Isaia 61 - Buki Tabu Lowaenei 1919

‘UPWA 61.

¹ ‘Inapwana Eaubada iaruiaruana ‘eguia; Ieoba ‘i eoroigu ta ‘enega be tetera bobo‘ana ia da guguiaei gomabeso ‘edia: i ‘etunegu be ‘ate‘e‘episaridi ia da paimidi, ‘etoli‘ama ia da guguiaei ioniionidi ‘edia, ta anua‘ebeiona ‘ana gigege taudi si losipwedi ‘edia;

² Be Ieoba ‘ina iakwara nuabobo‘ana ia da guguiaei, ta ‘idi Eaubada ‘ina asiata e‘isa; be iauiaudi si dedoi ia da gieguausoaridi;

³ Be taudi si dedo Siona ‘ena ia da aseiedi, ia da ‘ebwaedi iiara karikau ‘ana lopa‘eru, guausoara ‘ina bunama ‘ewabamu ‘ana lopa‘eru, tuputupu ‘ana ‘oama iaruiarua mwaumwau ‘ana lopa‘eru; be ‘enega si da eesedi bubuna paruparu ‘ina kaiweao, Ieoba ‘ana ‘aso‘aso, be ‘enega si da ‘awaeseeseiena.

⁴ Ta esena kakaedi kadekaderidi si da ‘abi, gimi waborebore si da sa‘u etooro, ta ‘asa kakaedi si da bubu limedi, epata tomota iauna ‘idi waborebore.

⁵ Ta to‘u‘umara si da tooro ta ‘imi sipi iau si da e‘enidi, ta mari ‘asa tonidi si da ‘imi tosalalisiao ta ‘imi to bubu oineao.

⁶ Ta si da eesemi Ieoba ‘ina to tariao: tai si da eesemi ‘ida Eaubada ‘ina to‐guinuao: ‘ebeloinao ‘idi gwegwe wa da ‘e‘ai, ta ‘idi esaesa ‘enega wa da tupumi taumi.

⁷ ‘Imi omaiamaia manuna girua wa da ‘ewa: ta nuaowana manuna si da guausoara ‘idi esena ‘enaia: ta ‘enega ‘idi ‘asa ‘ena e rua si da ‘ewa: guausoara ‘ataia ‘i da miami ‘edia.

⁸ ‘Abo‘agu Ieoba loina ia nuanuana sinabwana ta ‘enega, ‘ipwara bubuna bokoboko ma‘ieana ia guitoasa; ta ‘adi e‘isa ia da ‘ebwa‘edi ona‘ai‘ailega, ta ona‘upa‘upa ‘ataia ia da bubuna ma‘edi.

⁹ Ta tubudi si da mwaratoni ‘ebeloinao gamwagamwanidia, ta natudi tomota gamwagamwanidia: iauiaudi si ‘itedi si da ‘inanedi, ‘aene taudi tubudi taudi Ieoba ‘i onaobobomedi.

¹⁰ Ieoba ‘enega ia da guausoara sinabwana, iaruiaruagu ‘i da guausoara ‘igu Eaubada ‘enega; ni‘atu ‘i e‘otegu ‘etoseana ‘ana ‘oama ‘ediega ta ‘enega, bubuna paruparu ‘ana tara‘apwarega ni‘atu ‘i bodegu, ‘atua toai me‘olotona ‘i eiarina tauna iaiarega, ta ‘atua toai mewainena ‘i eiarina tauna ‘ina oesiega.

¹¹ Na‘ieana bare‘u tupwa ‘i gietabwa ta ‘enega, ta nadigega bagura iage si lelewana ‘enaia ‘i gietabwa; nadigega ‘Inapwana Eaubada bubuna paruparu ta lotuputupu ‘i da giesinabwa ‘ebeloina iauiauna matadia.