Isaia 60 - Buki Tabu Lowaenei 1919

‘UPWA 60.

¹ ‘U da tooro, ‘u da sae; ‘imu ma‘edana ni‘atu ‘i mai ta ‘enega, ta Ieoba ‘ina esaesa ‘i apwesa ‘emuia.

² U ‘ita, ta ‘enega, guguioi bare‘u ‘i da bodena, ta guguioi badona tomota ‘i da bodedi: ta Ieoba ‘i da apwesa ‘emuia, ta ‘ina esaesa si da ‘ita ‘emuia.

³ Ta ‘ebeloinao si da mai ‘imu ma‘edana ‘enaia, ta kiniao ‘imu apwesama ‘ina tuiaiara ‘enaia.

⁴ ‘U da dune tu‘e dadana, be u ‘ita: iauiaudi si egogonedi rererea, si mai ‘emuia: natumuao me‘olotodi si da mai ‘edasorega, ta natumuao me wainedi si da ‘amwamwedi.

⁵ Ga ‘u da ‘ita ta ‘u da ema‘edana, ta ‘ateio ‘i da dedera ta ‘i da sinabwa; ora ‘ina sinabwa ‘i da ‘ila ‘emuia, ‘ebeloina ‘ina gwegwe si da mai ‘emuia.

⁶ Kameli mapwarudi si da bodemu, kameli menonoiadi Midiana ta Epa ‘ediega; iauiaudi Sebega si da mai: gola ta mu‘ana si da me‘edi, ta Ieoba ‘ana tuputupu si da ‘inana.

⁷ Kedara ‘ina sipi iau iauiaudi si da egogonama ‘emuia, Nebaiota ‘ina sipi me‘olotodi ‘emuia si da guinua: ‘igu ‘ebetaria ‘ena si da tu‘ema ta nuagu ‘i da bobo‘ana ‘edia, ta ‘igu esaesa ‘ina anua ‘ana tuputupu ia da sa‘u.

⁸ Iaisigei getedi si taea poana ‘atua, ta bunebune ‘atua ‘idi winidou ‘edia?

⁹ Ona ‘ai‘aila saru si da iamwaiamwagu, ta waga Tasisa nugana, sabi me‘edi natumuao me‘olotodi ‘edasorega, ‘idi sileba ta ‘idi gola ma‘edi, Ieoba ‘imu Eaubada ‘ana esana manuna, ta Iseraela ‘ina Tabu Tebweuna manuna, ni‘atu ‘amu tuputupu ‘i sa‘u ta ‘enega.

¹⁰ Ta to‘u‘umarao ‘imi ‘ari‐gurewa si da ‘abidi, ta ‘idi kiniao ‘emuia si da guinua: ‘igu gamwasoarega ia unuio ta ‘enega, ta ‘igu nuabobo‘anega ia ‘atenua‘ole‘olemu.

¹¹ ‘Imu ‘eberugu wate si da ‘egegedi ‘ataia; gea‘abo si da gibodedi asiata nai boiboi; be ‘enega tai ‘ebeloinao ‘idi gwegwe si da me‘ena ‘emuia, ta ‘idi kiniao si da ‘au‘ewedima.

¹² ‘Asa ta ‘ebeloinao gote nigea ‘emuia ‘i da guinua ‘i da saoora ta ‘enega; tamo, ‘ebeloinao gotedi si da gumwara ‘ai‘aila.

¹³ Lebanona ‘ina esaesa ‘emuia ‘i da mai, gewana, maruana, ta kwakwamo rererea; be ‘igu anua tabu ‘ina esena ‘ana ‘ita bobo‘ana si da iagei, ta ‘aegu ‘adi ‘ebesa‘u ia da bubuna esaesa.

¹⁴ Ta taudi si unuio natudiao me‘olotodi ‘emuia si da mai bwagobwago; ta iauiaudi si sinariio si da a‘opu‘opu ‘aeiapaiapamuao ‘edia; ta si da eesemu Ieoba ‘ina asa, Iseraela ‘ina Tabu Tebweuna ‘ina Siona.

¹⁵ Lowa si e‘idi‘idiemu ta si guitoasemu, ta ‘enega nigea ‘e bweu tai ‘i rubwareio, ta gete ia da bubuio be ‘u da bobo‘ai‘ailina ‘ataia, ‘epata tomota iauna ‘idi ‘ebeguausoara.

¹⁶ ‘Ebeloinao ‘idi susu ‘u da numa wate, ta kiniao susudi ‘u da esusu: ta ‘u da mwaratoni ‘aene ‘abo‘agu Ieoba ‘abo‘agu ‘amu To‘Etoseana, ta ‘amu to‘ewalima, Iakobo ‘ina Waiwai Tebweuna.

¹⁷ Gola ia da me‘ena barasa ‘ana lopa‘eru, ta sileba ia da me‘ena kainumu ‘ana lopa‘eru, ta barasa kaiwe ‘ana lopa‘eru, ta kainumu gurewa ‘adi lopa‘eru: wate ‘imu to‐‘ita‘i‘isiao ia da bubudi guguia, ta ‘imu to‐nuganao bubuna paruparu.

¹⁸ Didiga gea‘abo wate si da nono ‘imu ‘asa ‘enaia, waborebore nai saoora ‘imu rabao gamwagamwanidia; ta ‘imu ‘ari‐gurewa ‘u da eesedi ‘Etoseana, ta ‘imu ‘eberuguiao Tuputupu.

¹⁹ Sinara gea‘abo wate ‘imu ma‘edana asiataia; nai tuiaiara manuna nawarae ‘i da giema‘edaneio: ta Ieoba ‘i da ma‘edana ataia ‘emuia, ta ‘imu Eaubada ‘imu esaesa.

²⁰ ‘Imu sinara gea‘abo wate ‘i da sugua, nai ‘imu nawarae ‘i da kwaiena tauna: Ieoba ‘i da ‘imu ma‘edana ‘ataia ta ‘enega, ta ‘imu ‘ewabamu ‘ana asiatao si da gumwara.

²¹ ‘Imu tomota wate iauiaudi si da paruparu, ‘asa si da ‘ewa ‘ataia; ‘igu asoa narina, nimaguao ‘idi guinua, be ‘enega ma‘igu esaesa.

²² Megidarasedaina ‘i da etausana, ta megidarina ‘i da e‘ebeloina pa‘ara; ‘abo‘agu Ieoba ia da gimaniniena ‘ana tuta ‘enega.