Isaia 57 - Buki Tabu Lowaenei 1919

‘UPWA 57.

¹ To paruparu ‘i saoora, ta nigea ‘e bweu ‘atena i ‘uia‘uia; ta tai to nua‘ole‘ole si sawara, ta nigea ‘e bweu ‘i nuanua ‘aene to paruparu to‘umali ‘i memai ‘enega si tauiediwa.

² Guguia ‘ena ‘i rugu; ‘idi ‘ebe‘eno ‘ena si eiawai‘ata, ‘e bweuna ‘e bweuna ‘ina tooro ‘ai‘aila ‘enega ‘i tautauia.

³ Ta gete ‘ena wa da mai serabemaia, ‘omi werabana natunao me‘olotodi, to lo‘elata ta sogara natudi.

⁴ Iaita ‘ena wa lotutuiea taumimo? Iaita ‘ena ‘awami wa giebababa, ta wa meialisi? ‘Omi nigea nai li‘oaloina natunao, kabokabo natunao.

⁵ ‘Omi taumi wa gieiaiiaimi tokwaruiao ‘ediega, kaiwe mwari‘oasina iauna ‘agarauna; gogama wa loemwawasidi sa‘ara ‘edia, gurewa ‘adi eweiara ‘agaraudi?

⁶ Sa‘ara gurewana nonokwaikwaiidi gamwagamwanidia ‘amu ‘egu‘eguia; taudi, taudi ‘imu esena: taudi tuga ‘edia ‘ebwaeadaita numanuma ni‘atu ‘u siwa, ‘ebwaeadaita ni‘atu u ‘ebwaea. Nuagu ‘i da bobo‘ana nai iage getedi manudi?

⁷ ‘Oea kesora ta lo‘etana ‘ena ‘imu ‘ebe‘eno ‘u sa‘u: ‘ena wate ‘u tu‘e sabi ‘ebwaea taria.

⁸ Ta ‘aubodao be ‘ora guaudi ni‘atu ‘imu ‘ebenua‘i‘isi ‘u sa‘u tu‘e: nigea taugumo ta wate ‘e bweu ‘ena ‘u giapweseio, ta ni‘atu ‘u tu‘e; ‘imu ‘ebe‘eno ni‘atu ‘u giebababa, ta ma‘edi ona‘upa‘upa ‘u bubuna; ‘idi ‘ebe‘eno ‘ena u ‘itena ‘u nuanuana sinabwana.

⁹ Ta king ‘ena ‘u tauia ma‘imu bunama, ta ‘imu mu‘ana ‘u gisinabwa, ta ‘imu topiliiareiareao ‘u etunedi ‘edasoraia, ta ‘u gimwa‘utemu tauio Seola ‘enaia.

¹⁰ ‘U lo‘ame‘ame ‘imu ‘eda ‘ina dudura ‘enega: ta nigea ‘u gwae, Nigea ‘e bweu nuaiai: ‘imu pa‘ara ‘ina ‘ebewaiwai ‘u lobena; ta ‘enega nigea ‘u mwawamwawasa.

¹¹ Ta iaita manuna ‘u matauta ta u ‘atesa‘ara, ta ‘enega ‘u onakabokabo, ta nigea ‘u nua‘i‘isigu, nai ‘ateio ‘ena ‘u sa‘u? nigea nai ia enono tuta dudurana ‘enega, ta nigea ‘u matautegu?

¹² ‘Imu bubuna paruparu ia da simana: ta ‘imu guinua manudi, gea‘abo ‘idi loeposeana ‘emuia.

¹³ ‘Ena ‘u dedoi, taudi ‘u egogonedi si da ‘etoseemu: ta iagila ‘i da tauiedi, uweuwenunu ‘i da siieiedi iauiaudi: ta tauna ‘eguia i ‘emisa ‘asa ‘i da ‘ewa, ta ‘igu ‘oea tabu ‘i da ‘ewena.

¹⁴ Ta ‘i da gwae, Wa da ‘ula tu‘e, wa da ‘ula tu‘e, ‘eda wa da bubu, ‘ebeesetupe wa da ‘ewa ‘igu tomota ‘idi ‘edega.

¹⁵ Tebweuna to mia tu‘e ta to lo‘etana tauna tuta ‘ataia ‘ena ‘i miami, tauna ‘ana esana Tabu, gete nadigega ‘i gwae: ‘abo‘agu esena lo‘etana ta tabu ‘ena ia miami, wate tauna iaruiaruana nua‘ebuni ta nuana ma‘ieana, be taudi si nuana iaruiaruadi ia da giewaiwai, ta taudi si nua‘ebuni ‘atedi ia da giewaiwai.

¹⁶ Nigea ia da e‘upwa ‘ataia ta ‘enega, ta nigea ia da gamwasoara ‘ataia: iaruiarua ‘i da mwawamwawasa mataguia ta ‘enega, ta iawasidi taudi ni‘atu ia mwerurua.

¹⁷ ‘Ina iato‘ai ‘ina bubuna bokoboko manuna ia gamwasoara ta ia ununa, maninigu ia kwaiena ta ia gamwasoara: ta ‘i tauia sanasana‘ila ‘atena ‘ina bubuna ‘enega.

¹⁸ Ni‘atu ‘ina bubunao ia ‘itedi, ta ia da giebobo‘anena: wate ia da ‘au‘ewena, ta iage ‘ebeguausoara ia da ‘ebwaealimedi ‘enaia ta ‘ina to ‘ewabamu ‘edia.

¹⁹ Sopa uadi ia mwerurua: Guguia, guguia, tauna ‘edasora ‘ena ta tauna serabeguia ‘ena, Ieoba ‘i gwae; ta ia da giebobo‘anena.

²⁰ Ta to to‘umalidi si nadigega ora ‘i loniu; nigea kapekapeana ‘i da eiawai‘ata ta ‘enega, ta ‘ina ora sepwara ta bwa‘a i ‘ulatu‘e.

²¹ Nigea ‘e bweu guguia, ‘igu Eaubada ‘i gwae, to to‘umali ‘edia.