Loina 13 - Buki Tabu Lowaenei 1919

‘UPWA 13.

¹ Ta Ieoba ‘i ona Mose ‘ena ta Aarona ‘ena, ‘i gwae,

² ‘Ena tai esiona bwarana ‘ena pulu ‘i miami, nai ‘isi‘isi, nai bune, ta esiona bwarana ‘ena ‘i e muia lepero, ga si da me‘ena Aarona to‐taria ‘enaia, nai natunao to‐taria ‘e bweuna ‘ediega ‘enaia:

³ Ta to‐taria muia esiona bwarana ‘enaia ‘i da ‘itena: ta ‘abo unuununa muia ‘ena ni‘atu ‘i burabura, ta muia ‘ana ‘ita ‘atua esiona bwarana soranaia, tauna muia lepero: ta to‐taria ‘ena ‘i da ‘ita, ta ‘i da ‘inanena nigea‐‘esasena.

⁴ Ta ‘abo bune ‘i burabura esiona bwarana ‘enaia, ta ‘ana ‘ita nigea bwarana soranaia, ta unununa nigea buraburana, ga to‐taria tauna ma‘ana muia ‘i da ‘aubodena ga asiata ‘e sebeni:

⁵ Ta to‐taria asiata ‘e sebeni nina ‘i da ‘itena: ta, wa ‘ita, ‘abo matanaia muia ‘i miami, ta muia nigea i ‘elelewana bwarana ‘enaia, ga to‐taria ‘i da ‘aubodena wate asiata ‘e sebeni;

⁶ Ta to‐taria wate ‘i da ‘itena asiata ‘e sebeni nina: ta, wa ‘ita, ‘abo muia ‘i guguioi, ta muia nigea i ‘elelewana bwarana ‘enaia, ga to‐taria ‘i da ‘inanena ‘esasena; tauna ‘isi‘isi; ta ‘ana ‘oama ‘i da ‘utudi, ta ‘i da ‘esasena.

⁷ Ta ‘abo ‘isi‘isina i ‘elelewana bwarana ‘enaia, ni‘atu ‘i e‘ita‘ena to‐taria ‘ena ‘ina ‘esasena manuna, ga ‘i da e‘ita‘ena limana to‐taria ‘enaia;

⁸ Ta to‐taria ‘i da ‘ita, ta, wa ‘ita, ‘abo ‘isi‘isi i ‘elelewana bwarana ‘enaia, ga to‐taria ‘i da ‘inanena nigea‐‘esasena: tauna lepero.

⁹ ‘Ena muia lepero tai ‘ena ‘i miami, ga si da me‘ena to‐taria ‘enaia;

¹⁰ Ta to‐taria ‘i da ‘itena, ta, wa ‘ita, ‘abo pulu buraburana bwarana ‘ena ‘i miami, ta ‘unuununa ‘i gibunina be ‘i burabura, ta esio nigea bwaranamo pulu ‘ena ‘i miami,

¹¹ Tauna lepero kadekaderina esiona bwarana ‘enaia, ta to‐taria ‘i da ‘inanena nigea‐‘esasena; gea‘abo ‘i da ‘au‘aubode; tauna nigea‐‘esasena manuna.

¹² Ta ‘abo lepero i ‘elelewana bwarana ‘ena, ta lepero tauna ma‘ana muia bwarana ‘i bodena debanega ga ‘aenaia, na‘ieana ‘ana ‘ita to‐taria ‘enaia;

¹³ Ga to‐taria ‘i da ‘itena: ta, wa ‘ita, ‘abo lepero ni‘atu bwarana maibo‘ana ‘i bodena, tauna ma‘ana muia ‘i da ‘inanei ‘aene ‘esasena; ni‘atu ‘i burabura: i ‘esasena.

¹⁴ Ta ‘ena esio nigea bwaranamo ‘ena ‘i apwesa, ‘i da nigea‐‘esasena.

¹⁵ Ta to‐taria esio nigea bwaranamo ‘i da ‘itena, ta ‘i da ‘inanena nigea‐‘esasena: esio nigea bwaranamo ‘i nigea‐‘esasena: tauna lepero.

¹⁶ Nai ‘abo esio nigea bwaranamo ‘i da ‘ila limana, ta ‘i gibuni be buraburana, ga ‘i da mai to‐taria ‘enaia.

¹⁷ Ta to‐taria ‘i da ‘itena; ta, wa ‘ita, ‘abo muia ni‘atu ‘i burabura, ga tauna ma‘ana muia ‘i da ‘inanena ‘aene ‘esasena: i ‘esasena.

¹⁸ Ta ‘ena esiona bwarana ‘ena lalawaa ‘i miami, ga ‘i sila,

¹⁹ Ta lalawaa ‘ana lopa‘eru pulu buraburana ‘i apwesa, nai bune wakewakekena, lobweabwearina, ga ‘i da e‘ita‘ena to‐taria ‘enaia;

²⁰ Ta to‐taria ‘i da ‘ita, ta, u ‘ita, ‘abo ‘ana ‘ita ‘aene bwarana soranaia, ta unuununa ni‘atu ‘i burabura, ga to‐taria ‘i da ‘inanena ‘aene nigea‐‘esasena: tauna muia‐lepero, ‘i pwailama lalawaa ‘enega.

²¹ Ta ‘abo to‐taria i ‘itena, ta, u ‘ita, nigea unuununa ‘i burabura ‘enaia, ta ‘abo nigea bwarana soranaia, ta ‘i guguioi, ga to‐taria ‘i da ‘aubodena asiata ‘e sebeni:

²² Ta ‘abo i ‘elelewana bwarana ‘enaia, ga to‐taria ‘i da ‘inanena ‘aene nigea‐‘esasena: tauna muia.

²³ Ta ‘abo bune wakewakeke ‘ana esena ‘ena ‘i miami, ta nigea i ‘elelewana, tauna lalawaa kweana; ta to‐taria ‘i da inanena ‘aene ‘esasena.

²⁴ Nai ‘ena esiona bwarana awe i ‘ara‘arasina ‘ena ‘i miami, ta ‘arata ‘awa‘iia‘iia‘ena ‘i lowakewakeke, lobweabwearina, nai buraburana;

²⁵ Ga to‐taria ‘ena ‘i da ‘ita: ta, u ‘ita, ‘abo unuununa bune wakewakeke ‘enaia ‘i burabura, ta ‘ana ‘ita bwarana soranaia; tauna lepero, ‘i pwaila ‘arata ‘enaia: ta to‐taria ‘i da ‘inanena ‘aene nigea‐‘esasena: tauna muia lepero.

²⁶ Ta ‘abo to‐taria i ‘itena, ta, u ‘ita, nigea unuununa buraburana bune wakewakeke ‘enaia, ta nigea bwarana soranaia, ta ‘i guguioi; ga to‐taria ‘i da ‘aubodena asiata ‘e sebeni:

²⁷ Ta to‐taria asiata ‘e sebeni nina ‘i da ‘itena; ‘abo i ‘elelewana bwarana ‘enaia, ga to‐taria ‘i da ‘inanena ‘aene nigea‐‘esasena: tauna muia lepero.

²⁸ Ta ‘abo bune wakewakeke ‘i miami ‘ana esena ‘enaia, ta nigea i ‘elelewana bwarana ‘ena, ta ‘i guguioi; tauna ‘arata pusona, ta to‐taria ‘i da ‘inanena ‘aene ‘esasena; tauna ‘arata kweana ta ‘enega.

²⁹ Ta ‘ena tai be waine ma‘ana muia debanaia nai ‘umina ‘enaia,

³⁰ Ga to‐taria muia ‘ena ‘i da ‘ita; ta, u ‘ita, ‘abo ‘ana ‘ita bwarana soranaia, ta uiauiana sapusapulelena raurauna ‘ena ‘i miami, ga to‐taria ‘i da ‘inanena ‘aene nigea‐‘esasena; tauna ‘isi‘isi, tauna debana ‘ana lepero nai ‘umina.

³¹ Ta ‘abo to‐taria muia ‘isi‘isi ‘ena i ‘ita, ta, u ‘ita, ‘ana ‘ita nigea bwarana soranaia, ta nigea iauiauna gaigaina ‘enaia, ga to‐taria tauna ma‘ana ‘muia ‘isi‘isi ‘i da ‘aubodena asiata ‘e sebeni:

³² Ta asiata ‘e sebeni nina ‘enega to‐taria muia ‘ena ‘i da ‘ita: ta, u ‘ita, ‘abo ‘isi‘isi nigea i ‘elelewana, ta nigea uiauiana raurauna ‘ena ‘i miami, ta ‘isi‘isi ‘ana ‘ita nigea bwarana soranaia,

³³ Ga si da suina, ta ‘isi‘isi gea‘abo si da suisui; ta to‐taria tauna ma‘ana ‘isi‘isi ‘i da ‘aubodena ta wate asiata ‘e sebeni;

³⁴ Ta asiata ‘e sebeni nina to‐taria ‘isi‘isi ‘ena ‘i da ‘ita: ta, u ‘ita, ‘abo ‘isi‘isi nigea i ‘elelewana bwarana ‘enaia, ta ‘ana ‘ita nigea bwarana soranaia; ga to‐taria ‘i da ‘inanena ‘aene ‘esasena: ta ‘ana ‘oama ‘i da ‘utudi, ta ‘i da ‘esasena.

³⁵ Ta ‘abo ni‘atu ‘ina ‘esasena ‘i gumwara ga ‘isi‘isi i ‘elelewana;

³⁶ Ga to‐taria ‘ena ‘i da ‘ita: ta, u ‘ita, ‘abo ‘isi‘isi i ‘elelewana bwarana ‘enaia, to‐taria gea‘abo ‘uia‘uiana raurauna manuna ‘i da ‘ebesa; tauna ‘i nigea‐‘esasena.

³⁷ Ta ‘abo matanaia ‘isi‘isi ‘i miami, ta ‘ana guaraguara gaigaina ‘enega ‘i tabwama; ‘isi‘isi ni‘atu ‘i wagowago, i ‘esasena: ta to‐taria ‘i da ‘inanena ‘aene i ‘esasena.

³⁸ Ta ‘ena tai nai waine esiodi bwarana ‘ana bune wakewakekedi ‘i miami, tugama bune wakewakekedi buraburadi;

³⁹ Ga to‐taria ‘i da ‘ita: ta, u ‘ita, ‘abo bune wakewakekedi esiodi bwarana ‘ena ‘i burabura maagaigaina; tauna bune, bwarana ‘enega ‘i pwailama; i ‘esasena.

⁴⁰ Ta ‘abo tai uiauiana ‘i sagusagu debanega, tauna ‘i debadebana; ta i ‘esasena.

⁴¹ Ta ‘abo uiauiana ‘i sagusagu deba ‘isawanega, ‘asuna ‘i debadeba; ta i ‘esasena.

⁴² Ta ‘abo debagamwana debadebana, nai manininega ‘i deba, muia buraburana lobweabwearina ‘ena ‘i miami; tauna lepero ‘i pwailama debagamwana debadebana ‘enaia, nai maninina debadebana ‘enaia.

⁴³ Ga to‐taria ‘ena ‘i da ‘ita: ta, u ‘ita, ‘abo muia ‘ana pulu buraburana lobweabwearina debagamwana debadebana ‘enaia, nai maninina debadebana ‘enaia, nadigega lepero ‘ana ‘ita esiona bwarana ‘enaia;

⁴⁴ Tauna tai lepero, tauna nigea‐‘esasena: to‐taria ‘i da ‘inanena ‘aene nigea‐‘esasena; ‘ana muia debanaia.

⁴⁵ Ta to lepero tauna ‘ena muia ‘i miami, ‘ana ‘oama si da sabudi, ta uiauiana ‘i da li‘ami, ta sopa‘etanina ‘i da waduna, ta ‘i da bwau, Nigea‐‘esasena, nigea‐‘esasena.

⁴⁶ Asiata iauiauna ‘ediega muia ‘ena ‘i miami ‘i da nigea‐‘esasena; tauna nigea i ‘esasena; ‘i da miami tebweunamo; ‘etauluia ‘ina ‘ebemia ‘i da miami.

⁴⁷ ‘Oama wate tauna muia lepero ‘ena ‘i miami, nai ‘oama wula, nai ‘oama kaleko;

⁴⁸ Nai ioniionina, nai wasiwasina; kalekoega, nai wulega; nai bwara ‘ena, nai iage ‘e bweuna si bubuna bwarega;

⁴⁹ ‘Abo muia lokarakarawina nai lobweabwearina ‘oama ‘enaia, nai bwara ‘ena, nai ioniionina ‘ena, nai wasiwasina ‘ena, nai ‘e bweu iage bwarega; tauna muia lepero, ta si da e‘ita‘ena to‐taria ‘enaia:

⁵⁰ Ta to‐taria muia ‘ena ‘i da ‘ita, ta iage ma‘ana muia ‘i da ‘aubodena ga asiata ‘e sebeni:

⁵¹ Ta asiata ‘e sebeni nina ‘ena ‘i da ‘ita; ‘abo muia i ‘elelewana ‘oama ‘enaia, nai ioniionina ‘ena, nai wasiwasina ‘ena, nai bwarana ‘ena, to‘ase nai ‘ina guinua bwara si iagena; muia nina lepero ‘elelewana; tauna nigea ‘esasena.

⁵² Ta ‘oama nina si da gabuna, nai ioniionina nai wasiwasina, wula ‘ena nai kaleko ‘ena, nai iage ‘e bweu bwarega, ‘ena muia ‘i miami: tauna lepero loniuna ta ‘enega; si da gabuna aweiega.

⁵³ Ta ‘abo to‐taria i ‘ita, ta, u ‘ita, muia nigea i ‘elelewana ‘oama ‘enaia, nai ioniionina ‘enaia, nai wasiwasina ‘enaia, nai ‘e bweu iage bwarega;

⁵⁴ Ga to‐taria ‘i da ona be iage ‘ena muia ‘i miami si da ‘utuna, ta ‘i da ‘aubodena wate asiata ‘e sebeni.

⁵⁵ Ta ni‘atu muia si ‘utuna ga to‐taria ‘i da ‘ita: ta, u ‘ita, ‘abo muia nigea ‘ana ‘ita i ‘ebunina, ta muia nigea i ‘elelewana, tauna nigea‐‘esasena; awe ‘ena ‘u da gabuna; ‘i loniu, nai ‘ina deba gamwanaia nai guaunaia.

⁵⁶ Ta ‘abo to‐taria i ‘ita, ta, u ‘ita, ni‘atu muia si ‘utuna ga ‘i guguioi, ga ‘oamega ‘i da sabuna, nai bwarega, nai ioniioninega, nai wasiwasinega:

⁵⁷ Ta ‘abo ‘i mia‘ataia ‘oama ‘ena, nai ioniionina ‘ena, nai wasiwasina ‘ena, nai ‘e bweu iage bwarega ‘ena, tauna ‘i pwailama: iage muia ‘ena ‘i miami ‘u da gabuna aweiega.

⁵⁸ Ta ‘oama, nai ioniionina, nai wasiwasina, nai to iage bwarega, tauna ‘u da ‘utuna, ‘abo muia ni‘atu ‘ediega ‘i dena, ga si da ‘utu ‘e ruena, ta ‘i da ‘esasena.

⁵⁹ Gete muia lepero ‘ana loina ‘oama wula nai kaleko ‘enaia, nai ioniionina, nai wasiwasina, nai ‘e bweu iage bwarega, be ‘u da ‘inanena ‘aene ‘esasena, nai ‘u da ‘inanena ‘aene nigea‐‘esasena.