Isaia 7 - Buki Tabu Lowaenei 1919

‘UPWA 7.

¹ Ta Aasa Iotama natuna ‘ina asiatao ‘ediega, tauna Osia natuna, Iuda ‘ana King, gete ‘i apwesa, Resina Siria ‘ana king, ta Peka Remalia natuna, Iseraela ‘ana king, si tu‘e Ierusalema ‘ena sabi saia ‘enaia; ta nigea si ewaiwai ‘enaia.

² Ta Dabida ‘ina susu ‘ena si ona, si gwae, Siria Eparaima ‘ena i ‘emisa. Ta ‘atena ‘i loniu, ta ‘ina tomota ‘atedi, ‘atua kaiwe mitawaia si loniu iagilega.

³ Ga Ieoba ‘i ona Isaia ‘enaia, Wa da apwesa gete ‘enega sabi loba Aasa, ‘oio, ta natuio Searaiasuba, boasi lo‘etana ‘ina ‘ebedau garuna ‘enaia, to lo‘utu ‘ina bagura ‘ana ‘eda sinabwana ‘enaia;

⁴ Ta ‘ena ‘u da ona, ‘U da ‘ita‘i‘isi, ta ‘u da ‘emwa‘ule; gea‘abo ‘u matauta, ta gea‘abo ‘ateio ‘i da neneta, kaiwe ‘ara‘arata ma‘asudi iuiudi ‘e rua getedi manudi, Resina ta Siria ‘idi gamwasoara toila manuna, ta wate Remalia natuna ‘ina gamwasoara toila manuna.

⁵ Siria iage to‘umalina ‘i nuanua manuio ta ‘enega, Eparaima wate, ta Remalia natuna, si gwae,

⁶ Ta da tu‘e Iuda ‘enaia, be ta da gie‘elo‘uiena, be ta da ‘aweara ‘ena manuda, be ‘e bweu king ta da sa‘u tu‘e gamwanaia, tuga Tabeela natuna:

⁷ Ta ‘enega gete nadigega ‘Inapwana Eaubada ‘i gwae, Gea‘abo ‘i da tooro, nai ‘i da apwesa.

⁸ Siria debana Damaseko ta ‘enega, ta Damaseko debana Resina: ta iakwara sikisiti paibe gamwanidia Eparaima ‘i da lelewana, be gea‘abo ‘i da ‘ebeloina tomotai:

⁹ Ta Eparaima debana Samaria, ta Samaria debana Remalia natuna. ‘Abo gea‘abo wa da iareiare, gea‘abo wa da mia pa‘ara.

¹⁰ Ta Ieoba ‘i ona Aasa ‘enaia, ‘i gwae,

¹¹ We‘iwe‘iiaia ‘u da sida ‘emuia Ieoba ‘imu Eaubada ‘enega; ‘u da sidena nai ni‘u ‘ena, nai ‘etosora lo‘etana ‘ena.

¹² Ta Aasa ‘i gwae, Gea‘abo ia da sida, nai Ieoba ia da toona.

¹³ Ta ‘i gwae, Gete ‘enega wa da nono, Dabida ‘ina susu ie; ‘aene iage gidarina ‘emia tai wa gielo‘ame‘ame, ta ‘igu Eaubada wate wa da gielo‘ame‘ame?

¹⁴ Ta ‘enega ‘Inapwana tauna we‘iwe‘iiaia ‘i da ‘ebwaemi; wa ‘ita, gomagweine nina ‘i da ‘euwana, ta natuna me‘olotona ‘i da enatunena, ta ‘i da eesena Imanuela.

¹⁵ Ta bata ta mu‘awa ‘i da ‘e‘ani, tuta ‘enega ‘i da mwaratoni be to‘umalina ‘i da guitoasa, ta bobo‘ana ‘i da ‘esinuena.

¹⁶ Tuta goama ‘i da mwaratoni be to‘umalina ‘i da guitoasa, ta bobo‘ana ‘i da ‘esinuena, nuganaia ta ‘enega ‘asa nina tauna ‘ana king ‘e rua ‘u guitoasedi ‘i da waborebore.

¹⁷ Ieoba ‘emuia, ta ‘imu tomota ‘edia ta tamaio ‘ina susu ‘enaia, asiatao ‘i da me‘edi, taudi nigea si mai, asiata ‘enega Eparaima Iuda ‘i pilisinena ga batua; tuga Asiria ‘ana King.

¹⁸ Asiata gote ‘enega gete ‘i da apwesa, Ieoba ‘i da losisi nenewara manuna tauna Aigupito ‘ina boasi‘awaiao ‘idi esena to ‘edasora sana ‘enaia, ta mu‘awa manuna tauna ‘asa Asiria ‘ena ‘i miami.

¹⁹ Ta si da mai, ta iauiaudi si da toa sa‘ara waborebore ‘edia, ta gurewa gaulidi ‘edia, ta kwakwakwara iauiauna ‘edia, ta pwatura iauiauna ‘edia.

²⁰ Asiata gote ‘enega ‘Inapwana deba ta ‘ae unuununa ‘i da sui ‘ebesui e‘isa‘isana ‘enega, tauna Boasi‘awana mariesena esenanao ‘edia ‘i miami, tuga Asiria ‘ina king ‘enega: ta wate umi ‘i da loegumwarina.

²¹ Ta asiata gote ‘enega gete ‘i da apwesa, tai ‘e bweu bulomakau me wainena menonoiana ‘i da amwamwena, ta sipi ‘e rua;

²² Ta gete ‘i da apwesa, susu ‘ana sinabwa si da ‘ebwaea manuna bata ‘i da ‘e‘ai: ‘e bweuna ‘e bweuna ‘i tupwa ‘asa gamwanaia bata ta mu‘awa ‘i da ‘e‘ani ta ‘enega.

²³ Ta asiata gote ‘enega gete ‘i da apwesa, esena iauna ‘edia kaiweoine wani tausana si miami ‘adi e‘isa sekeli‐sileba wani tausana, si da e kaiwe taritaridi ta kwakwakwara manudi.

²⁴ Gita ‘ediega ta tupu ‘ediega ‘e bweuna ‘i da mai ‘enaia; bwa‘a maibo‘ana ‘i da kaiwe taritaridi ta kwakwakwara ta ‘enega.

²⁵ Ta ‘oea iauiaudi si gesoa ‘ebesalega, gea‘abo ‘ena ‘u da mai kaiwe taritaridi ta kwakwakwara ‘adi matauta manuna, ta ‘i da bulomakau ‘idi apwesa manuna, ta sipi ‘idi ‘aiaina manuna.