Loina 10 - Buki Tabu Lowaenei 1919

‘UPWA 10.

¹ Ta Nadaba be Abiu, Aarona natunao me‘olotodi, ‘e bweuna ‘e bweuna ‘ana gaeba i ‘ewena, ta awe sabelulu ‘ena si sa‘una, ta mu‘ana ‘ena si ‘esa‘una, ta awe dumadumana si ‘ebwaea‘ena Ieoba matanaia, tauna nigea ‘i onaona ‘edia.

² Ta awe sabelulu ‘i apwesama Ieoba matanega, ta i ‘enidi, ta Ieoba matanaia si mwawasa.

³ Ga Mose ‘i ona Aarona ‘ena, Gete iage nina Ieoba ‘i ona, ‘i gwae, ‘Abo‘agu taudi si mai serabeguia ‘edia ia da ‘etabu, ta tomota iauiaudi matadia ia da ‘e esaesa. Ta Aarona i ‘ara‘enono.

⁴ Ta Mose Misaela ta Elisapani, Osiela Aarona wana natunao, ‘i bwauiedi, ta ‘i eonedi, Wa da doroma, tasimiao wa da ‘a‘aridi anua tabu matanega ‘asa etaulunaia ‘enaia.

⁵ Ga si doroma, ta ‘adi kotu ‘ediega si ‘a‘aridi ‘asa etaulunaia; na‘ieana Mose ‘i gwae.

⁶ Ta Mose ‘i ona Aarona ‘enaia, ta Eleasara ‘enaia ta Itamara ‘enaia, natunao me‘olotodi, debami uiauiadi gea‘abo wa li‘ali‘ami, ta gea‘abo ‘ami ‘oama wa sabusabudi; be ‘enega gea‘abo wa mwawamwawasa, ta gea‘abo ‘i da gamwasoara boda maibo‘ana ‘edia: ta tasimiao, Iseraela ‘ina anua maibo‘ana, awe ‘ara‘arata ni‘atu Ieoba ‘i loe‘abina manuna si da dedoi.

⁷ Ta anua ‘ebeeloba ‘ana ‘awa gea‘abo ‘enega wa apweapwesa, nai wa da mwawasa: Ieoba ‘ina bunama orooroa ‘emia ‘i miami ta ‘enega. Ta si guinua na‘ieana Mose ‘ina ona.

⁸ Ta Ieoba ‘i ona Aarona ‘enaia, ‘i gwae,

⁹ ‘Oio, nai natumuao ma‘emuao, Oine nai boasi pa‘arina gea‘abo wa numanuma ‘ena wa rurugu anua ‘ebeeloba ‘enaia, be ‘enega gea‘abo wa mwawamwawasa; gete loina ‘ataia ‘imi epata‐tomota ‘edia:

¹⁰ Ta ‘enega iage tabu ta iage besobeso wa da sa‘u dumedumedi, ta iage nigea ‘esasena ta iage ‘esasena ‘edia;

¹¹ Ta ‘enega Iseraela tubunao loina iauiauna Ieoba ‘edia ‘i ona Mose nimanega wa da e‘itedi.

¹² Ta Mose ‘i ona Aarona ‘enaia, ta Eleasara ‘enaia ta Itamara ‘enaia, natunao me‘olotodi si tupwatupwa, ‘Ebwaeadaita rabia Ieoba ‘ana ‘ebwaeadaita si bubuna aweiega ‘ediega ‘i tupwatupwa, wa da ‘ewena, ta wa da ‘enina nigea malebeninamo ‘ebetaria deinaia; tauna i ‘e etabu sana ta ‘enega:

¹³ Ta esena tabuna ‘ena ‘u da ‘enina, ‘amu ‘egu‘eguiai ta ‘enega, ta natunao ‘adi ‘egu‘eguiai, Ieoba ‘ana ‘ebwaeadaita si bubudi aweiega ‘ediega: nadigega ‘eguia ‘i ona ta ‘enega.

¹⁴ Ta lumaluma lo‘uio‘uiona ta bwadaga gilagilasina wa da ‘enidi esena ‘esasena ‘enaia; ‘oio, natumuao me‘olotodi, ta natumuao mewainedi ma‘emuao; si ‘ebwaea‘edi ‘amu ‘egu‘eguiai manuna, ta natunao me‘olotodi ‘adi ‘egu‘eguiai, Iseraela tubunao ‘idi ‘ebwaeadaita guguia ‘adi taria ‘ediega.

¹⁵ Bwadaga gilagilasina ta lumaluma lo‘uio‘uiona si da me‘edi ‘ebwaeadaita si bubuna aweiega iapana ma‘edi, sabi lo‘uio‘ena ‘ebwaeadaita lo‘uio Ieoba matanaia: ta ‘i da ‘imu iage, ta natumuao ma‘emuao, ‘egu‘eguiai ataia; na‘ieana Ieoba ni‘atu ‘i ona.

¹⁶ Ta Mose loegesi ‘ana ‘ebwaeadaita gotana i ‘ebesa ‘ai‘ailina, ta, wa ‘ita, ni‘atu i ‘arasina: ta ‘i gamwasoara Eleasara ‘enaia ta Itamara ‘enaia, Aarona natunao tupwadi, ‘i gwae,

¹⁷ To‘ase manuna loegesi ‘ana ‘ebwaeadaita nigea wa ‘e‘ani anua tabu ‘ina esena ‘enaia, i ‘e etabu sana ta ‘enega, ta ni‘atu i ‘ebwaemi be boda ‘idi bubuna bokobokona wa da ‘a‘ari, sabi gienua‘ebweu manudi Ieoba matanaia?

¹⁸ Wa ‘ita, rarana nigea si me‘ena anua tabu gamwanaia; bubuna ‘ai‘aila wa da ‘enina anua tabu ‘enaia, na‘ieana ia ona.

¹⁹ Ta Aarona ‘i ona Mose ‘enaia, Wa ‘ita, batua ‘idi loegesi ‘ana ‘ebwaeadaita ta ‘idi ‘ebwaeadaita gabugabu ni‘atu si ‘ebwaea Ieoba matanaia; ta iage nadigega getedi si mai ‘eguia; ta ‘abo loegesi ‘ana ‘ebwaeadaita ia ‘enina batua, ‘i da bobo‘ana nai Ieoba matanaia?

²⁰ Ta ni‘atu Mose ‘i nonona, matanaia ‘i bobo‘ana.