Isaia 56 - Buki Tabu Lowaenei 1919

‘UPWA 56.

¹ Gete nadigega Ieoba ‘i gwae, Loina wa da ‘ita‘i‘isi, ta bubuna paruparu wa da guinuei: ‘igu ‘etoseana ‘i abe ‘i mai ta ‘enega, ta ‘igu bubuna paruparu ‘i abe ‘i apwesa.

² Tauna tai nina iage gete ‘i guinua, ta tai natuna ‘enega ‘i giiai si bobo‘ana; tauna sabate ‘i ‘ita‘i‘isi ta nigea ‘i li‘oena, ta nimana i ‘ita‘i‘isi be gea‘abo to‘umali ‘e bweuna ‘i guinua.

³ Ta to‘u‘umara, tauna Ieoba ‘ena ‘i miami, gea‘abo ‘i da ona, ‘i gwaegwae, Ieoba ‘i da weari‘ai‘ailigu ‘ina tomota ‘ediega: nai eunaka ‘i da ona, Wa ‘ita, ‘abo‘agu kaiwe mesomesona.

⁴ Eunakao taudi ‘igu sabateao si ‘ita‘i‘isi, ta iage nuanuagu si ‘esinuedi, ta ‘igu ona‘upa‘upa si giiai, ‘idi Ieoba gete nadigega ‘i gwae ta ‘enega:

⁵ ‘Igu anua ‘ena ta ‘igu pitao gamwagamwanidia ‘ebenua‘i‘isi ta esana bobo‘ana wawasae natudiao me‘olotodi ta natudiao me wainedi ‘edia ia da ‘ebwaedi; esana miaataia ia da ‘ebwaedi, tauna nigea si da ‘upwa‐iaulena.

⁶ Wate to‘u‘umara, taudi Ieoba ‘ena si miami, sabi guinua ‘enaia, ta sabi nuanuana sinabwana Ieoba ‘ana esana, be si da ‘ina to‐guinuao, ‘e bweuna ‘e bweuna sabate si ‘ita‘i‘isi ta nigea si li‘oena, ta ‘igu ona‘upa‘upa ‘enega si giiai:

⁷ Tuga taudi ia da ‘au‘ewedima ‘igu ‘oea tabu ‘enaia, ta ‘igu anua ‘ebesidasida ‘ena ‘adi guausoara ia da sa‘u; ‘idi ‘ebwaeadaita‐gabugabudi ta ‘idi tariao ia da nuanuana ‘igu ‘ebetaria ‘enaia: ‘igu anua si da eesena sidasida ‘ina anua tomota iauiaudi manudi ta ‘enega.

⁸ ‘Inapwana Eaubada Tauna Iseraela ‘ina to mia apwesa ‘i egogonedi ‘i gwae, Ta ‘ena ‘aidi wate ia da egogonedi, ta nigea taudimo ‘ina tomota ni‘atu si egogona.

⁹ Iauiaumi mitawa ‘ina iobaiao, wa da mai sabi ‘e‘ai, tamo, iauiaumi iobaiao mitawa ‘enaia.

¹⁰ ‘Ana to‘ita‘i‘isiao si matakebokebo, iauiaudi nigea ma‘idi sinasinapumo; iauiaudi kedewa uwauwa, nigea kepekapeana si bwaubwau; si madawara, si ‘eno‘eno, ‘enomwataia nuanuadi.

¹¹ Tamo, kedewa si dawowo, nigea kapekapeana gamwadi ‘i da pawa; ta getedi to‘ita‘i‘isi sipi nigea si da sinapu: si sana‘ila iauiaudi taudi ‘idi ‘eda ‘enaia, ‘e bweuna ‘e bweuna ‘ina loeposeana ‘enaia, esena iauna ‘enega.

¹² Si gwae, Wa da mai, oine ia da me‘ena, ta boasi pa‘ara ‘enega ta da lo‘emaeda; Ta gibua‘i ‘i da nadigega batua, asiata ‘ana sinabwa nigea ta da ‘etopwapwa.