Loina 12 - Buki Tabu Lowaenei 1919

‘UPWA 12.

¹ Ta Ieoba ‘i ona Mose ‘enaia, ‘i gwae,

² Iseraela tubunao ‘edia ‘u da gwae, ‘u da ona, ‘Abo waine i ‘euwana, ta me‘olotona ‘i enatunena, ga ‘i da nigea‐‘esasena ga asiata ‘e sebeni; na‘ieana ‘ina le‘oasa ‘ina mia dumaduma ‘ana asiatao ‘i da nigea‐‘esasena.

³ Ta asiata ‘e eta nina esiona matana si da lodaba.

⁴ Ta ‘ana giesasa rarana ‘ena ‘i da miami ga asiata ‘e tati teri; gea‘abo ‘e bweu iage tabu ‘i da gitoo, nai ‘i da rugu anua tabu ‘enaia, ga ‘ina gie‘esasena ‘ana asiata si da losaroni.

⁵ Ta ‘abo mewainena ‘i enatunena, ga ‘i da nigea‐‘esasena ga wiki ‘e rua, na‘ieana ‘ina miadumaduma ‘enaia: ta ‘ana gie‘esasena rarana ‘ena ‘i da miami ga asiata sikisiti ta sikisi.

⁶ Ta ni‘atu ‘ana asiata gie‘esasena si gumwara, natuna me‘olotona manuna, nai natuna mewainena manuna, ga lami iakwara ‘e bweuna ‘enega ‘i da me‘ena ‘ebwaeadaita gabugabu manuna, ta bunebune menonoiana ‘e bweuna, nai bunetutu ‘e bweuna, loegesi ‘ana ‘ebwaeadaita manuna, anua ‘ebeeloba ‘ana ‘awa ‘enaia, to‐taria ‘enaia:

⁷ Ta ‘i da ‘ebwaea‘ena Ieoba matanaia, ta ‘i da gienua‐‘ebweu manuna; ta rarana ‘arena ‘enega ‘i da ‘esasena. Gete loina tauna ‘i enatuna manuna, nai me‘olotona nai mewainena.

⁸ Ta ‘abo ‘ina gwegwe nigea lami sawesawenaia, ga bunetutu ‘e rua ‘i da ‘ewa, nai bunebune menonoiadi ‘e rua; ‘e bweuna ‘ebwaeadaita gabugabuna manuna, ta ‘e ruena loegesi ‘ana ‘ebwaeadaita manuna: ta to‐taria ‘i da gienua‐‘ebweu manuna, ta ‘i da ‘esasena.