Isaia 62 - Buki Tabu Lowaenei 1919

‘UPWA 62.

¹ Siona manuna gea‘abo ia da enono, ta Ierusalema manuna gea‘abo ia da eiawai‘ata, ga ‘ina bubuna paruparu ‘i apwesawa na‘ieana tuiaiara, ta ‘ana ‘etoseana na‘ieana maiare i ‘ara‘arata.

² Ta ‘ebeloinao ‘imu bubuna paruparu si da ‘ita, ta kiniao iauiaudi ‘imu esaesa: ta ‘amu esana ‘i da auauna, tauna Ieoba ‘awana ‘i da ‘inana.

³ ‘Oio wate ‘u da peaula ‘ita bobo‘ana Ieoba nimanaia, ta peaula esaesa ‘imu Eaubada nimanaia.

⁴ Gea‘abo wate si da eesemu ‘E‘idi‘idiena, nai ‘imu ‘asa si da eesena Waborebore: ta si da eesemu Episibaa, ta ‘imu ‘asa Beula: Ieoba ‘i guausoara manuio ta ‘enega, ta ‘imu ‘asa ‘i da ai.

⁵ Na‘ieana tubuau gomagweine ‘i aina ta ‘enega, nadigega natumuao me‘olotodi si da ai ma‘ieaio: ta na‘ieana toai me‘olotona mwanena manuna ‘i guausoara, nadigega ‘imu Eaubada ‘i da guausoara manuio.

⁶ Ierusalema ie, to‐ita‘i‘isiao ni‘atu ia sa‘u ‘imu ‘ari‐gurewa ‘edia; gea‘abo si da emwa‘ule asiata nai boiboi: ‘omi Ieoba ‘ana to‐gienua‘i‘isiao, gea‘abo wa enono,

⁷ Ta gea‘abo emwa‘ule wa da ‘ebwaea, ga ‘i da sa‘u ‘ai‘aili, ta Ierusalema ‘i da bubuna be si tupuna bare‘uia.

⁸ Ieoba ni‘atu ‘i ona‘upa‘upa atainega, ta ‘ina waiwai nimanega, Ona‘ai‘aila ‘imu witi nigea wate ia da ‘ebwaea be ‘i da emasura ‘amu tarauwarao manudi; ta to‘u‘umara gea‘abo ‘imu oineuana si da numena, tauna manuna ni‘atu ‘u guinua:

⁹ Ta taudi si gitagena si da ‘enina, ta Ieoba si da tupuna; ta taudi si gitagena si da numena ‘igu anua tabu ‘ana ‘atamanao ‘edia.

¹⁰ Wa da rugu, wa da rugu ‘ari ‘ana ‘eberugu ‘edia; tomota ‘idi ‘eda wa da kakari; wa da ‘ulatu‘e, ‘eda sinabwana wa da ‘ulatu‘e; gurewa wa da egogonediwa; doe wa da gilagasi tomota manudi.

¹¹ Wa ‘ita, Ieoba ni‘atu ‘i guguia bare‘u ‘ina ‘ebelosa‘u ‘enaia, Siona natuna me wainena ‘ena wa da gwae, U ‘ita, ‘amu ‘etoseana ‘i memai; u ‘ita, ‘ana e‘isa ma‘ieana, ta ‘ina guinua matanaia.

¹² Ta si da eesedi Tomota tabu, Ieoba ‘ana ‘ewa‘ewalima: ta si da eeseio ‘Ebe‘ebesaio, ‘Asa nigea si e‘idi‘idia.