Isaia 58 - Buki Tabu Lowaenei 1919

‘UPWA 58.

¹ ‘U da bwau toila, gea‘abo ‘u sa‘u, ‘enaio ‘u da gitu‘e ioguli ‘atua, ta ‘igu tomota ‘idi li‘oa‐loina ‘edia ‘u da simana, ta Iakobo ‘ina susu ‘idi loegesiao ‘edia.

² Ta asiata iauna si ‘ebesegu tuga, ta si ‘uiawana ‘igu ‘eda si mwaratonidi manuna: ‘atua ‘asa bubuna paruparu si guinua, ta ‘idi Eaubada ‘ina loina nigea si e‘idi‘idia, loina paruparuiao si eonegu, si ‘uiawana ‘idi doro Eaubada serabenaia.

³ To‘ase manuna ‘a edidigura, si gwae, ta nigea u ‘ita? To‘ase manuna iaruiaruama ‘a gie‘elo‘uiaei, ta ‘oio nigea ‘u mwaratoni? Wa ‘ita, ‘imi edidigura ‘ana asiata ‘enega ‘imi ‘ebeguausoara wa loba, ta ‘imi guinua iauiaudi wa didiga‘edi.

⁴ Wa ‘ita, wa edidigura losaia ta e‘upwa manudi, ta sabi unua to‘umalina nima ‘etobutuiega; nigea wa edidigura batua be ‘enami si da nono ‘etanaia.

⁵ Gote nadigega ‘edidigura nai ni‘atu ia ‘esinuena? asiata nina be ‘enega tai iaruiaruana ‘i da gie‘elo‘uiena? Tauna nai be debana ‘i da sanamwa‘utena sita ‘atua, ta ‘oama ‘oausa be karikau ‘i da neasi ‘ubuninaia? Gete ‘u da eesena nai ‘aene edidigura, ta asiata bobo‘ana Ieoba ‘enaia?

⁶ Nigea nai gete edidigura ia ‘esinuena? to‘umali ‘ana ‘ebeiona wa da pele, ‘ebe‘a‘ara ‘ana ‘ebepaimiao wa da li‘amidi, ta to mia didiga wa da tagwaredi be si tauia, ta ‘ebe‘a‘ara iauna wa da lasedi?

⁷ Nigea gete nai ‘imi palaua to botana ‘edia wa ‘ebwaea, ta gomabeso si ‘ulaapwesedi ‘u me‘edi ‘imu anua ‘enaia? ‘ena to mabubugewa u ‘itena, ‘aene ‘u lobodebode; ta ‘aene nigea ‘u kwaiemu tauio ‘imu susu tauio ‘enega?

⁸ Gete ‘enega ‘imu ma‘edana ‘i da weara gonagona ‘atua, ta ‘imu giebobo‘ana ‘i da tabwa manini: ta ‘imu bubuna paruparu ‘i da tauia nuganimuia; Ieoba ‘ina esaesa ‘i da murieio.

⁹ Gote ‘enega ‘u da bwau, ta Ieoba ‘i da onalimana; ‘u da bwau, ta ‘i da gwae, ‘Abo‘agu gete ‘ena. ‘Abo gamwagamwaniio ‘enega ‘ebe‘a‘ara ‘u da ‘ewena, ‘enimasusu, ta onaona to‘umalina;

¹⁰ Ta ‘abo to botana ‘ena iaruiaruaio ‘u lisina, ta iaruiarua elo‘uia ‘u loemaa; ga ‘imu ma‘edana ‘i da tooro guguioi ‘enaia, ta ‘imu umauma ‘i da asu‘ore‘ore ‘atua:

¹¹ Ta Ieoba ‘i da nuganeio tuta iauiauna, ta iaruiaruaio ‘i da loemaa esena iapaiapasidi ‘edia, ta lulumuao ‘i da giewaiwai; ta ‘u da nadigega bagura si loepwasa, ta nadigega wewerupwa, tauna ‘ina boasiao nigea si gumwagumwara.

¹² Ta taudi ‘emuiega si da mai ‘esena kakaedi kadekaderidi si da ‘abidi: epatatomota iauna ‘idi ‘autuiao ‘u da gitu‘e; ta si da eesemu, ‘Ebeweara ‘ana togiebobo‘ana limana, ‘Edao ‘adi to‐kakari‐limalimana be ‘ena si da miami.

¹³ ‘Abo ‘aeio ‘u gisana‘ilena sabate ‘enega, ‘imu ‘ebeguausoara ‘ina guinua ‘enega ‘igu asiata tabu ‘enaia; ta sabate u ‘inana ‘aene ‘ebe‘uiawana, ta Ieoba ‘ina tabu ‘ebeamaiabe: ta ‘u da ‘amaiabena, nigea tauio ‘imu bubuna ‘u guinuedi, nai tauio ‘imu ‘ebeguausoara ‘u loba, nai ‘imu ona tauio ‘u oneonedi:

¹⁴ Ga tauio ‘u da ‘uiawana Ieoba ‘enaia: ta ia da bubuio be bare‘u ‘ina esena lo‘etanidi ‘edia ‘u da geru; ta ia da e‘eniio Iakobo tamaio ‘ina ‘egu‘eguiaiega: Ieoba ‘awana ni‘atu i ‘inana ta ‘enega.