Isaia 6 - Buki Tabu Lowaenei 1919

‘UPWA 6.

¹ Iakwara nina Osia King ‘i mwawasa ‘Inapwana ia ‘itena ‘ebemi esaesa ‘ena ‘i miatoa, lo‘etana ta lomiatu‘e, ta ‘ana ‘oama iuiuna anua tabu ‘i loemaa.

² ‘Etaninaia serapima si tootooro: ‘e bweuna ‘e bweuna mapapena ‘e sikisi; ‘e rua ‘ediega maninina ‘i bodena, ta ‘e rua ‘ediega ‘aena ‘i bodedi, ta ‘e rua ‘ediega ‘i taea.

³ Ta ‘e bweuna ‘i bwau ‘e bweuna ‘enaia, ta ‘i gwae, Tabu, tabu, tabu, bodao ‘idi Ieoba: gabura maibo‘ana ‘i maa ‘ina eseesega.

⁴ Ta ‘eberugu ‘adi ‘autuiao si loniu tauna ‘i bwau ‘enanega, ta ‘anua nina ‘i maa ‘asuiega.

⁵ Ga ia gwae, Oioi ‘eguia! ‘abo‘agu ni‘atu ia saoora ta ‘enega; ‘abo‘agu tai sopagu baibailidi ta ‘enega, ta tomota sopadi baibailidi gamwagamwanidia ia miami: matagu King nina, bodao ‘idi Ieoba, si ‘itena ta ‘enega.

⁶ Ga serapima ‘e bweuna ‘i taea ‘eguia, nimanega kebwanigita ‘ara‘arasina, tauna ‘ebe‘abiega i ‘ewena ‘ebetaria ‘enega:

⁷ Ta ‘awagu ‘i gitoona ‘enega, ta ‘i gwae, U ‘ita, gete sopaio ‘i gitoodi; ta ‘imu bubuna bokobokona ni‘atu i ‘ewa iaulena, ta ‘imu loegesi i ‘esasena.

⁸ Ta ‘Inapwana ‘enana ia nonona, ‘i gwae, Iaita ia da etunena, ta iaita ‘i da tauia manuda? Ga ia gwae, Gete ‘Abo‘agu; ‘U da etunegu.

⁹ Ta ‘i gwae, ‘U da tauia, ta tomota gete ‘edia ‘u da ona, Wa da nono tuga, ta gea‘abo wa da mwaratoni; ta wa da ‘ita tuga, ta gea‘abo wa da sinapu.

¹⁰ Tomota gete ‘atedi ‘u da gieiapa, ta tenadi ‘u da gietuine, ta matadi ‘u da gibode; ‘abona nai matadiega si ‘ita, ta tenadiega si nono, ta atediega si mwaratoni, ta si sana‘ila, ta si bobo‘ana.

¹¹ Ga ia ona, ‘Inapwana, tuta eisa? Ta ‘i ona limana, Ga tuta ‘enega ‘asa si waborebore, ta anuao nigea taidimo, ta bwa‘a ‘i to‘umali ‘ai‘aila,

¹² Ta Ieoba tai i ‘au‘ewedi ‘edasoraia, ta esena si pilisinedi si iau bwa‘a nina gamwanaia.

¹³ Ta ‘abo ‘e bweu sanauna ‘ena ‘i mi‘ami, ‘i da gumwara limana; na‘ieana kaiwe terebina, ta na‘ieana keigwana, tauna ‘arena ‘i miami, ‘ena si ‘upwedi; nadigega ‘atuna tabu tauna ‘arena.