Isaia 64 - Buki Tabu Lowaenei 1919

‘UPWA 64.

¹ Eguma garewa ‘u da sabu, ta ‘u da mwa‘utama, ta ‘oea si da dau mwa‘uta matamuia;

² Na‘ieana tuta ‘enega awe kaiwe gidarina ‘i loe‘abia, ta awe boasi ‘i gibusobuso: be ‘amu esana ‘i da e‘ita ‘amu tarauwarao ‘edia, be ‘enega ‘ebeloina si da dedera matamuia!

³ ‘Ena iage didiga ‘u guinuedi taudi nigea a ‘ebesa, ‘u mwa‘utama, ‘oea si dau mwa‘uta matamuia.

⁴ Lowaeneiega tai nigea si nonono ta ‘enega, nai tenadiega si sinapu, nai mata i ‘ita mari Eaubada ‘e bweuna tebweuio tuga, tauna ‘i guinua tauna ‘i iamwaiamwana manuna.

⁵ Tauna ‘i guausoara ta bubuna paruparu ‘i guinuei ‘oio ‘u lobena, taudi si nua‘i‘isiio ‘imu ‘edao ‘ediega: u ‘ita, ‘oio ‘u gamwasoara, ta ‘a loegesi: ‘edia ‘a miami tuta lowaeneiega, ta ‘a da bobo‘ana nai?

⁶ Iauiauma ni‘atu nadigega ‘e bweu ‘i baila ta ‘enega, ta ‘ima bubuna paruparu iauiaudi nadigega ‘oama mabi‘ina: ta iauiauma ‘a medamedara kaiwe iawana ‘atua; ta ‘ima bubuna bokobokoiao, nadigega iagila, si tauieda.

⁷ Ta nigea ‘e bweu ‘amu esana ‘ena ‘i bwau, nai ‘i giewaiwaiena tauna be ‘i giiai‘i‘isiio: maniniio ‘u kwaiena ‘emega ta ‘enega, ta ‘u loegumwarima ‘ima bubuna bokoboko ‘ediega.

⁸ Ta gete ‘enega, Ieoba ie, ‘oio tamama; ‘abo‘ama bwa‘adegudegu, ta ‘oio to bubu‘urena, ta iauiauma nimaio ‘ina guinua.

⁹ Ieoba ie, gea‘abo ‘u da gamwasoara didiga, nai bubuna bokoboko ‘u da nua‘i‘isi ‘ataia: u ‘ita, ‘u da dune, ‘a sideio, iauiauma ‘imu tomota.

¹⁰ ‘Imu ‘asa tabu ni‘atu si emitawa, Siona ni‘atu ‘i emitawa, Ierusalema ‘i waborebore.

¹¹ ‘Imu anua tabu ta ‘imu anua bobo‘ai‘ailina, ‘ena tamamao si wariwari tuputupuio, i ‘arasi aweiega; ta ‘ima iage bobo‘adi iauiauna ni‘atu si emudari.

¹² Ieoba ie, iage getedi manudi ‘u da egagaremu tauio? ‘U da enono, ta ‘u da gie‘elo‘uiama sinabwana nai?