Isaia 63 - Buki Tabu Lowaenei 1919

‘UPWA 63.

¹ Iaita gete Edomega ‘i mai, ‘ana ‘oama bweabwearidi Bosira ‘enega? tauna gete ‘ana ‘oamega ‘i esaesa, ‘i tautauia ‘ina waiwai ‘ana sinabwa ‘enega? ‘Abo‘agu ia onaona bubuna paruparuiega, waiwai sabi ‘etoseana.

² To‘ase manuna ‘u ebweabwearina ‘amu ‘oamega, ta ‘amu ‘oama nadigega tauna oine ‘ebedai ‘ena i ‘aiaina?

³ Oine ‘ana ‘ebedai ia ‘aiaina tebweugu; ta tomota ‘ediega nigea ‘e bweu tai ma‘ieagu: tamo, ia ‘aiaidi ‘igu gamwasoarega, ta ia iabutudi ‘igu egamwagamwaguiega: ta raradi ‘ebepa‘ara ‘i loseuseulena ‘agu ‘oama ‘edia, ta ‘agu ‘oama maibo‘ana ia siwaroro.

⁴ Asiata e‘isa ‘ateguia ‘i miami ta ‘enega, ta ‘igu ‘ewa‘ewalimanao ‘adi iakwara ni‘atu ‘i mai.

⁵ Ta ia ‘ita, ta nigea ‘e bweu ‘i leme; ta nuagu ‘i owana nigea ‘e bweu ‘i gietooro: ta ‘enega nimagu taugu ‘etoseana ‘i me‘ena ‘eguia; ta ‘igu egamwagamwagu, tauna ‘i gietoorogu.

⁶ Ta tomota ia ‘aiaidi ‘igu gamwasoarega, ta ‘igu egamwagamwaguiega ia gielaulausidi, ta ‘idi rara‘ebepa‘ara ia siwena bare‘uia.

⁷ Ieoba ‘ina oboboma nua‘ole‘oleiao ia da ‘inana, ta Ieoba ‘ana tuputupuiao, nadigega iage maibo‘ana Ieoba i ‘ebwaeda; ta bobo‘ana sinabwana Iseraela ‘ina susu ‘enaia, tauna i ‘ebwaedi nadigega ‘ina nua‘ole‘oleiao, ta nadigega ‘ina oboboma ‘ana iau.

⁸ ‘I gwae ta ‘enega, Ona ‘ai‘aila, taudi ‘igu tomota, natuguao nigea si da bubu kabokabo: nadigega tauna ‘adi to‘etoseana.

⁹ ‘Idi elo‘uia maibo‘anega tauna ‘i elo‘uia, ta ‘ina miami ‘ana anelose i ‘etoseedi: ‘ina oboboma ta ‘ina nua‘ole‘ole ‘ediega i ‘ewalimedi; ta i ‘amwamwedi, ta i ‘aridi asiata iauiauna lowaeneiega.

¹⁰ Ta si loguitoasa, ta ‘ina iaruiarua tabu si gie‘ate‘uiena: ta ‘enega ‘i gibuni be ‘adi tarauwara, ta tauna ‘i losaia ‘edia.

¹¹ Ga asiata lowaenei ‘i nua‘i‘isidi, Mose, ta ‘ina tomota, ‘i gwae, Mane tauna i ‘au‘ewedima orega ‘ina sipiao ‘idi to‘ita‘i‘isiao ma‘ediao? Mane tauna ‘ina iaruiarua tabu ‘i sa‘u gamwagamwanidia?

¹² Tauna nimana esaesa ‘i tauiena Mose ‘atainaia? tauna boasi ‘i weara ruena matadia, be tauna manuna esana ‘ataia ‘i bubuna?

¹³ Tauna i ‘au‘ewedi ni‘u gamwanaia, ‘atua ose mitawa ‘ena, ta nigea si setupedi?

¹⁴ Na‘ieana bulomakau si mwa‘uta sa‘ara ‘enaia, Ieoba iaruiaruana ‘idi eiawai‘ata ‘i sa‘u: nadigega ‘imu tomota ‘u nuganedi, be esana esaesa ‘u bubuna ‘emuia tauio.

¹⁵ Garewega ‘u da ‘ita mwa‘utama, ta ‘imu tabu ta ‘imu esaesa ‘idi ‘ebemiega ‘u da dune: mane ‘imu gewagewana ta ‘imu guinua waiwaidi? dia ‘ina waiwai ta ‘imu nua‘ole‘oleao si miaiaina manugu.

¹⁶ ‘Oio tamama tuga ta ‘enega, ‘abo Aberaamo nigea ‘i mwaramwaratonima, ta Iseraela nigea i ‘awanatunema; ‘oio, Ieoba ie, ‘oio tamama; ‘amu esana ‘ama to‘ewalima tuta ‘ataia ‘enega.

¹⁷ Ieoba ie, to‘ase manuna ‘u gieloegesiema ‘imu ‘edao ‘ediega, ta ‘atema ‘u giepa‘arina ‘amu matautega? ‘U da ‘ilama ‘imu toguinuao, ‘imu ‘egu‘eguiai ‘ina susuiao, manudi.

¹⁸ ‘Imu tomota tabu si ‘ewena ga tuta gidarina: ‘ama tarauwarao ‘imu anua tabu si ‘aiaina.

¹⁹ ‘Abo‘ama ni‘atu nadigega taudi nigea ‘e bweu tuta ‘u loinedi; nadigega taudi nigea si eesedi ‘amu esanega.