Isaia 65 - Buki Tabu Lowaenei 1919

‘UPWA 65.

¹ Taudi nigea manugu si eona ni‘atu ‘eguiega si eona; taudi nigea si ‘ebesegu taudi si lobegu: Ia gwae, Wa da ‘itegu, wa da ‘itegu, ‘asa nigea ‘agu esanega si eesena ‘enaia.

² Asiata maibo‘ana nimaguao ia iasitoto tomota loguitoasa ‘edia, taudi ‘eda nigea bobo‘ana ‘enega si tautauia, taudi ‘idi nuanua nadigega:

³ Tomota si eiaba‘ataiegu mataguia, bagura ‘edia si taria, ta mu‘ana si gabu gurewa gabugabu ‘edia:

⁴ Taudi ‘ari‘ari gamwanaia si miatoa, ta esena kwaia ‘edia si miami; taudi bawe esiona si ‘e‘ai, ta iage gadilulu kwaiaidi ‘idi gaeba ‘edia ‘i miami;

⁵ Taudi si gwae, ‘U da tooro tebweuio, gea‘abo ‘u mai serabeguia, ‘abo‘agu ‘esasena wawasae ‘emuia: getedi ‘asu ‘ubusugu ‘ena, ‘awe i ‘ara‘arata asiata maibo‘anega.

⁶ Wa ‘ita, si ‘etoladina mataguia: gea‘abo ia da enono, ta ia da e‘isa, tamo, ia da e‘isa lumalumadi ‘enaia.

⁷ Taumimo ‘imi bubuna bokobokoiao, ta tamamiao ‘idi bubuna bokobokoiao rererea, Ieoba ‘i gwae, taudi mu‘ana si gabu ‘oea sinabwadi ‘edia, ta si ona besobeso ‘eguia ‘oea gidaridi ‘edia; ta ‘enega nugana ‘idi guinua ia da ‘etopwapwa lumalumadi ‘enaia.

⁸ Gete nadigega Ieoba ‘i gwae, Na‘ieana oine auauna si loba surana ‘ena, ta ‘e bweu ‘i gwae, Gea‘abo ‘u mudarina, ‘ebebobo‘ana ‘ena ‘i miami ta ‘enega: nadigega ia da guinua ‘igu to‐guinua manudi, be ‘enega gea‘abo ia da loegumwaridi iauiaudi.

⁹ Ta Iakobo ‘enega tubuna ia da me‘ena, ta Iuda ‘enega ‘igu ‘oeao ‘adi to ‘ewa: ta ‘agu ‘esi‘esinuao si da ‘ewena, ta ‘igu to guinuao ‘edia si da miami.

¹⁰ Ta Sarona ‘i da sipiao ‘idi ‘ebe‘e‘ai, ta sa‘ara Akora ‘i da esena ‘ebe‘eno bulomakau manudi, ‘igu tomota manudi taudi si ‘ebesegu.

¹¹ Ta ‘omi Ieoba wa e‘idi‘idia, ‘igu ‘oea tabu wa nuapupura, tebeli wa sa‘u ‘ai‘aili Simasimana manuna, ta oine wa ‘ili‘ilina wa loemaa Oba manuna;

¹² Ia da ‘aseiemi sisi‐saia ‘ena, ta iauiaumi wa da ‘opu‘opu esilae ‘ena: ‘ena ia bwau, nigea wa nono ta ‘enega: ‘ena ia ona, nigea wa nono; ta iage to‘umalina matagu ‘edia wa guinua, ta iage nigea manuna ia guausoara wa ‘esinuena.

¹³ Ta ‘enega gete nadigega ‘Inapwana Eaubada ‘i gwae, Wa ‘ita, ‘igu to‐guinuao si da ‘e‘ai, ta wa da botana: wa ‘ita, ‘igu toguinuao si da numa, ta ‘omi tona‘ami ‘i da iapasa: wa ‘ita, ‘igu to‐guinuao si da guausoara, ta ‘omi wa da omaiamaia:

¹⁴ Wa ‘ita, ‘igu to‐guinuao si da wari ‘ate‘uiawana manuna, ta ‘omi wa da dedo ‘atededoi manuna, ta wa da bwau iaruiarua ‘epi‘episarina manuna.

¹⁵ Ta ‘ami esana wa da pilisinena ‘ebeona‘upa‘upa manuna ‘igu ‘esi‘esinuedi ‘edia, ta ‘Inapwana Eaubada ‘i da loemwawasiio; ta ‘ina to‐guinuao mariesanega ‘i da eesedi:

¹⁶ Ta ‘enega tauna ‘i onaobobomena tauna bare‘uia ‘i da onaobobomena tauna Emeni ‘ina Eaubada ‘enega: ta tauna ‘i ona‘upa‘upa bare‘uia ‘i da ona‘upa‘upa Emeni ‘ina Eaubada ‘enega; gimi iage ‘ebeloniu si nuapupuredi ta ‘enega, ta si miakwaia matagu ‘ediega ta ‘enega.

¹⁷ Wa ‘ita, ta ‘enega, garewa auaudi ta bare‘u auauna ia mweruruidi: ta gimi iage gea‘abo ia da nua‘i‘isidi, nai ‘ategu ‘ena si da mai.

¹⁸ Ta wa da guausoara ta wa da ‘uiawana ‘ataia iage ia mweruruina ‘enega: wa ‘ita, ta ‘enega, Ierusalema ia mweruruina ‘ebeguausoara, ta ‘ina tomota ‘ebe‘uiawana.

¹⁹ Ta Ierusalemega ia da guausoara, ta ‘igu tomota ‘ediega ia da ‘uiawana: ta dedoi ‘enana gea‘abo wate ‘ena si da nono, nai bwau ‘enana.

²⁰ Gea‘abo wate ‘enega asiatao ‘idi goama meameana, nai gimi tai nigea ‘ina asiata ‘i losaroni ‘ai‘ailidi: goama ‘i da mwawasa ‘ana iakwara e wani anaredi, ta to‐to‘umali ‘ana iakwara e wani anaredi si da ‘eliena.

²¹ Ta anua si da ‘abidi, ta ‘edia si da miami; ta bagura oineao si da ‘aso, ta uadi si da ‘e‘ani.

²² Gea‘abo si da ‘abi, ta mari tai ‘ena ‘i da miami; gea‘abo si da ‘aso, ta mari tai ‘i da ‘e‘ani: nadigega kaiwe ‘ina asiatao nadigega ‘igu tomota ‘idi asiatao ta ‘enega, ta ‘agu ‘esi‘esinuao nimadiao ‘idi guinua si da giiai dudurana.

²³ Gea‘abo si da guinua besobeso, nai si da me‘ena ‘ebedidiga manuna; taudi Ieoba ‘ana oboobobomao tubudi ta ‘enega, ta natudiao ma‘ediao.

²⁴ Ta gete ‘i da apwesa, ‘idi bwau nuganinaia, ia da onalimana, ta tuta ‘enega si onaona, ia da nono.

²⁵ Wolifa ta lami si da ‘e‘ai rererea, ta laione nedu ‘i da ‘e‘ai bulomakau ‘atua: ta kau ‘i da moata ‘ana masura. Gea‘abo si da unua nai si da giesaoora ‘igu ‘oea tabu maibo‘ana ‘enaia, Ieoba ‘i gwae.