Isaia 66 - Buki Tabu Lowaenei 1919

‘UPWA 66.

¹ Gete nadigega Ieoba ‘i gwae, Garewa ‘igu ‘ebemi‐esaesa, ta bare‘u ‘aegu ‘adi ‘ebesa‘u: to anua wa da ‘abi ‘eguia? Ta to esena ‘igu ‘ebeeiawai‘ata?

² Iage iauiauna getedi nimagu ‘i mweruruina ta ‘enega, ta nadigega iage iauiauna getedi si apwesama, Ieoba ‘i gwae: ta tai gete ‘ena ia da dune, tuga tauna ‘i gomabeso ta iaruiaruana i ‘aue‘umula ‘enaia, ta tauna ‘i dededera ‘igu ona ‘enega.

³ Tauna bulomakau ‘i ununa tauna na‘ieana tauna tai ‘i loemwawasina; tauna lami ‘i gitariei, na‘ieana tauna kedewa ‘otona ‘i lasena; tauna ‘ebwaeadaita‐palaua i ‘ebwaeaei, na‘ieana tauna bawe rarana i ‘ebwaeaei; tauna mu‘ana ‘i gabuna, na‘ieana tauna goamamea ‘i onaobobomena: tamo, ‘idi ‘edao taudi ni‘atu si ‘esinuedi, ta iaruiaruadi i ‘uiawana ‘idi gadiluluiao ‘ediega;

⁴ ‘Abo‘agu wate ‘idi kabokaboiao ia da ‘esinua, ta ‘idi matauta ia da me‘ena ‘edia; ‘ena ia bwau, nigea ‘e bweu ‘i onalimana ta ‘enega; ‘ena ia ona, nigea si nono: ta iage nidi ‘i to‘umalina mataguao ‘edia si guinuedi, ta iage ‘enega nigea ia ‘uiawana si ‘esinua.

⁵ Ieoba ‘ina ona wa da nonona, ‘omi wa dedera ‘ina ona ‘enega: Tasimiao si guitoasemi, taudi si ‘ulaapwesemi ‘agu esana manuna, ni‘atu si gwae, Ieoba si da ‘awaeseesei, be ‘enega ‘imi guausoara ‘a da ‘itena; ta si da omaiamaia.

⁶ Toila ‘enana ‘asega, ‘enana ‘e bweu anua tabuiega, Ieoba ‘enana tauna ‘i e‘isa ‘ana tarauwarao ‘edia.

⁷ Waine nigea ‘i edaedadama, ga ‘i enatuna; ‘ina elo‘uia nigea, ga goama me‘olotona ‘enega ‘i tubua.

⁸ Iaita iage nadigega ‘i nonona? Iaita iage nadigega i ‘itedi? ‘Asa ‘i da tubua asiata ‘e bweunega nai? ‘Asa ‘i da tubua tuta tomwanega? Tuta nina Siona ‘i edaedadama, natunao ‘i enatunedi.

⁹ Ia da me‘ena enatuna ‘ena, ta gea‘abo nai ia da etubua? Ieoba ‘i gwae: ‘abo‘agu ia etubua gamwa ia da gibode nai? ‘imu Eaubada ‘i gwae.

¹⁰ Wa da guausoara Ierusalema ma‘ieana, ta wa da ‘uiawana manuna, iauiaumi wa obobomena: wa da guausoara ma‘ieana ‘uiawana manuna, iauiaumi wa ‘ewabamu manuna:

¹¹ Be ‘enega wa da esusu ta wa da maa ‘ina ‘ebenuabobo‘ana susudiao ‘ediega; be ‘enega wa da sususu, ta wa da ‘uiawana ‘ina esaesa ‘ana sinabwa ‘enega.

¹² Gete nadigega Ieoba ‘i gwae ta ‘enega, Wa ‘ita, guguia ia da ginao ‘enaia ‘atua boasi‘awana, ta ‘ebeloinao ‘idi esaesa boasi‘awana ‘i maa‘apu‘apu ‘atua, ta ‘enega wa da esusu; si da sumwagidimi, ta si da giesuiasuiami ‘aetubwe ‘edia.

¹³ Na‘ieana ‘e bweu sinana ‘i gienuabobo‘anei, na‘ieana nuami ia da giebobo‘ana; ta wa da nuabobo‘ana Ierusalema ‘enaia.

¹⁴ Ta wa da ‘itena, ta ‘atemi ‘i da guausoara, ta lulumi si da sinabwa ‘ai‘aila nedu nuana nadigega: ta Ieoba nimana ‘i da e‘ita ‘ina to‐guinuao ‘edia, ta nuana ‘i da to‘umalina ‘ana tarauwarao ‘edia.

¹⁵ Wa ‘ita, ta ‘enega, Ieoba ‘i da mai awe‘ara‘aratega, ta ‘ina salioteao si da ‘ebwawabwawa nadigega; sabi ‘ebwaea ‘ina gamwasoara egamwagamwaguiega, ta ‘ina ba‘e awesabeluluiega.

¹⁶ Awe‘ara‘aratega, ta ‘ina sisi‐saiega, Ieoba esio iauiauna ‘i da eonedi: ta to esilae Ieoba ‘enega si da iauiau.

¹⁷ Taudi si etabudi taudi ta si gieesasedi taudi sabi tauia bagurao ‘edia, ‘e bweu gamwagamwanaia guauna, bawe esiona si ‘e‘ai, gadilulu be, kokolaka be; si da losaroni rererea, Ieoba ‘i gwaegwae.

¹⁸ ‘Idi guinuao ta ‘idi nuanuao ia mwaramwaratoni ta ‘enega: tuta ‘i memai, ‘enega ‘ebeloinao ta meia iauiaudi ia da egogonedi; ta si da mai, ta ‘igu esaesa si da ‘ita.

¹⁹ Ta we‘iwe‘iiaia ia da sa‘u gamwagamwanidia, ta taudi nigea si mwawasa ‘ediega ia da etunedi ‘ebeloinao ‘edia, Tasisa ‘ena, Pula ta Luda, taudi si lisi‐tupu, Tubala ta Iabana ‘edia, saru ‘edasora ‘edia, taudi nigea ‘aregu si nonona, nai ‘igu esaesa si ‘itena; ta ‘igu esaesa si da simana ‘ebeloinao gamwagamwanidia.

²⁰ Ta tasimiao iauiaudi si da ‘au‘ewedima ‘ebeloinao iauiaudi ‘ediega ‘ebwaeadaita manuna Ieoba ‘enaia, ‘ose ‘edia, saliote ‘edia be, ‘ebe‘a‘ara ‘edia be, mule ‘edia be, kameli ‘edia be, ‘igu ‘oea tabu Ierusalema ‘ena, Ieoba ‘i gwae, nadigega Iseraela natunao ‘idi ‘ebwaeadaita si me‘ena gaeba ‘esasena ‘enega Ieoba ‘ina anua ‘enaia.

²¹ Ta ‘ediega wate ia da ‘ewedi to taria manudi ta me Lebi manudi, Ieoba ‘i gwae.

²² Na‘ieana garewa auaudi ta bare‘u auauna taudi ia da mwerurua, si da mia ‘ataia mataguia ta ‘enega, Ieoba ‘i gwae, na‘ieana tubumi ta ‘ami esana si da mia ‘ataia.

²³ Ta gete ‘i da apwesa, nawarae auauna ‘e bweuna ga ‘e ruena, ta sabate ‘e bweuna ga ‘e ruena, esio iauiauna si da mai sabi bwagobwago mataguia, Ieoba ‘i gwae.

²⁴ Ta si da apwesawa, ta tai si li‘oa loina ‘eguia ‘adi kokoa si da duneedi: ‘idi didimwana gea‘abo ‘i da mwawasa ta ‘enega, nai ‘idi awe‘ara‘arata ‘i da kweu; ta si da ‘ebegadilulu esio maibo‘ana ‘enaia.