Loina 1 - Buki Tabu Lowaenei 1919

‘UPWA 1.

¹ Ta Ieoba ‘i bwau Mose ‘enaia, ta anua‐‘ebeeloba ‘enega ‘I eonena, ‘i gwae,

² Iseraela tubunao ‘edia ‘u da ona, ta ‘edia ‘u da gwae, ‘Ena tai ‘e bweuna ‘emiega ‘ebwaeadaita i ‘ebwaea Ieoba ‘enaia, ‘imi ‘ebwaeadaita wa da ‘ebwaea manua ‘aedi ‘e ata ‘ediega, tugama bulomakau iau ‘enega ta sipi iau ‘enega.

³ ‘Abo ‘ina ‘ebwaeadaita i ‘ebwaeadaita gabugabu bulomakau iau ‘enega, me‘olotona nigea ma‘ina to‘umalina ‘i da ‘ebwaea: anua ‘ebeeloba ‘ana ‘awa ‘enaia ‘i da ‘ebwaea, be ‘enega Ieoba nuana ‘i da bobo‘ana ‘enaia.

⁴ Ta nimana ‘i da sa‘u ‘ebwaeadaita gabugabu debanaia; ta manuna si da ‘au‘ewena sabi gienua‘ebweuna manuna.

⁵ Ta bulomakau nina ‘i da loemwawasina Ieoba matanaia: ta Aarona natunao, to taria nidi, rarana si da ‘ebwaea, ta rara nina si da loseuseula sakowasie ‘ebetaria ‘enaia tauna anua‐‘ebeeloba ‘ana ‘awa ‘ena ‘i miami.

⁶ Ta ‘ebwaeadaita gabugabu ‘i da sawa, ta ‘i da ‘upwa tomwanao ‘edia.

⁷ Ta Aarona to taria natunao ‘awe sabelulu si da sa‘u ‘ebetaria ‘enaia, ta kaiwe si da sa‘u ‘ai‘aili awe sabelulu ‘enaia:

⁸ Ta Aarona natunao, to taria nidi, tomwanao, bulubuluna, ta iapana, si da esa‘u leleni kaiwe ‘enaia tauna awe sabelulu ‘ebetaria ‘ena ‘i miami ‘enaia:

⁹ Ta diana ta ‘aena ‘i da ‘utudi boasiega: ta to taria maibo‘ana ‘i da gabu ‘ebetaria ‘enaia, ‘ebwaeadaita gabugabu manuna, ‘ebwaeadaita awesabeluluiega si bubuna, maina dibidibi Ieoba ‘enaia.

¹⁰ Ta ‘abo ‘ina ‘ebwaeadaita ‘i da manua ‘aedi ‘e ata ‘ediega, sipi ‘ediega, nai gota ‘ediega, ‘ebwaeadaita gabugabu manuna; me‘olotona nigea ma‘ina to‘umalinamo ‘i da ‘ebwaeae.

¹¹ Ta ‘i da loemwawasina ‘ebetaria ‘ana esena iaarata ‘enaia Ieoba matanaia: ta Aarona natunao me‘olotodi, to taria nidi, rarana si da loseuseula dadana ‘ebetaria ‘enaia.

¹² Ta ‘i da dabena ta tomwanao, mabulubuluna ta maiapana; ta to taria ‘i da esa‘u lelenidi kaiwe ‘enaia tauna awe ‘ena ‘i miami tauna ‘ebetaria ‘ena ‘i miami:

¹³ Ta diana be ‘aena ‘i da ‘utudi boasiega: ta to taria maibo‘ana ‘i da ‘ebwaea, ta ‘i da gabuna ‘ebetaria ‘enaia: tauna ‘ebwaeadaita gabugabuna, ‘ebwaeadaita aweiega si bubuna, maina dibidibi Ieoba ‘enaia.

¹⁴ Ta ‘abo ‘ina ‘ebwaeadaita Ieoba ‘enaia ‘i da ‘ebwaeadaita manua ‘ediega, ga ‘ina ‘ebwaeadaita bunetutu ‘i da ‘ebwaea, nai bunebune menonoiadi.

¹⁵ Ta to taria ‘i da me‘ena ‘ebetaria ‘enaia, ta bulubuluna ‘i da gi‘upaiaule, ta i da gabuna ‘ebetaria ‘enaia; ta rarana ‘i da dau e gumwara ‘ebetaria deinaia:

¹⁶ Ta ‘ina saguba ‘i da ‘ewa iaulei mabi‘ina, ta ‘ebetaria deinaia bomatu ‘enaia ‘i da ‘ule, karikau ‘ana ‘ebesa‘u ‘enaia:

¹⁷ Ta papenega ‘i da giwaga, ta gea‘abo ‘i da ‘au‘auweara rue: ta to taria ‘i da gabuna ‘ebetaria ‘enaia, kaiwe ‘enaia tauna awe ‘ena ‘i miami; tauna ‘ebwaeadaita gabugabuna, ‘ebwaeadaita aweiega, maina dibidibina Ieoba ‘enaia.