadaita ‘i da ‘ebwaeae, ta tauna ‘i abe ‘i ‘esasa manuna ‘i da gienua‘ebweu ‘ina nigea‐‘esasena manuna; ta muriega ‘ebwaeadaita gabugabu ‘i da ununa:

²⁰ Ta to‐taria ‘ebwaeadaita gabugabu ta ‘ebwaeadaita rabia ‘i da ‘ebwaea ‘ebetaria ‘enaia; ta to‐taria ‘i da gienua‘ebweu manuna, ta ‘i da ‘esasena.

²¹ Ta ‘abo ‘i gomabeso, ta nigea ‘i da ‘ewa nadigega, ga lami me‘olotona ‘e bweuna ‘i da ‘ewena to‘umalina ‘ana ‘ebwaeadaita manuna be ‘i da lo‘uio, sabi gienua‐‘ebweu manuna, ta palaua ‘esasena epa ‘ana ‘upwasanau ‘e bweuna bunama ma‘ieana si ilienoenowena ‘ebwaeadaita rabia manuna, ta bunama makeigana ‘e bweuna;

²² Ta bunetutu ‘e rua, nai bunebune menonoiadi ‘e rua, nadigega ‘i ewaiwai be ‘i da ‘ewena; ta ‘e bweuna ‘i da ‘eloegesi ‘ana ‘ebwaeadaita, ta ‘e ruena ‘ebwaeadaita gabugabu.

²³ Ta asiata ‘e eta nina ‘i da me‘edi ‘ina ‘esasena manuna to‐taria ‘enaia, anua ‘ebeeloba ‘ana ‘awa ‘enaia, Ieoba matanaia.

²⁴ Ta to‐taria to‘umalina ‘ana ‘ebwaeadaita lamina ‘i da ‘ewena, ta bunama makeigana, ta to‐taria ‘i da lo‘uio‘edi ‘ebwaeadaita lo‘uio manuna Ieoba matanaia:

²⁵ Ta to‘umalina ‘ana ‘ebwaeadaita lamina ‘i da ununa, ta to‐taria to‘umalina ‘ana ‘ebwaeadaita rarana ‘i da ‘ewena, ta ‘i da sa‘una tauna ‘i abe i ‘esasa tenana ‘ataina mata garuna ‘ena, ta nimamataponina ‘ataina ‘enaia:

²⁶ ta to‐taria bunama ‘i da siwa tauna nimaiapaiapana gegeumina ‘enaia:

²⁷ Ta to‐taria nimamatagigina ‘atainega bunama aina gegeuminaia ‘i miamiana ‘enega ‘i da loseuseuli masebeni Ieoba matanaia:

²⁸ Ta to‐taria bunama nimana ‘ena ‘i miami tauna ‘i abe i ‘esasa tenana ‘ataina mata‐garuna ‘ena ‘i da sa‘u, ta nimamataponina ‘ataina ‘ena, ta ‘aemataponina ‘ataina ‘ena, to‘umalina ‘ana ‘ebwaeadaita rarana ‘ana esena ‘enaia:

²⁹ Ta bunama tupwana to‐taria nimanaia ‘i miami tauna ‘i abe i ‘esasena debanaia ‘i da sa‘u, sabi gienua‐‘ebweu manuna Ieoba matanaia.

³⁰ Ta bunetutu ‘e bweuna ‘i da ‘ebwaeae, nai bunebune menonoiana ‘e bweuna, nadigega ‘i ewaiwai be ‘i da ‘ewena;

³¹ Tugama nadigega ‘i ewaiwai be ‘i da ‘ewa, ‘e bweuna loegesi ‘ana ‘ebwaeadaita manuna, ta ‘e ruena ‘ebwaeadaita gabugabu manuna, ‘ebwaeadaita rabia ma‘ieana: ta to‐taria tauna ‘i abe i ‘esasena manuna ‘i da gienua‐‘ebweu Ieoba matanaia.

³² Gete tauna muia lepero ‘ena ‘i miami ‘ana loina, tauna nigea ‘i ewaiwai be iage ‘ina ‘esasena sawesawenaia ‘i da ‘ewena.

³³ Ta Ieoba ‘i ona Mose ‘enaia ta Aarona ‘enaia, ‘i gwae,

³⁴ ‘Ena wa mai ‘asa Kanania ‘enaia tauna ia ‘ebwaemi ‘ami ‘egu‘eguiai manuna, ta muia lepero ia sa‘u ‘ami ‘egu‘eguiai ‘ana ‘asa ‘ina anua ‘e bweuna ‘enaia;

³⁵ Ga tauna toni‐anua ‘i da mai ta to‐taria ‘ena ‘i da simana, ‘i da gwae, ‘Eguia ‘ana ‘ita nadigega ‘atua muia anua ‘enaia:

³⁶ Ta to‐taria ‘i da ona ‘aene anua si da pilisine be ‘i da kakae, ga muriega to‐taria ‘i da rugu sabi ‘itena muia nina, be ‘enega iage iauiauna anuaia gea‘abo ‘i da nigea‐‘esasena: ta muriega to‐taria ‘i da rugu sabi ‘ita anua nina:

³⁷ Ta muia ‘ena ‘i da ‘ita, ta, u ‘ita, ‘abo muia anua ‘ana pita ‘edia ‘i miami esena logomwagomwadi, lokarakarawina nai lobweabwearina, ta ‘ana ‘ita pita soranaia;

³⁸ Ga to‐taria anuega ‘i da apwesa anua ‘ana ‘auboda ‘enaia, ta anua ‘i da gibodena asiata ‘e sebeni;

³⁹ Ta to‐taria ‘i da ‘ilama asiata ‘e sebeni nina, ta ‘i da ‘ita; ta, u ‘ita, ‘abo muia i ‘elelewana anua ‘ana pita ‘edia;

⁴⁰ Ga to‐taria ‘i da ona ‘aene gurewa muia ‘edia ‘i miami si da ‘ewena, ta si da ‘uledi esena nigea‐‘esasena ‘asa etaulunaia:

⁴¹ Ta ‘i da loina be anua si da koli dadane gamwana, ta bwada si koli iauiaule si da siwena ‘asa etaulunaia esena nigea‐‘esasena ‘enaia:

⁴² Ta mari gurewa si da ‘ewedi, ta si da sa‘udi gurewa nidi ‘adi lopa‘eru; ta mari bwada si da ‘ewa, ta anua si da bwada.

⁴³ Ta ‘abo gurewa i ‘ewedi, ta anua ‘i koli, ta ‘i bwada, ga muriega muia i ‘ilama, ta anuaia ‘i pwailama;

⁴⁴ Ga to‐taria ‘i da mai ta ‘i da ‘ita, ta, u ‘ita, ‘abo muia i ‘elelewana anua ‘ena, tauna lepero loniuna anua ‘ena: tauna nigea‐‘esasena.

⁴⁵ Ta anua ‘i da so‘ona ‘ana gurewa, ta ‘ana kaiwe, ta anua ‘ana bwada maibo‘ana; ta ‘asega ‘i da ‘etoapwesedi esena nigea‐‘esasena ‘enaia.

⁴⁶ Wate tauna anua ‘ena ‘i rugurugu tuta maibo‘ana si gibodena ‘i da nigea‐‘esasena ga ‘asuinuanua.

⁴⁷ Ta tauna anuaia i ‘eno‘eno ‘ana ‘oama ‘i da ‘utudi; ta tauna anuaia i ‘e‘ai ‘ana ‘oama ‘i da ‘utudi.

⁴⁸ Ta ‘abo to‐taria ‘i ruguma, ta i ‘ebesa, ta, u ‘ita, anua si bwadena ni‘atu, ga muia nigea i ‘elelewana anua ‘enaia; ga to‐taria anua ‘i da ‘inanena ‘aene ‘esasena, muia ni‘atu ‘i bobo‘ana ta ‘enega.

⁴⁹ Ta anua sabi gi‘esasena manua ‘e rua ‘i da ‘ewa, kaiwe maruana ta, bweabwearina ta, isopa ta:

⁵⁰ Ta manua ‘e bweu ‘i da ununa gaeba bwa‘a ‘enaia boasi daudauna debanaia:

⁵¹ Ta kaiwe maruana ‘i da ‘ewena, isopa ta, bweabwearina ta, manua maiawasina ta, ta manua mwawamwawasina rarana ‘ena ‘i da sa‘udi, ta boasi daudauna ‘enaia, ta anua ‘i da loseuseuli masebeni:

⁵² Ta anua ‘i da gi‘esasa manua raranega, boasi daudaunega be, manua maiawasinega be, kaiwe maruanega be, isopega be, bweabwearinega be:

⁵³ Ta manua maiawasina ‘i da gisine ‘asa etaulunaia mitawa ‘enaia: nadigega anua manuna ‘i da gienua‘ebweu: ta ‘i da ‘esasena.

⁵⁴ Gete loina lepero ‘ina muia ‘ana bubuna iauna manuna, ta ‘isi‘isi uiauia ‘ena manuna;

⁵⁵ Ta ‘oama ‘ana lepero manuna, ta anua manuna;

⁵⁶ Ta pulu manuna, ta ‘isi‘isi manuna, ta bune wakewakekena manuna:

⁵⁷ Sabi e‘ita ‘ena ‘i nigea‐‘esasena, ta ‘ena i ‘esasena: gete lepero ‘ana loina.