Isaia 59 - Buki Tabu Lowaenei 1919

‘UPWA 59.

¹ Wa ‘ita, Ieoba nimana nigea ‘i kukupa, be gea‘abo ‘i da ‘etoseana; nai tenana ‘i mwau, be gea‘abo ‘i da nono:

² Ta ‘imi bubuna bokobokona si wearimi ‘omi ta ‘imi Eaubada mwatuimi, ta ‘imi loegesiao maninina si kwaiena ‘emiega, be gea‘abo ‘i da nono.

³ Nimami si baila rarega ta ‘enega, ta nimamatagigimi bubuna to‘umalinega: sopami ni‘atu onakabokabo si oneonedi, meiami to‘umalina ‘i onamugimugiei.

⁴ Nigea ‘e bweu ‘i bwaubwau bubuna paruparuiega, ta nigea ‘e bweu ‘i eonaona ona‐‘ai‘ailega: iage besobeso ‘ena si ‘emisa, ta onakabokabo si oneone; wasegigiega si ‘euwana, ta bubuna bokoboko si enatunena.

⁵ Moata poudi si pisari, ta mwanamwanaikwa si saisaila: tauna i ‘e‘ai poudi ‘ediega ‘i mwamwawasa, ta tauna si dai i ‘eweara be i ‘emoata.

⁶ ‘Idi mwanamwanaikwao gea‘abo si da ‘e‘oamao, nai si da lobodedi ‘idi guinuao ‘ediega: ‘idi guinuao, ta didiga ‘ina guinua nimadia ‘i miami.

⁷ ‘Aedi si pilipili to‘umalina ‘ena, ta si lomanini be rara nigea to‘umalina si giedau: nuadi bubuna to‘umalina nuadiao; waborebore ta saoora ‘idi ‘edao ‘edia si miami.

⁸ Guguia ‘ina ‘eda nigea si mwaramwaratoni; ta ‘idi tautauia nigea ‘e bweu loina ‘edia: ‘eda bokobokodi si bubudi taudi ‘edia: tauna ‘ena ‘i tauia guguia nigea ‘i mwaramwaratoni.

⁹ Ta ‘enega loina ‘i mia ‘edasora ‘edega, wate bubuna paruparu nigea ‘i pili ‘eweda: ma‘edana ta ‘ebesa, ta guguioi ta ‘itena; tuiaiara ta ‘ebesa, ta umauma ‘ena ta tautauia.

¹⁰ ‘Abo‘ada ta gidadana ‘ari gurewa manuna ‘atua to matakebo, tamo, ta gidadana ‘atua taudi nigea matadimo: ta loesetupe asuoreore ‘atua boiboi ‘enega; taudi si ewaiwai gamwagamwanidia ‘abo‘ada to mwawasa ‘atua.

¹¹ ‘Abo‘ada iauiauda ta bwaubwau bera na‘ieadi, ta ‘ewabamu didiga bunetutu na‘ieadi; loina ta ‘ebesa, ta nigea ‘e bweu ‘i miami; ‘etoseana manuna, ta ‘edega ‘i mia ‘edasora.

¹² ‘Ida li‘oa‐loina si eiau matamuia ta ‘enega, ta ‘ida loegesiao si simana manuda: ‘ida lioa‐loina ma‘eda si miami ta ‘enega, ta ‘ida bubuna bokoboko manudi, ta mwaramwaratonidi:

¹³ Ta li‘oa loina ta Ieoba ta eiaseiaseie, ‘ida Eaubada ‘ana muria ‘enega ta sana‘ilawa, didiga ta loguitoasa ta oneone, ‘atedega kabokabo ‘ina ona ta nuedi be ta ‘inanedi.

¹⁴ Ta loina ni‘atu i ‘ilawa, ta bubuna paruparu ‘i tooro ‘edasora: ona ‘ai‘aila ‘i be‘u ‘edaia ta ‘enega, ta bubuna tooro ‘ai‘aila nigea kapekapeana be ‘i da rugu.

¹⁵ Tamo, ona‘ai‘aila kakae; ta tauna to‘umalina ‘i pilisinena ‘i bubuna tauna be i ‘e ‘ebe‘oae: ta Ieoba i ‘itena, ta nuana ‘i to‘umalina nigea ‘e bweu loina ‘i miami ta ‘enega.

¹⁶ Ta i ‘ita nigea ‘e bweu tai, ta nuana ‘i owana nigea ‘e bweu to sida ta ‘enega; ta ‘enega tauna nimana ‘etoseana ‘i me‘ena ‘enaia; ta ‘ina bubuna paruparu, tauna ‘i giiaina.

¹⁷ Ta bubuna paruparu ‘i sa‘u ‘ailumaluma manuna, ta ‘etoseana ‘ina peaula debanaia; ta e‘isa ‘ana ‘oama ‘i e‘otedi, ta waiwaiega ‘i e‘oama tara‘apwara ‘atua.

¹⁸ ‘Idi guinuao nadigega, ‘i da e‘isa nadigega, egamwagamwagu ‘ana tolosaiao ‘edia, e‘isa ‘ana tarauwarao ‘edia; e‘isa saru ‘edia ‘i da ‘ebwaealimana.

¹⁹ Nadigega Ieoba ‘ana esana si da matautena ‘ebwagega, ta ‘ina esaesa sinara ‘ina sae ‘enega: ‘i da mai ‘atua murua ta ‘enega, tauna Ieoba iawasina ‘i giedau.

²⁰ Ta to‐‘ewalima ‘i da mai Siona ‘ena, ta taudi li‘oa‐loinega Iakobo ‘ena si sana‘ilama ‘edia, ‘Ieoba ‘i gwae.

²¹ Ta ‘abo‘agu manugu, gete ‘igu ona‘upa‘upa ma‘edi, Ieoba ‘i gwae: iaruiaruagu tauna ‘emuia ‘i miami, ta ‘igu ona taudi ‘awamuia ia sa‘u, gea‘abo ‘awamuiega si da tauiawa, nai tubumuao ‘awadiega, nai tubumuao tubudiao ‘awadiega, Ieoba ‘i gwae, gete ‘enega ta tuta ‘ataia.